بما ان الزيرو الحلال بعييييد-فأيه رايكوا نعمل كده؟

**abd_el_7amid** · 02-11-2009 12:49 PM

السلام عليكم ورحمة الله
انا قعدت فترة متابع الشراء بالطريقة الاسلامية والتى بدأت بمعرض عبد اللطيف ثم كونتاكت كار واللى من الاخر برضه فى عقدهم مايمنع ان يكون العقد حلالا خالصا وان يكون التقسيط على الشريعة الاسلامية وبعدين وصلنا الى ان بنك فيصل فيه تقسيط حلال ولكن التقسيط فى الاصل مكروه مادام ليس لضرورة يعنى مش هنموت لو جبنا مستعمل كاش وعليه.
اناقولت نعمل التوبيك دا للى عنده اى معرض مستعمل نظيف نقدر نشترى منه سيارات مستعمة بس حالتها كويسة .
وكمان فى بعض الاوقات بيبقى فيه شحنة عربيات للبيع خارج بنك او هيئة حكومية او سياسية ....... الخ.
فالعارف يقول لنا امتى وفين ؟
ولو هناك من يستطيع التبرع بمساعدة الاعضاء مثلا قدامك عربية كويسة فعلا تعرضها هنا , بس تكون كويسة بجد, اوتتبرع بالنزول مع الاعضاء اللى مابيعرفوش يشتروا لوحدهم ويبقى جزاك الله خيرا وطبعا مش هتبقى متاح 24 ساعة لا.... حسب مواعيدك و وقتك.
فاليقدر يعمل كده يترك تليفونه.
وفى الاول وفى الاخر احنا بندور على الحلال بغرض مرضاة الله .

**sobhysm** · 02-11-2009 02:34 PM

فكرة جميلة وفيها روح التعاون بين الأعضاء

**Mahmoud Saloum** · 02-11-2009 05:22 PM

المشاركة الأصلية كتبت بواسطة abd_el_7amid

السلام عليكم ورحمة الله
ا ثم كونتاكت كار واللى من الاخر برضه فى عقدهم مايمنع ان يكون العقد حلالا خالصا وان يكون التقسيط على الشريعة الاسلامية .

ممكن حضرتك تقول ايه هوا اللى فى عقد كونتاكت الاسلامى يمنع ان العقد حلال ؟؟؟؟؟؟؟؟؟؟؟

**abd_el_7amid** · 02-11-2009 06:15 PM

السلام عليكم اخى الكريم
برجاء الاطلاع على
http://www.nilemotors.net/Nile/24323-a.html
ناس كتير سائلت مشايخ كتير وفى الاخر اتضح ان كونتاكت بتحور فى العقد وبعدين بقى العقدسليم بس التوكيل مش سليم فهى الشركة انا مش شايفها امينة مع الناس .
والغرض الفعلى من كلامى ان معظم العلماء اجازوا القسط للضرورة و انا عن نفسى لا اجد الضرورة الملحة فى شراء سيارة زيرو وانا بامكانى شراء مستعمل فلذلك طلبت من الاعضاء ان احنا نحاول نساعد بعضنا البعض فى شراء سيارت مستعملة نظيفة تغنينا باذن الله عن الزيرو مؤقتا لحد مانقدر نجمع فلوس كاش ونجيب زيرو. وبكده نكون استفادنا
1- عربية ظريفة تفى بالغرض
2- اتقينا الله قدر المستطاع
3- اترحمنا من الاقساط وفوايدها
4-مخلناش اى شركة تستغلنا وكل شوية دا خلاص بقى اسلامى تعالوا اشتروا
وصدقنى التوبيك دا ناشىء نتيجة للينك بالاعلى وليس امتدادا له. فاذا كنت بتساءل على حرمانية العقد او حلاله فبصراحة الناس اللى فى اللينك السابق عاملين كل حاجة من اجتهاد وسؤال العلماء واعتقد انهم هيفدوك اكتر منى بكتييير.
والله المستعان

**A.Gameil** · 02-11-2009 06:24 PM

فكره جميله

**eg_falcon** · 03-11-2009 12:01 AM

انا شايف ان الموضوع عشان يبقى جد ممكن نعمل رسم معاينة للي حيتبرع بالنزول مع من يرغب في شراء سيارة و ليس لديه الخبرة الكافية لانه كده كده حيدفع سواء لميكانيكي او سمكري او لو رفعها في بنزينة و ممكن يضحك عليه برده يبقى اخوان المنتدى اولى و حيكونو اامن من الغريب

**momo100010** · 03-11-2009 12:10 AM

موضوع جميل جدا
مش علشان المجمل لا
علشان بجد انت هتاخد ثواب على كل واحد يقرأ الموضوع دا
قليلين جدا اللى مشيين بالمبدأ دا مع ان دا الصح
ضروري ؟
اوى يعني؟
مش هتموت
يبقى بلاش من الربا
( واحل الله البيع وحرم الربا )
والله والله والله
اللى بيبعد عن حاجة بس علشان ربنا سبحانه وتعالى ربنا بيخلفه احسن منها

انا متاسف انى هطول
بس انا هقول موقف حصل معايا شخصي
انا كنت بدور على شقق ف حتت كتير
لحد لما عجزت وضعفت وقلت وماله لما اجيب شقة (بالتقسيط الربوي ) اللى بيسموها مشروع مبارك القومي
وبعدي قلت لا مش شاريها واكيد ربنا هيكرمنى
اللى كنت عامل حسابي اى ادفعه مقدم دفعته ف شقة ف الشروق
واستلمت بعد كتابة العقد مباشرة ومتشطبة وفيها خدمات وناس عايششة وسكانة
وفوق كل دا ودا
بدفع قسط اقل 5 مرات من اللى كنت هدفعه
انا مش حاجة ملهاش حل لا والله ابدا
بس انا حبيت اوضح تجربة شخصية
اللى بيبعد عن حاجة ( علشان يتثى الله)
ربنا بيخلفه بأحسن منها
دا كان مثال حى
واسف جدا انى طولت
وبشكر صاحب الموضوع على الموضوع دا

**gomangy** · 03-11-2009 12:47 PM

فكرة جميلة وفيها روح التعاون بين الأعضاء

**abd_el_7amid** · 03-11-2009 05:56 PM

1000 للعضو momo100010 وزى ما حضرتك قولت اللى بيسب حاجة لله يعوضه الله بخير منها ودا ملموس فى واقع الحال

وبالنسبة للاخ eg_falcon والله انا كان نفسى نعملها لوجه الله ودا لمن استطاع ولكن مفيش مشاكل لو حد يحب يعمل رسم معاينة بس يبقى محدد بذلك من الاول علشان الناس تبقى على بينة ومفيهاش احراج لحد.

وبعدين انا مستنى معرض ثقة يتكتب لافادة الناس ولوكان فعلا كويس بالتجربة نرشد الناس ليه
وممكن نعمل معاه اتفاق على خصم وترشيحه لاعضاء المنتدى واللى يحب يروح .. يروح باسم المنتدى .
ونتمنى ان يكون هناك اكتر من معرض.