اخر مواضيع المنتدى

العودة   نايل موتورز - NileMotors.net > :: منـــتديات عــامــــة :: > المنتــــــدى الاجتمــاعى > ::: أهـــم مـوضـوعــات القســـم :::
بحث مخصص
عزيزى الزائر انت غير مسجل لدينا حيث يمكنك التسجيل عبر اضغط هنا
 
كاتب الموضوع m.3abdel3al مشاركات 219 المشاهدات 194589  مشاهدة صفحة طباعة الموضوع | أرسل هذا الموضوع إلى صديق | الاشتراك انشر الموضوع
 
LinkBack أدوات الموضوع انواع عرض الموضوع
قديم 17-10-2009, 06:02 PM   #1
عضو ذهبي
 
الصورة الرمزية m.3abdel3al
البيانات الشخصية
مواضيعي / ردودي
الحالة
m.3abdel3al غير متواجد حالياً

حاصل على الاستيكر
الإعجاب بالمشاركات
شكرًا (أرسل): 0
شكرًا (تلقى): 5
معجب بمشاركة (أرسل): 0
معجب بمشاركة (تلقى): 6

افتراضي كل شيء عن الكلاب ( انواعها - مواصفاتها - اسعارها - اماكن تدريبها )



في الفترة الاخيرة لاقيت في اهتمام من الكثير من الاعضاء بالكلاب لرغبة العضو الاستاذ / احمد ابراهيم بشراء كلب حراسة ودا الي خلاني اعمل التوبيك دا ودا يكون دليل شامل ان شاء الله لكل واحد عايز يكون عنده كلب

و اول حاجة هبتدي بيها هي تحزيرات معينة من الكلاب

تربية الكلاب في المنازل قد تسبب العمى التام

في كشف طبي - الأول من نوعه : طبياً ، وعلمياً ، ويثبت حقيقة إحدى وصايا نبي الإسلام - محمد صلى الله عليه وسلم - بعدم ملامسة الكلاب ، وإبعادها عن أماكن السكن والمعيشة - حذر الأطباء من ازدياد خطر الإصابة بالعمى ؛ بسبب لمس الكلاب ومداعبتها ، والتعرض لفضلاتها ، أو لعابها.
فقد وجد أطباء بيطريون مختصون في علاج أمراض الكلاب ، أن تربية الكلاب ، والتعرض لفضلاتها من : براز وبول وغيرها, ينقل ديدان طفيلية ، تعرف باسم (توكسوكارا كانيس) ؛ تسبب فقدان البصر والعمى لأي إنسان.

فبعد فحص 60 كلبا فحصاً شاملاً ، لاحظ الدكتور / إيان رايت - أخصائي الطب البيطري في سومرسيت - أن ربع الحيوانات تحمل بويضات تلك الدودة في فرائها , حيث اكتشف وجود 180 بويضة في الجرام الواحد من شعر الكلاب , وهي كمية أعلى بكثير مما هو موجود في عينات التربة, كما حمل الربع الآخر من كلاب الفحص 71 بويضة ، تحتوي على أجنة نامية، وكانت ثلاثة منها ناضجة ، تكفي لإصابة البشر بالعمى التام.

وفي التقرير الذي نشرته صحيفة( ديلي ميرور) البريطانية مؤخراً ، أوضح الباحثون ، أن بويضات هذه الدودة لزقة جدا ، ويبلغ طولها ملليمترا واحداً، وباستطاعتها الانتقال بسهولة عند ملامسة الكلاب أو مداعبتها, لتنمو وتترعرع في المنطقة الواقعة خلف العين.

ولتجنب الإصابة بمضاعفات العدوى بتلك الطفيليات ، ينصح الأطباء بغسل اليدين جيدا قبل تناول الطعام ، وبعد مداعبة الكلاب , خصوصا بعد أن قدرت الإحصاءات ، ظهور عشرة آلاف إصابة بتلك الديدان في الولايات المتحدة سنويا ، وتقع معظم الإصابات بين الأطفال.

وجدير بالذكر ، أن نبي الإسلام محمد - صلى الله عليه وسلم - كان قد أوصى - منذ أكثر من 1400 سنة - بعدم ملامسة الكلاب ولعابها ؛ لأن الكلب يلحس فروه أو جلده عدة مرات في اليوم ، الأمر الذي ينقل الجراثيم إلى الجلد والفم واللعاب ؛ فيصبح مؤذيا للصحة , كما أوصى – صلى الله عليه وسلم - في حال ملامسة لعاب الكلاب باليد أو بالأجسام ، بغسلها سبع مرات ، إحداها بالتراب أو الطين ، (وقد اكتشف العلماء مؤخرا ، أن الطين يقتل الديدان والطفيليات) , مشددا على ضرورة غسل الأيدي دائما قبل تناول الطعام

و دلوقتي ان شاء الله هنبتدي مع شرح كل حاجة عن الكلاب


تم تثبيت الموضوع لفترة
على ان ينقل بعد فترة لساحة اهم مواضيع القسم الاجتماعي

الادارة 1


__________________
DA ANA BA3D EL TA3DEL

 
اخر مواضيعى

0 ابه احسن اسكوتر في السوق ؟؟؟؟
0 للبيع جنط BBS " italy " 16
0 للبيع جنط bbs 16
0 عفشة kyp كاملة للبيع " جين - بيرسونا "
0 عفشة kyp و جنوط bbs

 
m.3abdel3al غير متواجد حالياً  
قديم 17-10-2009, 06:05 PM   #2
عضو ذهبي
 
الصورة الرمزية m.3abdel3al
البيانات الشخصية
مواضيعي / ردودي
الحالة
m.3abdel3al غير متواجد حالياً

حاصل على الاستيكر
الإعجاب بالمشاركات
شكرًا (أرسل): 0
شكرًا (تلقى): 5
معجب بمشاركة (أرسل): 0
معجب بمشاركة (تلقى): 6

افتراضي

1- أفضل أنواع من الكلاب ممكن اقتنائها و تربيتها في المنزل:



طبعا أول حاجة هي ازاي نختار الكلب اللي ممكن نربيه في البيت، وانا هبتدي استعرض أفضل مجموعه من الكلاب ممكن تربيتها في البيت و العرض هيكون على حسب السهولة في التدريب والتربية مش على اي معيار تاني، يعني لا هرتب على حسب الشراسه او اي حاجة، ومع كل نوع هكتب مميزاته و ليه هو سهل وعيوبه طبعا الكلام ده خاص بالتربيه في المنزل، يعني ممكن المميزات تكون عيوب في حالات تانية.


ده ميمنعش ان اي كلب ممكن يتربي في شقه بس اكيد هنواجه صعوبات في تربيه انواع معينة وهنحتاج معامله خاصة، و الانواع دي مش هتنتكلم عنها دلوقتي خالص. وكلامي في الموضوع ده خاص بتربيه الكلاب في المنزل اللي فيه عائله، يعني مش منزل عايش فيه شخص لوحده، لان لو الواحد عايش لوحده ممكن يربي اسد علشان هيكون رايق ليه ههههههههههه. المهم نبتدي الموضوع ونقول

بسم الله الرحمن الرحيم:





1- الجولدن ريتريفر(Golden Retriever):










طبعا كلب غني عن التعريف وبيعتبر افضل خيار للتربية في المنازل، وهو اساسا كلب صيد مهمته انه يطارد الفريسه ويجيب الفريسه بعد اصطيادها،





مميزاته:




1- كلب ذكي جدا جدا، بيستجيب للتدريب بسهولة وذكاء وسرعة.







2- بيتقن التدريبات الجديده بسرعه ودقه. 3- غير شرس وودود جدا مع اصحابه ومع الغرباء. 4- كلب نشيط ومرح ومحب للعب. 5- حجمه مش كبير بصوره مبالغ فيها وده بيديله ميزه كبيره في البيت. 6- شكله جميل وحبوب وخصوصا للبنات. 7- مفيش خطوره منه مع الأطفال وبيعتبر من افضل الكلاب في رعاية الأطفال، حنون بدرجة كبيره جدا جدا ومخلص لاصحابه. 8- سهل جدا تربيته مع اي حيوانات اخرى زي الكلاب او القطط.



عيوبه:


1- كلب بيحب النباح وصوته عالي وده طبعا بيسبب ازعاج كبير وخصوصا انه ممكن يعمل مشاكل مع الجيران.








