سؤال لمالكى النيسان ليفينا

**AHMED REFAT** · 20-10-2009 06:17 PM

سؤال لكل مالك لنيسان ليفينا ارجوا افادتى بارك الله فيكم .. انا ناوى ان شاء الله على عربية اس يو فى من فترة وانا معايا ماتريكس 2007 وكنت منتظر الكارينز لكنها نزلت فاضية تقريبا والخليجى اللى فيه الكماليات وصل 135000 وطبعا دع سعر مغالا فيه جدا وعرفت ان الافينا وصل سعرها من 135000 الى 115000 ورحت شوفتها عند السبع وبصراحة العربية عجبتنى رغم انها اضيق نسبيا من عربيتى لكن الكماليات فيها بوفرة من ايه بى اس وايه بى دى ومفتاح ذكى وخلافهه لكن الكل بخوفنى من ناحية الصناعة الصينى ومن ناحية عدم توفر قطع غيار لان العربيو مش متوفرة بوفرة فى السوق وطبعا اعادة البيع .. السعر مافيش .. فارجو الافادة فى امكانية السيارة وهل فعلا الموتور بفرق كتير لانه ليس الموجود فى التيدا مختلف ( الكلام ده من الكتالوج ومن الموزع مش من عندى ) وهل فعلا تحس انها صينى ولا برضه احساسها يابانى والعفشة عاملة ايه وقطع الغيار متوفرة ولا لأ كده يعنى .. كل التفاصيل عنها افادكم الله

**ehabident** · 21-10-2009 02:23 AM

- بص يا باشا أنا معايا الليفينا وعاملة 6000 كلم.
- العربية زى الفل ومرتاح معاها جدا
- اتحدى ان أى حد يطلع فيها عيوب "تقفيل". على فكرة الصين ليها منتجات عاليه جداً بس اللى مخلى سمعتهم وحشه انهم "fully adjustable" يعنى المستورد المصرى المحترم علشان يزود ربحه يقولهم عاوز المنتج الفلانى بجنيه يعملوه بجنيه ويبقى زفت طبعاُ لكن لو حاجة مصروف عليها كويس بتبقى زى الفل.
- العربية يابانى بس التقفيل فى الصين وايه يعنى. وبعدين هو الرقابة على الانتاج فى مصر فى مصانع نيسان (الصنى) والبى ام هتكون احسن من هناك؟
- شوف نسبة الموبيلات (الماركات وليس الصينى) المتقفلة فى الصين واللاب توب المتقفل فى الصين وكله كويس ما دام بيحمل اسم ماركة محترمة.
- بالنسبة للعفشة والمكنة ممتازة زى اى عربية يابانى وده عن تجربة (انا كان معايا كورولا عيون لفترة طويلة واستعملت البوما بتاعت اخويا برده فتره كويسة)
- بالنسبة لقطع الغيار انا معرفش النظام فى القاهرة ايه - انا فى المنصورة وللأسف مفيش ولا واحد عنده قطع غيار ليها (ما عدا فلتر الزيت على اساس انه ثابت فى كل موديلات النيسان) وعلى العموم اكيد مادام العربية جاى معاها ضمان انك هتتعامل مع التوكيل على الاقل لغاية 25000 او 30000 كلم وساعتها يبقى ربنا يسهل. أنا شفت فى المنصورة حوالى 4-5 عربيات غير عربيتى الفترة اللى فاتت.
- بالنسبة لسعر اعادة البيع انصحك ماتفكرش فيه علشان نفسيتك ماتتعبش.