2- اللابرادور (Labrador Retriever):
2- فروته كثيفه نوعا ما وبيتبع كده مجهود في الاستحمام و النظافه. 3- غير شرس يعني لا يمكن اعتباره كلب حراسه من الدرجة الاولى او الثانيه. 4- نشاطه الزايد و شقاوته لو لم يتم السيطره عليهم بصوره صحيحه هينقلب الموضوع لجحيم لانه ممكن يدمر حاجات كتير في المنزل.








نفس مواصفات ومزايا وعيوب الجولدن ريتريفر لكن بيختلف عنه في كام نقطه:


1- غير حيوي ومرح بنفس درجة الجولدن ريتريفر






3- الجيرمن شيبرد (German Shepherd):
2- شكله بيوحي بالشراسه اكتر من الجولدن ريتريفر، ودي ميزه لانه ممكن في الحراسه يخوف اي حد ملوش في الكلاب، لكن بردو مش هيكون حارس مثالي.








طبعا كلب مفيش حد ميعرفوش، وبيعتبر أفضل خيار للتربية في المنزل بعد الجولدن واللابرادور لتميزه بحس الحراسه وصفاته الكتيره اللي عايزه مجلدات علشان نتكلم فيها.





مميزاته:





1-
سهل جدا في تدريبه و تربيته، درجة ذكاءه عاليه جدا جدا، بيستوعب التدريبات و الأوامر بسرعة كبيرة يعني مناسب لأي حد ملوش خبرة في الكلاب.



2- كلب نشيط ومرح ومحب لأصاحبه جدا جدا.

3- وفي لأصحابه بصورة رائعة.

4- شرس وحارس يقظ و مثالي جدا.

5- شكله جميل وطبعا بيميل ليه الولاد أكتر من البنات لان شكله بيوحي بالقوة و الشراسه مع الجمال.

6- حجمه بردو مش كبير اوي بصورة تعوق تربيته في المنزل.

7- كلب حنون جدا مع الأطفال وسهل تربيته معاهم ومفيش خوف منه عليهم ابدا بالعكس انت تطمن على اطفالك مع الجيرمن تماما.

8- سهل تربيته مع اي حيوانات اليفه أخرى بشرط انك تعوده على كده من الصغر.



عيوبه:



1- فروته وشعره في انواع منه بتكون كثيفه ومحتاج عناية واهتمام دوري من تمشيط و استحمام.






3- بردو بيحب النباح وصوته عالي اوي. 4- محتاج تدريب و الخروج بيه يوميا في نزهات طويله للمحافظة على لياقته و صحته. 5- غيور وبيحب صاحبه اوي، ولو صاحبه اهمله او انشغل بيه ممكن يعمل اي حاجة علشان يجذب انتباهه. 6- غالبا هيكون له صاحب واحد بس في المنزل بيخلص ليه جدا، وبردو هيكون عارف الباقيين وبيخلص ليهم، لكن بيعشق واحد فقط. 2- لو لم تتم السيطره على شراسته ممكن يكون مؤذي وخصوصا للغرباء.





4- البوكسر (Boxer):









البوكسر من ألطف الكلاب اللي ممكن تربيتها في المنزل، بس عيوبه في المنزل بتطغى على مميزاته خصوصا بالنسبه لطريقة حياتنا كمصريين و عرب.





مميزاته:




1- ذكي جدا جدا، وسهل- في تدريبه وتلقينه اساليب وحيل جديده.
2- كلب حيوي وشقي ومرح وظريف جدا جدا، خصوصا انه بيصدر صوت مضحك جدا لما يكون فرحان وسعيد.
3- فروته قصيرة ومش محتاجه عناية كبيره.
4- نباحه قليل ومش مزعج زي الجولدن و اللابرادور و الجيرمن.
5- مثالي لأي شخص بيمارس رياضة الركض او الهرولة لانه بيحتاج يبذل مجهود للمحافظة على رشاقته.
6- كلب شرس جدا وممكن تشريسه مع الغرباء او الحيوانات، وعامة حارس مثالي.
7- ودود جدا مع الأطفال بس بسبب شقاوته ممكن يسبب ليهم أضرار، لذلك لا ينصح بتركه فترات طويله معاهم من غير مراقبة.



عيوبه




1- نشيط و حيوي بصورة ممكن تكون مدمره خصوصا انه بيقفز بقوائمة الاربعه في نفس الوقت و قفزته عاليه ممكن توصل لمتر ونص، وطبعا بالشكل ده هتلاقيه بسهوله فوق اي حاجة عندك في البيت لو متمتش السيطره على افعاله بصورة صحيحه.








2- عنيد بعض الشيء لو تم تدريبه بصورة خاطئه او تم الافراط في تدليله. 3- محتاج نظام رياضي خاص للمحافظة على رشاقته وصحتة. 4- شكله لبعض الناس غير محبوب وخاصة البنات. 5- علشان يكون شكله حلو خاصة للهواة بنضطر نعمل له عملية قص الذيل و وتقويم الاذن اللي بتكون مكلفة شويه. 6- محتاج شخص له خبرة في التدريب علشان يقدر يسيطر عليه ويدربه بصورة صحيحة. 7- غيور جدا جدا على صاحبه ولو صاحبه اهمله وانشغل عنه بحيوان تاني غالبا بيتجه لتخريب اي حاجة لجذب انتباه صاحبه. 8- لو في حيوان تاني في المنزل لازم يتعود عليه منذ صغره علشان ميكونش شرس معاه.




5- الرودفايلر (Rottweiler):









طبعا من الكلاب اللي ليها شعبيه كبيرة اوي والكل بيحبه لصفاته الرائعة، وهو اساسا من كلاب الرعي و بيستخدم في الحراسه ومن أفضل كلاب الحراسه في العالم.





مميزاته:





1- كلب وفي لصاحبة لأبعد الحدود لدرجة انه ممكن يموت نفسه في سبيل صاحبه.






2- ذو بنية جسدية قوية جدا بتأهله يكون حارس مثالي جدا. 3- مناسب جدا للذكور لما يوحي به شكله من قوة و هيبة ووقار. 4- ذكي جدا واستيعابه عالي لأي اوامر او تدريبات جديده. 5- حنون جدا مع الأطفال، لكن نظرا لقوته و ضخامته ممكن يأذي الأطفال بغير قصد. 6- لا ينبح كثيرا وهادي جدا في اوقات فراغه.



عيوبه:

















6- البيت بول (Pitbull):
1- محتاج اهتمام و رعاية كبيرة، خصوصا في التدريب لأنه كلب مليء بالعضلات ولازم يتعمل له برنامج تدريب سليم، وطبعا لازم يخرج كل يوم ويجري علشان يبدد الطاقة الزايده في جسمه. 2- عنيد جدا ودماغه ناشفه ومحتاج شخص تكون له خبره كبيرة اوي في تربية الكلاب ولا ينصح بيه بتاتا لأي مبتدئ. 3- نظرا لضخامه بنيته فبيكون محتاج تغذيه خاصه و مكلفه. 4- شرس لأبعد الحدود مع الغرباء وخطر جدا عليهم وممكن يعمل مصايب مع اي غريب وصعب جدا انه يتأقلم مع كل البشر، يعني باختصار لو حد جالك حتكون مضطر انك تحبسه قبل ما اي مخلوق غريب يدخل البيت. 5- لازم تجيبه جرو صغير في حدود شهرين بالكتير علشان تقدر تسيطر عليه صح. 6- لا ينسجم بسهولة مع الحيوانات الأليفه. 7- كتير من الناس بتشوفه كلب ممل في البيت لأنه لما بيكون في البيت بيفضل صامت وساكت ومش بيلعب او يتنطط.








طبعا الكلب ذو السمعة السيئه و المظلوم أبدا، كل الناس فاكره انه كلب مصايب و بس، لكن الكلب له مزايا كتير اوي وعلى عكس ما كل الناس فاكراه.





مميزاته:



1- حجمه صغير في المنزل يعني مش بياخد مساحه كبيره.








2- فروته قصيره ومش محتاج عنايه كبيره من استحمام و تنظيف زي الجولدن و الجيرمن مثلا. 3- قليل النباح جدا جدا بالكاد بيطلع له صوت ودي من اهم مميزاته. 4- هادي جدا في اليت ومش بتاع مشاكل، وطول ما صاحبه مشغول عنه بيفضل انه ينام ومش بيعمل اي قلق. 5- كلب مناسب لأي شخص رياضي لانه لازم يتدرب تدريبات عنيفه و ويوميه للمحافظة على رشاقته و لياقته. 6- أفضل حارس ممكن تجيبه سواء حراسه شخصيه او للمنزل. 7- كلب ذكي جدا جدا جدا، ودرجة استيعابه عاليه وبيتعلم الاوامر و التدريبات الجديده بسرعه فائقة. 8- حنون لأقصى درجة مع الأطفال ومع صاحبه، لكن بردو علشان بنيته القوية لا يفضل تركه مع الأطفال لوحده. 9- مخلص لأبعد الحدود لصاحبه وممكن يموت نفسه دفاعا عن صاحبه ويحميه باي شكل.




عيوبه:






1- كلب عنيد ومحتاج شخص ذو خبرة كبيره في تربية الكلاب للسيطره عليه. 2- تدريبه صعب جدا للمبتدئين ولازم تكون خبرتك كبيره في التدريب. 3- لازم تجيبه أقل من شهرين علشان تقدر تسيطر عليه و تربيه صح لان لو سنه كبير مفيش امل انك تغير طباعه. 4- شرس جدا جدا مع الغرباء ومع الحيوانات الأليفه، وعامة شراسته ممكن السيطره عليها لكن لازم من بدري جدا وبردو مش ممكن تأمن انك تسيبه مع اي غريب. 5- محتاج اهتمام ورعاية خاصه علشان التدريبات الرياضيه العنيفه اللي محتاجها يوميا، ومحتاج تفرغ للاهتمام بيه. 6- لو استخدم في الحراسه لازم الناس كلها تكون عارفه انك مربي بيت بول لان لو حد غريب دخل تأكد انه هيطلع جثه او على احسن تقدير بعاهة مستديمه ودي طبعا مشكلة كبيرة. 7- محتاج نظام غذائي دقيق و صارم للمحافظه على لياقته و صحته. 8- غير مناسب اطلاقا للبنات لصفاته الصعبه. 9- سمعته في العالم سيئه جدا وناس كتير هتخاف منه وهتخاف تدخل بيتك لو عرفت انك مربي بيت بول فيه وفي اماكن ودول كتير ممنوع دخول البيت بول فيها. 10- مكلف ماديا لانه محتاج تدريب و نظام غذائي وأدوات للتدريب، بس النقط دي طبعا مميزات لأشخاص كتير هوايتهم الرياضه و الحاجات دي، يعني الامور دي بتكون مصدر امتاع ليهم.





7- الجريت دان أو بالمصري الدانواه (Great Dane):









كلب كلنا عارفينه و بنحبه جدا جدا لان شخصيته لذيذه اوي





مميزاته:





1- كلب سهل في تدريبه و تربيته وتعليمه اوامر جديده 2- فروته قصيره وسهل العناية بيها. 3- نباحه قليل وغير مزعج ابدا. 4- كلب حنون و عطوف جدا جدا ومحب لصاحبه جدا وغير مؤذي بالمره و غير شرس. 5- بنيته الجسديه ضخمه وبتوحي بالهيبه والوقار ومخيف لاي حيوان غريب مع انه طيب جدا.




عيوبه:





1- غير شرس بالمره ولا يمكن الاعتماد عليه في الحراسه.





2- حجمه ضخم جدا ومن الصعب تربيته في المنزل لاحتياجه مكان كبير للمعيشه وكمان بيحتاج كميات كبيرة من الطعام. 3- ضخامته بتخليه خطر على الأطفال. 4- كلب غير محب للعب و الشقاوة اوي وده بيخليه ممل لبعض الناس وناس تانيه بتشوف دي ميزه. 5- درجة ذكائه أقل من الانواع السابقة.







دول كانو أهم انواع ممكن تربيهم في البيت، في انواع طبعا تانيه كتير جدا، وانا استثنيت كلاب الزينه من الموضوع تماما لأنها اصلا كلاب بيت فمش هتكلم عنها، وفي انواع زي الماستيف و الدوجو ارجنتينو والكان كورسو والبولدوغ والمالينوا بيكون ليها معاملة خاصه وصعب تربيتها في المنزل من قبل اي حد، ده غير انها انواع غير شائعة، وعامة ممكن نقول ان الماستيف و الدوجو و زي البيت بول تقريبا في حاجات كتير و البولدوغ زي الرودفايلر و المالنيوا له معاملة خاصة وخطر تربيته في البيت.


__________________
DA ANA BA3D EL TA3DEL

 
اخر مواضيعى

0 ابه احسن اسكوتر في السوق ؟؟؟؟
0 للبيع جنط BBS " italy " 16
0 للبيع جنط bbs 16
0 عفشة kyp كاملة للبيع " جين - بيرسونا "
0 عفشة kyp و جنوط bbs

 
m.3abdel3al غير متواجد حالياً  
قديم 17-10-2009, 06:06 PM   #3
عضو ذهبي
 
الصورة الرمزية m.3abdel3al
البيانات الشخصية
مواضيعي / ردودي
الحالة
m.3abdel3al غير متواجد حالياً

حاصل على الاستيكر
الإعجاب بالمشاركات
شكرًا (أرسل): 0
شكرًا (تلقى): 5
معجب بمشاركة (أرسل): 0
معجب بمشاركة (تلقى): 6

افتراضي

2- العمر المناسب لإحضار الكلب للمنزل:

تاني نقطة مهمة في موضوعنا هي نجيب الجرو في اي عمر؟ وبما اننا بنتكلم عن معيشة الكلب في بيت فدي هتحط ادامنا بعض القيود، لان الكلب علشان يتعود على المعيشه في بيت لازم يكون عمره صغير، وهنقسم الكلاب لمجموعات كل مجموعة ليها نفس المعاملة:



1- الجولدن ريتريفر و اللابرادور:

أفضل عمر لاقتناء النوعين دول في سن 3 شهور، علشان الجرو يكون قابل للتدريب، أقل من كده الجرو مش هيستجيب لحاجة وهيكون مصدر ازعاج وأكبر من كده هنواجه صعوبة في تدريب الجرو و تعويده على قوانين المنزل.


2- الجيرمن شيبرد و الجريت دان:

الجيرمن له معامله خاصه لانه كلب سهل تدريبه جدا، وعامة أفضل سن لجرو الجيرمن بيكون بردو عند سن 3 شهور لكن ممكن لغاية 6 شهور مفيش مشاكل، وممكن بردو من اول شهرين بس هنتعب معاه حاجة بسيطه خصوصا في موضوع الحمام و النوم، ونفس الكلام ينطبق على الجريت دان.


3- البوكسر و الرودفايلر:

أفضل عمر للنوعين دول من سن شهرين ل 3 شهور علشان نقدر نسيطر على افعالم ونعلمهم قواعد المنزل بسهولة، وخاصة ان البوكسر حيوي جدا و الرودفايلر لو جبناه اكبر من كده هيعمل مشاكل ومش هيأتلف الناس بسهولة وممكن يكون مصدر ازعاج مدى العمر.


4- البيت بول:

البيت بول بالذات لازم نجيبه اقل من شهرين، يعني من شهر ونص لشهرين بالكتير، أكتر من كده هندخل في مشاكل ملهاش حل، لكن جيل شهرين مناسب جدا للسيطره على شراسه البيت بول وتطويعه للمعيشه في المنزل و تعويده على قوانين المنزل.

طبعا يا شباب لازم نحط في الاعتبار ان الجراوي لغاية سن 3 شهور بتكون محتاجة معاملة خاصه، يعني تغذيه معينة و لازم نصبر عليها في موضوع الحمام لانها مش بتقدر تتحكم في المثانه و المستقيم ده غير موضوع النوم، لازم نهيأ للجرو مكان مناسب للنوم من تدفئه وراحه وحاجات من دي، وطبعا كله لسه هنتكلم فيه باستفاضه.

حاجة تانيه احب اركز عليها، ان الكلام ده خاص لو انك هتربي الكلب في البيت، يعني مش معنى كلامي ان اي حد عايز يجيب رودفايلر مثلا لازم يجيبه جرو صغير كده، انما الكلام موجه للي هيربي في البيت وداخل الشقه فقط، وتفرق اوي لو بيتك بحديقه وهتربي الكلب بره، ساعتها يبقى انت بره حدود الموضوع. اتمنى تكون المعلومه وصلت.