واى اسئلة تانية انا فى الخدمة

**shevechinco** · 21-10-2009 12:28 PM

السلام عليكم يا استاذ احمد
انا لسة شارى العربية من 15 يوم وبصراحة العربية ممتازة ومحستشى نهائى ان العربية تقفيل صينى ومتخليش الموضوع دة ياخد من تفكيرك كتير. العربية اكتر من ممتازة وطبعا انا لسة مجربتش انى اسال على قطع غيار علشان العربية لسة عاملة 300 كم ولسة حتى مرحتش التوكيل. وعلى فكرة يا ريت وانت بتشترى من اى معرض تفاصل معاهم علشان انا لفيت معظم معارض وتوكيلات القاهرة واخر سعر اشتريت بية 112500 من المحمل وكان نفس السعر وصلت لية عند سمير ريان. وربنا يوفقك

**AHMED REFAT** · 21-10-2009 06:50 PM

المشاركة الأصلية كتبت بواسطة ehabident

- بص يا باشا أنا معايا الليفينا وعاملة 6000 كلم.
- العربية زى الفل ومرتاح معاها جدا
- اتحدى ان أى حد يطلع فيها عيوب "تقفيل". على فكرة الصين ليها منتجات عاليه جداً بس اللى مخلى سمعتهم وحشه انهم "fully adjustable" يعنى المستورد المصرى المحترم علشان يزود ربحه يقولهم عاوز المنتج الفلانى بجنيه يعملوه بجنيه ويبقى زفت طبعاُ لكن لو حاجة مصروف عليها كويس بتبقى زى الفل.
- العربية يابانى بس التقفيل فى الصين وايه يعنى. وبعدين هو الرقابة على الانتاج فى مصر فى مصانع نيسان (الصنى) والبى ام هتكون احسن من هناك؟
- شوف نسبة الموبيلات (الماركات وليس الصينى) المتقفلة فى الصين واللاب توب المتقفل فى الصين وكله كويس ما دام بيحمل اسم ماركة محترمة.
- بالنسبة للعفشة والمكنة ممتازة زى اى عربية يابانى وده عن تجربة (انا كان معايا كورولا عيون لفترة طويلة واستعملت البوما بتاعت اخويا برده فتره كويسة)
- بالنسبة لقطع الغيار انا معرفش النظام فى القاهرة ايه - انا فى المنصورة وللأسف مفيش ولا واحد عنده قطع غيار ليها (ما عدا فلتر الزيت على اساس انه ثابت فى كل موديلات النيسان) وعلى العموم اكيد مادام العربية جاى معاها ضمان انك هتتعامل مع التوكيل على الاقل لغاية 25000 او 30000 كلم وساعتها يبقى ربنا يسهل. أنا شفت فى المنصورة حوالى 4-5 عربيات غير عربيتى الفترة اللى فاتت.
- بالنسبة لسعر اعادة البيع انصحك ماتفكرش فيه علشان نفسيتك ماتتعبش.

واى اسئلة تانية انا فى الخدمة

بارك الله فيك يا اخى .. انا مقتنع بالكلام ده طبعا لكن للاسف السوق المصرى دائما يفرض فكره ولو كان خاطئا
المهم ان السيارة كويسة ومريحة
بس معلش بدون ازعاج ..
سحب العربية عامل ايه لان انا عارف ان عزم الموتور وعدد الاحصنة فيه قليلة
ونعومة الموتور عاملة ايه مع حضرتك وصوته داخل الصالون فى حالة تشغيل التكيف وفى عدمه
ونعومة العفشة فى المطبات عاملة ايه معاك .. وفى حالة تحميل السيارة طبعا انت عارف النساء ربنا يبارك فيهن ... ارجوا الافادة عن كل استخدمات السيارة ... اما بالنسبة لاعادة البيع ربنا معانا فيه ها نعمل ايه وبالنسبة لقطع الغيار السبع للسيارات اكدى انها متوفرة ولكن العبرة بالحقيقة فالباتاكيد هو عايز يبيع وبعد البيع ربنا يعينا بقى .. لشكرا لمجهودك معى