ودي صور جراوي كل نوع من الأنواع اللي اتكلمت عليها سابقا:

الجولدن ريتريفر:



اللابرادور ريتريفر:



الجيرمن شيبرد:



البوكسر:



الرودفايلر:



البيت بول:



الجريت دان:



__________________
DA ANA BA3D EL TA3DEL

 
اخر مواضيعى

0 ابه احسن اسكوتر في السوق ؟؟؟؟
0 للبيع جنط BBS " italy " 16
0 للبيع جنط bbs 16
0 عفشة kyp كاملة للبيع " جين - بيرسونا "
0 عفشة kyp و جنوط bbs

 
m.3abdel3al غير متواجد حالياً  
قديم 17-10-2009, 06:08 PM   #4
عضو ذهبي
 
الصورة الرمزية MoToRiZeR
البيانات الشخصية
مواضيعي / ردودي
الحالة
MoToRiZeR غير متواجد حالياً

 غير حاصل على الاستيكر
الإعجاب بالمشاركات
شكرًا (أرسل): 0
شكرًا (تلقى): 4
معجب بمشاركة (أرسل): 0
معجب بمشاركة (تلقى): 18

افتراضي

انا مليت المنتدي هوهوة للسؤال عن سعر جرو الجولدن ريتريفر و محدش رد عليا .. رد عليا إنت بقي

__________________

Leadership is based on inspiration, not domination
 
اخر مواضيعى

0 فولكس واجن مصر تطلق صفحتها الرسمية علي فيس بوك
0 عايز اغير جو .. اروح قين؟
0 للبيع بلاك بيري 8052 لم يلمس بتاريخ شراء اليوم
0 حد متابع مسابقات صفحة كيا علي فيس بوك؟
0 مطلوب Data Entry Specialist

 
MoToRiZeR غير متواجد حالياً  
قديم 17-10-2009, 06:08 PM   #5
عضو ذهبي
 
الصورة الرمزية m.3abdel3al
البيانات الشخصية
مواضيعي / ردودي
الحالة
m.3abdel3al غير متواجد حالياً

حاصل على الاستيكر
الإعجاب بالمشاركات
شكرًا (أرسل): 0
شكرًا (تلقى): 5
معجب بمشاركة (أرسل): 0
معجب بمشاركة (تلقى): 6

افتراضي

3- أول يوم لكلبك في المنزل:

النقطه التالته في الموضوع يا شباب هي أول يوم للكلب في المنزل، ومن وجهة نظري دي أهم نقطه لأنها لحظة بناء الثقه بينك و بين الجرو، وهيترتب عليها حاجات كتير أوي، و اليوم ده هناقشه من محورين، الأول هو الاستعداد لليوم ده و التاني هو من بداية وصول الجرو للمنزل.

الاستعداد لإحضار الجرو اللمنزل:

طبعا تربية كلب في البيت عملية مش بسيطه في بدايتها، وممكن تتعب معاه شهور لغاية ما تظبط كل حاجة معاه، بس في المقابل المتعة اللي بتحصل عليها بتساوي اضعاف التعب ده، ودي مجموعة من النقط الواجب مراعتها قبل احضار الجرو للمنزل:

1- لازم يكون جميع أعضاء المنزل متقبلين الموضوع نفسيا وحابينه ومحدش عنده اعتراض عليه.
2-- لازم يكون عند جميع افراد المنزل عارفين المجهود اللي هيبذل مع الكلب من البداية و بصورة واضحه جدا علشان مش نقابل مشاكل بعدين تأثر على شخصية الكلب و يكون صعب تقويمها.
3- يفضل ان جميع افراد المنزل يقرأوا معلومات عن تربية الكلاب ونوعية الكلب اللي هيتم احضاره و شخصيته وطباعه.
4- تجهيز مكان نوم الجرو وده موضوع هناقشه بالتفصيل بعدين.
5- الاستعداد بطعام للكلب وكمان الاستعداد بالمكافئات علشان نضمن سرعة في التدريب و التربية، و بردو الطعام و التدريب على قوانين المنزل دي نقطه منفصله تماما هيتم شرحها بالتفصيل.
6- تجهيز العاب للكلب الصغير لأن كل الكلاب محتاجه تلعب علشان تنمي قدراتها و ادراكها و استيعابها.
7- الاتفاق على احد المنزل ليكون هو صاحب الكلب في حين ان بقية الافراد هيكونوا اصحاب ليه، بمعنىي آخر واحد هيكون هو صاحب الكلب المباشر وبقية الافراد الكلب هيكون عارف انهم اهل البيت بردو وهيسمع كلامهم بس مش هيعارض كلام صاحبه الاساسي، ودي مهم جدا علشان ننمي حس الانتماء عند الكلب.
8- يفضل وقت احضار الجرو يكون جميع افراد المنزل متواجدين، وكمان يفضل يكون تاني يوم ليك اجازة علشان تقدر تراعي الجرو كويس.
9- لا يفضل احضار الجرو بالليل او في الصباح الباكر علشان تقدر تقضي معاه وقت كويس وتزيل رهبة المكان الجديد من عنده، وكمان نتيح فرصه للجرو انه ينام بعد ما يعتاد نسبيا على اسرته الجديده .
10- الاستعداد بأدوات التنظيف علشان نزيل فضلات الكلب لانه طبيعي هيعمل حمام اول ما يدخل البيت، علشان مش نلخم نفسنا اول ما الكلب نعلمها.


بعد وصول الجرو للمنزل:

هنا بقى ندخل على المهم، الكلب يا جماعه اول ما هيدخل البيت هيعمل حاجة من اتنين، ياما هتلاقيه فرحان و مزقطط وعمال يهوهو ويجري في كل مكان وده طبيعي ولازم نسيبه يعمل كده علشان ياخد على المكان كويس، وفي نفس الوقت يستحب ان الكل يلاطفه ويلعب معاه ويحسسه بالامان. وعامة الكلب اول ما بيدخل مكان جديد هيعمل حمام، فدي حاجة مش تزعل خالص وطبعا بلاش ندي اي رد فعل عنيف في اول مره دي لان ده طبيعي جدا علشان الكلب يعلم مكانه الجديد.

ونوعية تانيه من الكلاب هتلاقيها منطويه جدا على نفسها اول ما تدخل البيت، والنوعية دي لازم مش نحاصرها كلنا، بالعكس صاحب الكلب بس هو اللي يقرب من الكلب ويحاول يكسب ثقته، والباقيين يتجاهلو الكلب تماما لغاية ما نبني الثقه بين الكلب و بين صاحبه، وبعد كده هنبتدي نقربه من بقية افراد المنزل بس بهدوء وبدون عصبيه

وطبعا اول 3 ايام للكلب في البيت ولغاية ما نبني الثقه بينه و بين صاحبه محدش هيزعق للكلب ولا يتعامل معاه بعنف او يوبخه بتاتا غير صاحبه، علشان الكلب مش يهاب الاسره وينطوي على نفسه زياده. وصاحبه بردو يحاول يقلل من التوبيخ لغاية ما يبني ثقه بينه و بين الكلب.

بعد اول ساعتين للكلب في البيت نحاول ناخده المكان اللي حاطين له الاكل فيه ونوقفه هناك شويه علشان يعرف ان ده مكان الاكل و الماء، وبالطبع مش هياكل لان المكان جديد عليه بس هيكون عرف ان في طعام في المكان.

والتودد للكلب هيكون يا جماعه بانك تجيب له قطع صغيره من اللانشون او بسكوت الكلاب وتحاول تقرب العلاقه بينك و بينه بانك تديله قطع صغيره علشان يحس انك بتحبه، ولو الكلب خاف منك مش تزعل، سيبه نص ساعه براحته ومش تديله اهتمام وبعدين ترجع تاني تتودد له، وهتلاقي نتيجه سريعة ان شاء الله.

بعد فتره هنلاقي الكلب عايز ينام خصوصا لو كان جرو صغير في سن شهرين، هنا هناخد الكلب لمكان النوم اللي جهزناه ليه، وهيكون المكان عباره عن وساده كبيره و نظيفه وتكون موضوعه في حاجة ليها حواف كبيره يعني زي كانه سرير بحواجز مثلا، علشان الكلب يحس بالأمان، ويفضل طبعا لو كان وساده كلاب من الجاهزه. وكمان صاحب الكلب لازم يفضل جنب الكلب اول يوم وهو نايم علشان الكلب يحس بالامان ونقرب المسافه بينه و بين صاحبه.

1

__________________
DA ANA BA3D EL TA3DEL

 
اخر مواضيعى

0 ابه احسن اسكوتر في السوق ؟؟؟؟
0 للبيع جنط BBS " italy " 16
0 للبيع جنط bbs 16
0 عفشة kyp كاملة للبيع " جين - بيرسونا "
0 عفشة kyp و جنوط bbs

 
m.3abdel3al غير متواجد حالياً  
قديم 17-10-2009, 06:09 PM   #6
عضو فضي
 
الصورة الرمزية amrico
البيانات الشخصية
مواضيعي / ردودي
الحالة
amrico غير متواجد حالياً

 غير حاصل على الاستيكر
الإعجاب بالمشاركات
شكرًا (أرسل): 79
شكرًا (تلقى): 60
معجب بمشاركة (أرسل): 62
معجب بمشاركة (تلقى): 177

افتراضي

شكرا على الموضوع

بس انا شكلي هاقوم اتوضأ تاني الموضوع ده ينقض الوضوء

(انا بهزر معاك وشكرا على مجهودك)

__________________
 
اخر مواضيعى

0 احسن مكان تأجير سيارات في المهندسين ومتوسط اسعار
0 رسالة من عضو قديم في نايل موتورز (يا خسارة)
0 المساعدة في تقييم سعر جولف 2012
0 المساعدة في تقييم سعر جولف 2012
0 قد نراها فوضى لكنها في عيون الأطفال قمة الإبداع وعالمهم الخاص

 
amrico غير متواجد حالياً  
قديم 17-10-2009, 06:11 PM   #7
عضو ذهبي
 
الصورة الرمزية m.3abdel3al
البيانات الشخصية
مواضيعي / ردودي
الحالة
m.3abdel3al غير متواجد حالياً

حاصل على الاستيكر
الإعجاب بالمشاركات
شكرًا (أرسل): 0
شكرًا (تلقى): 5
معجب بمشاركة (أرسل): 0
معجب بمشاركة (تلقى): 6

افتراضي

4- مكان قضاء الحاجة:

طبعا أكتر حاجة بيعاني منها أي حد بيربي كلب في بيته هو مكان قضاء الحاجة، خصوصا ان الكلاب مزعجة جدا في الموضوع ده على عكس القطط، وأحب انبه على حاجة ان مفتاح الموضوع ده هو الصبر والصبر ولا شيء غير الصبر. ولتعويد الكلب على قضاء حاجته في الحمام أو في مكان معين مكن نتبع كذا طريقه بس من خلال تجاربي لأني طول عمري كلابي عايشه في البيت وعمري ما ربيت كلب بره البيت بحب اجمع الطرق كلها في طريقة واحده والحمد لله اثبتت نجاحها مع كل الكلاب حتى مع العنيد منها، وبسم الله نبتدي الأول بشوية معلومات ضروريه عن فسيولوجيا الكلاب قبل مناقشة الطرق.

الكلاب يا جماعة لغاية عمر 3 أو 4 شهور مش بتقدر تتحكم في عضلات المثانه أو المستقيم، يعني ببساطه الكلب أول ما بيحس انه محتاج يعمل حمام بيعملها مكانه حتى لو كان بياكل ومش بيقدر يمسك نفسه، ودي نقطه مهمة جدا لان ناس كتير متوقعه ان الكلب علشان شكله كبير -خصوصا مع الكلاب زي الجيرمن- يبقى خلاص لازم يروح الحمام ولو معملش واستجاب للتدريب يبقى غبي، طبعا ده مفهوم خاطئ جدا. ولازم نحط الكلام ده في اعتبارنا قبل اي تدريب.

الكلام ده ميمنعش اننا نعود الجرو من اول يوم ليه في البيت على الحمام، لكن منتوقعش استجابه سريعه الا بداية من عمر 4 شهور أو 5 شهور، وحتى في كلاب بتوصل لسن 6 شهور ولسه ماتعلمتش، ودي كلها متقلقش حد.

حاجة تانيه لازم نعرفها، ان الكلب بيعمل حمام بعد الاكل بفتره تتراوح من 10 ل 30 دقيقه وبيعمل حمام بعد مده من اللعب تستمر 15 ل 30 دقيقه، يعني نتوقع لو لعبنا مع الكلب مده 15 دقيقه انه هيعمل حمام، وعلامات احتياج الكلب لقضاء الحاجة انه تلاقيه بيشمشم في الارض بحركات دائريه وبعدين يقف في مكانه ويبتدي يعمل الحمام. وكمان الكلب اول ما بيصحى من النوم بيعمل حمام وغالبا بيكون بول، ودي حاجة مهمة بردو لازم تكون في بالنا.

طبعا زي ما كلنا عارفين الكلب بيحدد مكان قضاء حاجته بالرائحه، وغالبا بياخد لنفسه مكان يعمل فيه الحمام، وده بنسميه ال hot spot او النقط الساخنه، والمشكلة كلها بتتركز في كيفية تغيير النقط دي، وهشرح ليكم الطريقة اللي جربتها اكتر من مره وجابت نتيجة سريعة.

قبل أي حاجة لازم ننظم مواعيد وجبات الجرو، مع مراعاة ان الوجبات يكون فيها شوربه في الفطار و الغداء علشان زي ما بنقول بالعاميه كده بطن الكلب تمشي، ويعمل حمام بسرعة بعد الاكل، و في العشاء نحاول نخلي الوجبه من غير شوربه لو كنت هتنام على طول بعد اطعام الكلب. تنظيم الوجبات ده بينظم عمليات الايض ( التمثيل الغذائي) و الاخراج عند الكلب وده مهم من نواحي كتير جدا بس حاليا بنتكلم عن الاخراج، بكده انت هتنظم مواعيد الاخراج عند الكلب وده المهم.

أكيد الكلب في المراحل الاولى هيعمل حمام كتير وفي اماكن كتيره و المطلوب اننا نلاحظ الاماكن دي، واول ما الكلب يعمل في مكان ننضف المكان ده كويس، باي مادة تنظيف ميكونش في مكوناتها مادة الامونيا لأن ريحتها زي ريحة البول. في مزيج ظريف كده كنت باستخدمه وكان بيجيب مفعول اكيد، وهو انك تخلط الماء مع شوية كلور وديتول و اي مادة منظفه للارضيات -لو الارض عندك سيراميك- وصابون سائل بس يكون معطر اهم حاجة علشان يزيل الروائح الكريهة، وتنضف المكان اللي عمل فيه الكلب بالمزيج ده. وطبعا لو كان براز تشيل البراز وتحطه في المكان اللي عايز الكلب يعمل فيه وتسيبه هناك.


ولما نحدد اي hot spot ننضفها كويس وبعدين نسمحها كويس بالخل علشان نضمن ان الرائحه راحت منها تماما، وبعدين نرش عليها فلفل اسمر كتير، لان الكلب هيحاول يرجع ليها ولما يشمشم فيها ريحة الفلفل الاسمر هتتعبه اوي وهيعرف ان ده مش مكان قضاء الحاجة.


نيجي بقى للشغل العملي، بعد كل وجبه بفتره لا تزيد عن 10 دقايق لازم ناخد الكلب للحمام، ونسيبه هناك لغاية ما يعمل حمام، طبعا مش نسيبه ساعتين تلاته لو معملش، ويفضل انك تدخل الحمام معاه و تشجعه انه يعمل حمام، بانك تقول له "اعمل حمام" او "pee" او اي كلمة تانيه انت حابب تستخدمها، ولما الكلب يعمل حمام نظهر له السعاده ونكافئه باي قطعة بسكوت كلاب او قطعة لانشون مثلا، ونفس الكلام اول ما الكلب يصحى من النوم وبعد كل فتره لعب مدتها 20 دقيقه. ويفضل ان تعود الكلب على كلمه علشان مش يحرجك لما يكبر بانه يعمل حمام مثلا في الشارع او في مكان مش صح.


طيب اكيد هنصادف اوقات كتيره ان الكلب يعمل حمام في خارج الاوقات دي وده طبيعي. لو انت شفت الكلب بيعمل حمام في مكان خطأ اياك و الضرب، كل اللي تعمله لو قفشته بيعملها انك ترفع احد رجليه الخلفيه وتزعق له بصوت حاد يبان فيه الغضب وتاخده فورا على الحمام قبل ما تنضف المكان، وتحمسه انه يعملها في الحمام، ولما يعملها تكافئه وبعدين تنضف المكان وهو مش شايفك.


ولو الكلب عملها وانت مش شايفه اياك و العقاب او التوبيخ لان الكلب مش هيعرف انت بتوبخه ليه، بكل بساطه تنضف المكان زي ما قلت قبل كده، ولو براز تشيله وتحطه في الحمام وتاخد الكلب على الحمام تشممه البراز و تخرجه تاني.


في ناس كتير جربت انها تحط في ال hot spot ورق جرايد ولما الكلب يعملها تشيل ورق الجرايد وتحطه في الحمام علشان الكلب يعرف المكان بالريحه بس بصراحه الطريقه دي عمرها ما نفعت معايا لكن مفيش مانع من التجربه طبعا.