**AHMED REFAT** · 21-10-2009 07:01 PM

المشاركة الأصلية كتبت بواسطة shevechinco

السلام عليكم يا استاذ احمد
انا لسة شارى العربية من 15 يوم وبصراحة العربية ممتازة ومحستشى نهائى ان العربية تقفيل صينى ومتخليش الموضوع دة ياخد من تفكيرك كتير. العربية اكتر من ممتازة وطبعا انا لسة مجربتش انى اسال على قطع غيار علشان العربية لسة عاملة 300 كم ولسة حتى مرحتش التوكيل. وعلى فكرة يا ريت وانت بتشترى من اى معرض تفاصل معاهم علشان انا لفيت معظم معارض وتوكيلات القاهرة واخر سعر اشتريت بية 112500 من المحمل وكان نفس السعر وصلت لية عند سمير ريان. وربنا يوفقك

مبارك عليك السيارة ان شاء الله .. انا سئلت على العربية فبيقولولى انها تقفيل الصين وناس تانية بتقول لا تصنيع الصين لكن بجودة نيسان .. وعلى العموم السوق رافض مبدأ الصينى ده وكل اللى اسائله بيخوفنى .. رغم انى مقتنع بيها جدا وبصراحة الكماليات دى مش موجودة فى اى عربية تانى ولو موجودة بشئ وشويات .. انا كنت عند السبع وتقريبا برضه وصلنا مع بعض لحد 112500 فالسعر مع الكماليات خليتها منافسة جدا لسيارات ال اس يو فى الموجودة ...الكارينز فاضية ( طبعا كماليات استاندرد ) بقت استلام فورى124000 بضمان والخليجى زايد عليها اير باج وايه بى اس فقط ب 132000 برضه كتير جدا وهذا ما شجعنى لليفينا طبعا .. على العموم جزاك الله خيرا على اهتمامك وارجوا افادتى عن جميع انطباعتك عن العربية صوت موتورها ونعومته وسحبها وبالذات مع التحميل والعفشة والكنبة الخلفية واسعة ل 3 افراد ام ضيقة شوية .. بارك الله فيك

**HanyHanyHany** · 21-10-2009 08:11 PM

شوف كمان السوزوكي sx4 وقارنها ب الليفينا هي ب 118 جندي ..

**ehabident** · 21-10-2009 09:10 PM

المشاركة الأصلية كتبت بواسطة ahmedrefatzm

بارك الله فيك يا اخى .. انا مقتنع بالكلام ده طبعا لكن للاسف السوق المصرى دائما يفرض فكره ولو كان خاطئا
المهم ان السيارة كويسة ومريحة
بس معلش بدون ازعاج ..
سحب العربية عامل ايه لان انا عارف ان عزم الموتور وعدد الاحصنة فيه قليلة
ونعومة الموتور عاملة ايه مع حضرتك وصوته داخل الصالون فى حالة تشغيل التكيف وفى عدمه
ونعومة العفشة فى المطبات عاملة ايه معاك .. وفى حالة تحميل السيارة طبعا انت عارف النساء ربنا يبارك فيهن ... ارجوا الافادة عن كل استخدمات السيارة ... اما بالنسبة لاعادة البيع ربنا معانا فيه ها نعمل ايه وبالنسبة لقطع الغيار السبع للسيارات اكدى انها متوفرة ولكن العبرة بالحقيقة فالباتاكيد هو عايز يبيع وبعد البيع ربنا يعينا بقى .. لشكرا لمجهودك معى

بص يا باشا عزم العربية كويس جداً ولو شديت مع اى ماتركس صعب انك تلاقى فرق كبير (عن تجربة)
العفشة ناعمة جداً انعم من التيريوس بكتير واحسن من الماتركس شوية
العزل كويس جداً - صوت الموتور هادئ والتكييف برده صوته معقول وتأثيره على السحب يكاد يكون غير موجود
بالنسبة للتحميل المرة الوحيده اللى حسيت ان العربية حكت معايا فى مطب كنت مركب فيها 4 أشخاص (غيرى) والشنطة فيها فى حدود 30-35 كيلو وده كان فى مطب واحد على طول الطريق من المنصورة لغاية 6 أكتوبر.
من المميزات التانية: الباور كهرباء احسن من الماتركس والبوما بكتير - سير الكاتينة جنزير (كلام التوكيل) -