نيجي بقى للجراوي اللي سنهااقل من 4 شهور، في العمر ده هنلاحظ ان الجرو في وسط نومه محتاج يعمل حمام، فبيفضل انك تاخد الجرو بعد ما ينام 5 ساعات وتدخله الحمام علشان يعمل حمام و ترجعه تاني، وبكده نحافظ ان الكلب ميتعودش على اي hot spot او انه يعملها بره الحمام.

في حاجة بقى مهمة، الكلاب لما بتبتدي تتحكم في المثانه هنلاحظ حاجة غريبه شويه، ان الكلب ممكن تلاقيه وهو بيلعب او بيتحرك بينزل نقط من البول، ده طبيعي ومش مقلق خالص لانه بيكون عايز يعمل حمام وبيحاول يمسك نفسه، لو عمل كده مش نقلق خالص ولا ناخده على الحمام في ساعتها، بالعكس نسيبه شويه علشان ننمي جواه الموضوع ده، وبعدين ناخده على الحمام، علشان يتعود يمسك نفسه كويس.


طبعا نفس الكلام ده هنطبقه لو عايزين الكلب يعلمها بره البيت، بدل ما ناخده الحمام هناخده بره البيت، يعني انا مثلا الكلب بتاعي طول ماحنا في البيت بيعمل في الحمام بدون مشاكل، واول ما نخرج متعود يعملها في الشارع قبل ما نركب العربيه، وبردو بيعمل حمام في الشارع قبل ما نطلع، هو الموضوع موضوع صبر ومثابره لا اكثر ولا اقل.

__________________
DA ANA BA3D EL TA3DEL

 
اخر مواضيعى

0 ابه احسن اسكوتر في السوق ؟؟؟؟
0 للبيع جنط BBS " italy " 16
0 للبيع جنط bbs 16
0 عفشة kyp كاملة للبيع " جين - بيرسونا "
0 عفشة kyp و جنوط bbs

 
m.3abdel3al غير متواجد حالياً  
قديم 17-10-2009, 06:15 PM   #8
عضو ذهبي
 
الصورة الرمزية m.3abdel3al
البيانات الشخصية
مواضيعي / ردودي
الحالة
m.3abdel3al غير متواجد حالياً

حاصل على الاستيكر
الإعجاب بالمشاركات
شكرًا (أرسل): 0
شكرًا (تلقى): 5
معجب بمشاركة (أرسل): 0
معجب بمشاركة (تلقى): 6

افتراضي

5. تغذية الكلاب



في النقطه الخامسه يا شباب هتكلم عن تغذية الكلاب سواء كانت جراء أو كلاب بالغه، والموضوع ده له أهمية كبيره جدا لأن التغذية السليمة بتضمن لكلبك صحة كويسه وكمان بتزود من معدل العمر (طبعا الأعمار بيد الله سبحانه وتعالى لكن احنا بناخد بالاسباب). وموضوع التغذية هنقسمه ل 3 عناوين رئيسية:


1. معلومات عامة عن التغذية:

طبعا لازم في الأول نفهم ان تغذية الجرو غير تغذية الكلب البالغ غير تغذية الكلب اللي بيتمرن تمارين رياضيه عنيفه، ده غير ان في انواع معينة من الكلاب ليها نظام مختلف في التغذية، ولازم قبل ما نفكر نعمل أكل للكلب نكون عارفين بالظبط الكلب بتاعنا ايه نظام تغذيته.
وفي 3 أنواع من الغذاء ممكن نعتمد عليهم:





الطعام الجاف (Dry Food):


وده عبارة عن مجموعة من الفيتامينات و الدهون و مسحوق العظام و اللحوم المجففه مضاف ليها معادن وكربوهيدرات و أملاح بنسب مدروسه صح، بتكون مخلوطه خلط جيد مع بعض ومجففه و على شكل كرات صغيره (زي البلي) أو مشكلة على شكل عظام صغيره جدا. والطعام الجاف ده مفيد جدا خاصة انه بيمنع زيادة الوزن وكمان بيقدم للكلب كل العناصر اللي ممكن يحتاجها وخاصة الأملاح لأن ناس كتير بتنسى اضافة الملح للطعام وده احيانا بيأدي ان الجرو وهو صغير ياكل برازه لتعويض الأملاح، وكمان الطعام الجاف مفيد لأسنان الكلاب من ناحية انه بيزيد من حدتها وبيقوي عضلات الفك، وكمان بيعمل على تنظيف الأسنان.
وعيب الطعام الجاف ان سعره مرتفع جدا، وأكتر نوع مشهور هو Nutro وكان سعره 300 جنيه للكيس ال 20 كيلو، بس في زميل لينا في المنتدى كان جاب رابط قبل كده من بيؤكد ان النوع ده بالذات بيجيب سرطانات وتسبب في موت كلاب كتير. وحاليا منظمه ال FDA معترضه عليه. وفي غيره طبعا أنواع كتيرأوي أغلبها موجود في كارفور و سبينز في القاهرة أو من المستورد في شارع فيصل في الجيزة.
الطعام الجاف في ناس كتير جدا بتفضل تعتمد عليه كغذاء أساسي للكلب بدون اي حاجة تانيه، لكن انا بصراحه ضد الموضوع ده لأنه بيحتوي على مواد حافظة و مكسبات طعم وكمان سعره مرتفع جدا، وغير كده انا باحب الكلب يعيش حياته طبيعي علشام ميفقدش اي حاجة من سماته اللي ربنا خلقها فيه.

الطعام المعلب المخصص للكلاب:

وده بردو بيكون عباره عن خليط من لحوم و عظام مطحونه و رز وفيتامينات و كربوهيدرات و أملاح ومكسبات طعم بس بيكون طعام معلب (زي البلوبيف) وبردو هو مفيد جدا لأنه مدروس بس انا بارفضه لارتفاع سعره ده غير ان ممكن الكلب يتعود عليه ويرفض اي طعام تاني غيره، وكمان لانه بيحتوي على مواد حافظة. لكن عامة ميزته هو الطعام المجفف انه مش محتاج اي تحضيرات وسهل جدا تقديمه ومش بيحتاج اي مجهود. علشان كده باكون مستعد بيهم هم الاتنين لان احيانا الواحد مش بيكون عنده وقت يعمل أكل للكلب.

الطعام المحضر في المنزل:

ده بقى المهم في الموضوع، طبعا لأن اغلبنا مادياتنا متسمحش اننا نصرف على أكل الكلب 400 جنيه في الشهر مثلا. والطعام المحضر في المنزل مميزاته انك بتكون عارف انت بتقدم ايه للكلب بالظبط وضامنه تماما، وكمان كل الأصناف بتكون طازجه ومفيش اي مواد حافظة ولا حاجة. وعامة تحضير الطعام للكلب في المنزل متعة لأنه بيقربك من الكلب و بيحس بيك وانت بتعمل له أكله وبيشم ريحته وهو بيستوي ودي بتزود الرابطه بينك وبينه لانه بيحس انك بتتعب علشانه وكمان بتعمل تشويق للكلب لما يفضل واقف جنبك مستني الطعام.


2. وجبات متنوعة للكلاب:

أنا هقسم هنا الوجبات زي ما قلت لإفطار و غداء وعشاء، لكن مواعيد التقديم وعدد الوجبات هتختلف حسب عمر الكلب و نوعه و الرياضه.



ملاحظات مهمة:

ا- الوجبة اللي فيها البيض نيء دي بالذات خاصة بالكلاب اللي بتتمرن تمارين قاسيه و عنيفه زي الروت و البيت بول ومينفعش تكون وجبة يومية ثابته يعني في الايام اللي تم تمرين الكلب فيها، وبتقدم بعد بلوغ الكلب عمر 6 شهور مش قبل كده لأن البيض النيئ هيكون خطر عليه.

ب- الوجبة اللي فيها ماسورة أو ريش طبعا مش وجبة اساسيه، يعني بنديها للكلب مره كل يومين او 3 ايام علشان نقوي عضلات فكه ده غير فايده العظام والنخاع للكلب، وطبعا العظام بتساعد على تقوية الاسنان، وكمان بتقلل من توتر الكلب ومن رغبته في العض.

ج- طبعا ممكن نستبدل وجة العشاء بالباقي من وجبة الغداء، بس ده ميكونش مستمر كل يوم وخصوصا لغاية سن 6 شهور.

2- وجبات متنوعة للكلاب.


3- عدد و مواعيد وطرق تقديم الوجبات.




3. عدد و مواعيد تقديم الوجبات:



وبالنسبه لتقديم الوجبات هيكون عليه شويه ملاحظات وهي كالآتي:

1- نراعي ان الوجبه متكونش لا سخنه اوي ولا بارده اوي.

2- بالنسبه للكبده بالذات نراعي انها تكون مرتين بالكتير في الاسبوع علشان مش نزود حمض اليوريك في جسم الكلب.

3- ياريت نبعد عن بواقي أكل المنزل اللي بتحتوي على كميات كبيره من الأملاح و الدهون والتوابل خصوصا لغاية سن 6 شهور.

4- عند وضع الاكل للكلب يفضل انك تدرب الكلب على انه يستنى لغاية ما تحط الاكل تماما في طبقه وبعدين تديله الامر انه يبتدي ياكل.

5- طبق الاقل يكون واسع ومش عميق جدا علشان الكلب يعرف ياكل فيه، ويكون ويكون ثقيل الوزن علشان مش يفضل يجري من الكلب وهو بياكل، وانا عن نفسي بافضل اطباق الفخار، و نراعي اننا نغسل الطبق بعد كل وجبة.

6- علشان نعود الكلب على انه ياكل اي حاجة، نحط له الاكل ولو ماكلش خلاص 20 دقيقه نشيل الاكل من ادامه ويقدم له تاني في معاد الوجبه التالية.

7- نحاول ننظم مواعيد الوجبات على اد ما نقدر علشان ننظم عمليات التمثيل الغذائي و الاخراج.

8- بلاش ندي الكلب اي وجبات اضافيه بين الوجبات الاساسيه، والمكافئات تكون بسكوت كلاب قطع صغيره او قطع لانشون صغيره.

9- دايما نوفر للكلب الماء النظيف اثناء الاكل لانه هيشرب على طول بعد الاكل. ونتأكد دايما من نظافة الماء وتغييره باستمرار.



__________________
DA ANA BA3D EL TA3DEL

 
اخر مواضيعى

0 ابه احسن اسكوتر في السوق ؟؟؟؟
0 للبيع جنط BBS " italy " 16
0 للبيع جنط bbs 16
0 عفشة kyp كاملة للبيع " جين - بيرسونا "
0 عفشة kyp و جنوط bbs

 
m.3abdel3al غير متواجد حالياً  
قديم 17-10-2009, 06:25 PM   #9
عضو ذهبي
 
الصورة الرمزية m.3abdel3al
البيانات الشخصية
مواضيعي / ردودي
الحالة
m.3abdel3al غير متواجد حالياً

حاصل على الاستيكر
الإعجاب بالمشاركات
شكرًا (أرسل): 0
شكرًا (تلقى): 5
معجب بمشاركة (أرسل): 0
معجب بمشاركة (تلقى): 6

افتراضي

6- مكان نوم الكلب في المنزل:

أهم حاجة في مكان نوم الكلب اننا نراعي انه ميكونش نايم على بلاط لأن البلاط بيجيب هشاشه في العظام للكلب، خاصة بالنسبه للجراوي الصغيره لازم نراعي النقطه دي كويس معاها.

ويفضل يكون مكان نوم الكلب على شيء مسطح و مستوي علشان نحافظ على تكوين العظام في الشهور الاولى، يعني ممكن نجيب قطعة خشب ونفرش عليها بطانيه خفيفه تكون ناعمه و طرية علشان الجرو الصغير

وفي وسائد خاصه بالجراء الصغيره بتتباع جاهزه في المحلات زي سبينز و كارفور في القاهره مثلا، بس عامة سعرها بيكون عالي شويه، يعني بتتراوح من 300 إلى 800 جنيه.

والكلب من أول سن 6 شهور ممكن نعوده ينام في بيت خاص بيه، أو حقيبه السفر الكبيره المخصصه لكلاب، ودي نقطه مهمة جدا لتعويد الكلب على حقيبه السفر علشان يسهل التنقل بيه. وممكن كمان بيت الكلب يتم صناعته خصيصا للكلب بدل من شرائه على ان نراعي انه يكون من الخشب و يكون لونه فاتح على اد ما نقدر، ويكون مرتفع على الارض بمقدار 15 سم لمنع وصول الحشرات بسهوله ليه، وكمان لازم يكون ارتفاعه أكبر من ارتفاع الكلب ب 40 سم وهو واقف.




ولازم نراعي بالنسبه للجراء الصغيره اننا نغير الفرش بتاع مكان نومه كل فتره صغيره ونراقبه لانه ممكن يكون قضى حاجته فيها، وكمان لازم نراعي نظافه مكان النوم كويس جدا وخلوه من الحشرات و الاوساخ. ويفضل اننا نقوم بتهوية ماكن النوم كل يوم لمده ساعتين صباحا في الشمس للقضاء على اي طفيليات او ميكروبات فيه.

ولازم الكلب يتعود من وهو صغير ينام في مكان مخصص ليه، لانه غالبا هيفضل ينام في حضن صاحبه علشان يحس بالأمان، بس مع مرور الوقت الكلب هيتعود ان مكان نومه على السرير، وطبعا ده مش صحي ابدا خاصة ان الكلب ممكن يكون في حشرات في وقت من الاوقات، وكمان الكلب بيغير شعره مرتين في السنه، وده هيسبب ان مكان نومنا هيكيون غير صحي بالمره.


والمكان اللي هنحط فيه سرير الكلب او وسادته لازم يكون مكان بعيد عن التيارات الهوائية المباشره، ويكون في ركن الغرفه، يعني في حائطين على الاجناب علشان الجرو الصغير يشعر بالأمان، ويكون المكان ده غير معرض لاضائة مستمره، ويكون بعيد عن اي مصادر للضوضاء المستمره، زي مثلا أجهزه التليفيزيون.

وفي الشتاء يفضل اننا نستعد بدفايه ضعيفه مش قويه علشان نحطها بالقرب من مكان نوم الجرو، واهم حاجة تكون الدفايه ضعيفه علشان مش تأثر سلبا على نمو عظام الجرو.

ودي صور لبعض وسائل نوم الكلاب، وهبتدي بالوسائد الخاصه بالجراء أو الكلاب ذات الحجم الصغير














ودي بيوت الكلاب الجاهزة








ودي حقائب السفر للكلاب








__________________
DA ANA BA3D EL TA3DEL

 
اخر مواضيعى

0 ابه احسن اسكوتر في السوق ؟؟؟؟
0 للبيع جنط BBS " italy " 16
0 للبيع جنط bbs 16
0 عفشة kyp كاملة للبيع " جين - بيرسونا "
0 عفشة kyp و جنوط bbs

 
m.3abdel3al غير متواجد حالياً  
قديم 17-10-2009, 06:30 PM   #10
عضو ذهبي
 
الصورة الرمزية m.3abdel3al
البيانات الشخصية
مواضيعي / ردودي
الحالة
m.3abdel3al غير متواجد حالياً

حاصل على الاستيكر
الإعجاب بالمشاركات
شكرًا (أرسل): 0
شكرًا (تلقى): 5
معجب بمشاركة (أرسل): 0
معجب بمشاركة (تلقى): 6

افتراضي

النقطة السابعه

يا شباب هي عمليات التنظيف و الاستحمام، وطبعا دي اهم حاجة لانها هي اللي بتحافظ لنا على صحة الكلب وبتضمن خلوه من الحشرات و كمان خلوه من اي امراض ممكن تتنقل ليه من الاهمال في النظافه، ده غير ان نظافة الكلب بتنعكس ايجابا على نظافة المنزل، وهنا هقسم الموضوع لـ 3 نقاط رئيسية.

1- استحمام الكلب:

المصدر: رابطة محبي الحيوانات AnimalsFanClub.Com
استحمام الكلب من الحاجات اللي فيها سوء فهم عند اغلبيه الناس المبتدئه في تربية الكلاب، وسوء الفهم نابع من تخيلهم ان الكلب لازم يستحمى كل يوم علشان يكون نضيف، وطبعا ده خطأ كبير. الكلب يا شباب بيختلف عنا في حاجات كتير اوي، اولها ان فراء الكلب مغطى بماده زيتيه مهمتها انها تقوم بعمل عزل حراري للكلب، علشان تحافظ على درجة حرارة جسمه الداخليه بدون ارتفاع او انخفاض وعلشان مش يتأثر بدرجات الحرارة الخارجيه، طبعا العزل ده مش كامل تماما بس هي ليها عامل كبير جدا في المحافظة على استقرار درجة حرارة الكلب.


الطبيعي اننا هنقسم الكلاب ل 3 فئات حسب طول شعرهم، وتسهيلا للناس هحط مثال على كل نوع علشان التقسيم يكون واضح



ده كان جدول مختصر بيوضح الفئات و عدد مرات الاستحمام و التمشيط
وطبعا مش دايما بنكون محتاجين نحمي الكلب، يعني في اوقات كتير الكلب مش بيكون محتاج استحمام، وده راجع لاتساخ الكلب نتيجة الخروح بره البيت، ولو الكلب مش متسخ بصوره كبيره ممكن نمسح على جسمه بقماشه مبلوله بس وبعد كده نمشطه وده كافي اوي لو الكلب مش متسخ بس في الصيف مش نزود الفتره دي عن شهر، يعني بين كل عمليه استحمام والتانيه فتره لا تزيد عن شهر.
والاستحمام بيكون بشامبو مخصص للكلاب، واغلبها بيكون معطر، بس طبعا اسعاره بتكون عاليه شويه، يعني بيبدأ من 30 جنيه وهو متوافر في محلات الحيوانات او في قسم الحيوانات في سبينز وكارفور مثلا، لكن في بدائل عنه اسعارها اقل ونفس التأثير وهو شامبو بيتادين بشري، وده بنجيبه من اي صيدليه وسعره 8 جنيه للزجاجه وآدي صوره ليه



والبديل التاني هو شامبو جونسون للأطفال وآدي بردو صوره ليه، بس انا بصراحه مش عارف سعره بالظبط



وطبعا لازم ننتبه لحاجة هي اننا منحميش الكلب ابدا بالصابون او بشامبو بشري لان مكوناته بتكون فيها مواد كاويه عنيفه على فراء الكلب و شعره وبتعمل جفاف في الجلد و تساقط للشعر وكمان بتقضي على الماده الزيتيه اللي بتحمي جسم الكلب.
وطريقة استحمام الكلب بتكون اننا نوقف الكلب في مغطس (بانيو) ونبدأ نبلل جسمه كله بالماء تماما مع مراعاة ان الآذان و العينين ميجيش عليهم ماء خالص، وكمان درجة حرارة الماء تكون معتدله، يعني لا بارده ولا ساخنه. وبعدين نبدأ نحط الشامبو على شعر الكلب من اول العنق لغاية الذيل، وبعدين نفرك جسم الكلب كله بالشامبو من فوق لتحت لغاية الاقدام ونحاول اننا نخلي الشامبو يتخلل داخل الشعر، ومش نسيب الشامبو فتره على جسم الكلب، وعلى طول نبتدي نرش الماء عليه علشان نزيل الشامبو تماما من على جسمه، ويفضل اننا وقت الاستحمام نحط قطعتين من القطن الطبي في اذن الكلب علشان نحميها من دخول الماء.
وبعد ما نتأكد تماما ان مفيش شامبو باقي على جسم الكلب ننشفه بفوطه كبيره ونضيفه تماما ونسيبه ينفض جسمه علشان يزيل اي ماء باقي على جسمه، وبعدين بقطعة قماش مبلوله ننضف وش الكلب وحوالين عيونه.
وبالنسبه للاذن ممكن نجيب محلول تنظيف اذن خاص بالكلاب ونبلل سلاكات تنظيف الاذن بيه وننظف الاذن من الجزء الظاهر فقط، والجزء الداخلي ده خطر ننظفه بنفسنا، ويفضل تركه للطبيب البيطري.
وطبعا واحنا بنحمي الكلب نحاول نلاطفه و نشجه بكلام جميل، واول ما الكلب يخلص الحمام بتاعه نأكله وناخده على مكان دافي ومفيهوش اي تيارات هواء ونسيبه لغاية ما ينشف، ويفضل اننا ندخله البلكونه علشان ينشف في الشمس وكمان بتبقى فرصه كويسه اننا نسمح للشمس بتطهير جسمه
حاجة بردو عايز أأكد عليها، اياكم والديزانون، يا جماعه الديزانون ماده سامه جدا وبتستخدم اساسا للبهائم زي الابقار و الجاموس، وخطر جدا استخدامها مع الكلاب، وممكن نستخدمها في تنظيف مكان نوم الكلب او الحمام بعد عمليه الاستحمام لكن مش نحمي بيها الكلب.
وبخصوص التمشيط يا شباب، التمشيط بيكون بأمشاط خاصه بالكلاب و يكون في اتجاه الشعر مش عكس الاتجاه، وفي فترات تغيير الشعر لازم نزود عدد مرات التمشيط علشان نزيل الشعر الميت وننشط فروة الكلب، ويفضل يكون الكلب في حالة استرخاء اثناء عملية التمشيط وبردو لازم نشجعه و نلاطفه اثناء عمليه التمشيط علشان يحب العمليه ومش يكرهها وتكون عقاب بالنسبه ليه.



ودي صور لمجموعه من ادوات التمشيط واسعارها بتتراوح من 15 ل 40 جنيه تقريبا











2- تنظيف مكان نوم الكلب:

تنظيف مكان نوم الكلب عمليه مهمة جدا، ولازم تتم بصوره يوميه، وهي اننا كل فتره نغير الفراش اللي بينام فيه الكلب ونغسله كويس و نعرضه فتره طويله لاشعه الشمس ويفضل الغسيل يكون في مغسله متخصصه وبمواد قاتله لاي بكتيريا او طفيليات.


3- تنظيف مكان قضاء حاجة الكلب:


تنظيف مكان قضاء حاجة الكلب لازم يكون بعد قضاء الكلب لحاجته مباشره، ونراعي التطهير التام باي مواد مطهرة زي الديتول او الفينيك وبين كل فتره والتانيه نستخدم الديزانون في تنظيف مكان قضاء الحاجة.

__________________
DA ANA BA3D EL TA3DEL

 
اخر مواضيعى

0 ابه احسن اسكوتر في السوق ؟؟؟؟
0 للبيع جنط BBS " italy " 16
0 للبيع جنط bbs 16
0 عفشة kyp كاملة للبيع " جين - بيرسونا "
0 عفشة kyp و جنوط bbs

 
m.3abdel3al غير متواجد حالياً  
 

مواقع النشر (المفضلة)

الكلمات الدلالية (Tags)
127 , 1300 , 1500 , 20 , 2009 , 316 , 40 , 400 , 50 , 504 , ما , لادا , محلات , مية , ميدو , مراكز , مرور , مشاكل , مصر , مع , معلومات , معرض , automatic , من , منازل , مواصفات , مواصفاتها , مواضيع , موسوعة , موضوع , مقارنة , لكل , ام , الأولى , اماكن , التو , الي , الجديدة , الشمس , العدو , العزل , القسم , الكلاب , change , china , اسعار , اسعارها , اعتراف , انا , انواعها , dvd , ثبات , تحذير , تدريبها , بين , بدون , برافو , بس , تعارف , تغيير , تنظيف , توقف , بكرة , font , يا , حادث , خاص , دى , حرارة , حساس , حوادث , lanos , رابطة , رائع , ريو , سباق , شيء , سيارة , شراء , شرح , سرعة , سعر , صور , على , عمرة , غالية , عايز , عجلات , عدة , عدو , عرض , عن , x6 , في , فرق , هي , هجوم , هو , نايل موتورز , ضيف , طريقة , قطع , قطعة , كل , كشف

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة


المواضيع المتشابهه
الموضوع كاتب الموضوع المنتدى مشاركات آخر مشاركة
Frv cross مواصفاتها و أسعارها sherifseif بريليانس 1 12-09-2011 07:14 PM
اماكن فحص السيارات بجهاز سكانر و اسعارها ABOSHEHAB المنتــــــدى العـــــــــــام للسيــارات 6 28-04-2011 01:22 AM
ارجو المساعدة فى اماكن صيانة الميجان بالمعادى او اى اماكن غير التوكيل . popmaster ريــــنو 6 11-05-2010 10:44 PM
عايز اعرف اماكن بيع قطع غيار الالتو اللى اسعارها هادية وكمان عايز اعرف ل haitham_alto مــــــازدا 11 16-01-2010 04:16 PM


الساعة الآن 03:51 AM.


Powered by vBulletin® Copyright ©2000 - 2014, Jelsoft Enterprises Ltd. ,
Content Relevant URLs by vBSEO 3.6.0 PL2
For ADs Mail to: Karim.Serag@GMail.com

جميع المشاركات تعبر عن اراء ووجهة نظر اصحابها فقط والمنتدى غير مسئول عنها