الموضوع: رابطة لملاك النيو اكسنت

المشاركة الأصلية كتبت بواسطة bassamhafez

السلام عليكم جميعا يا نيو اكسنت اونارز(owners)

تمت بحمد الله اول مقابله للنيو اكسنت جروب يوم الجمعة 12 مارس 2010 وكانت مقابله رائعة جدا وكنا متخيلين انها هتخلص في نص ساعة لكن الوقت الرائع خدنا وسيبنا بعض بالعافية عشان نلحق صلاة الجمعة واليكم تفصيل المقابله :

اولا الحضور بالترتيب:

ابو مارو كان اول واحد جه وانا كنت تاني واحد وبعد كده عزت فوكس يليه دكتور وليد واخيرا ابو النوم باشا لانه صحي وجه بالعافيه اوس اوس باشا

ثانيا ايه هي نوع المشاكل اللي كنا قلقانين منها في العربيات:

اولا انا كنت حاسس ان تجميع العربيه مش قد كده
ثانيا مشكله ابو مارو القاسيه جدا وهي ان عربيته فيها طقم دبرياج كامل وهي لسه ما كملتش 1000 كم

ثالثا ايه اللي تم عشان نعرف هل المشاكل دي فرديه ولا جماعيه

اولا بالنسبه لمشكله السحب عندي عزت فوكس جرب عربيتي وانا جربت عربيته والنتيجه انه لا يوجد اي فرق يذكر بين العربيتين غير ان عربيه فوكس صوتها اهدى شويه وده عشان انا كنت بقرص على عربيتي عشان افتح الموتور بس هو ما كانش بقرص قوي وبكده يبقى الاحساس بضعف السحب ده راجع لطريقة السواقة لان اصلا فوكس اخرة في الحرق والشد على حسب كلامه 4 او 4ونص اربي ام وانا لمابشد بوصل لحد 6 وساعات 6 ونص

ثانيا بقى مشكله ابو مارو واللي حصل معاه وانا هحطلكوا لينك الموضوع المنفصل اللي هو عمله عن العربيه عشان هو احسن مني طبعا في عرض مشكلته وللاسف مقدرش يجيب العربيه في المقابله عشان العربيه ما تعدش كيلو على الفاضي وخصوصا ان ده في مصلحته لاخذ حقه من (مش لاقي كلمه تعبر عن الوكيل التيييييييييييييييييييييي ييت اللي اسمه غبور) ربنا معاك يا ابو مارو ولو عايز اي مساعده او شهاده من اي نوع لحل مشكلتك احنا تحت امرك وده رابط الموضوع

http://www.nilemotors.net/nile/13196...post3872447867 (حكايتي مع النيو اكسنت وغبور-ما حدث وماأتخذته من اجراءآت وما سوف اتخذه)


ثالثا بقى وبشكل عام ايه اللي النتائج اللي وصلنالها من المقابله وبعد تجربه كل واحد فينا لعربيه التاني

اولا وده مهم جدا غبور بيه بينزل العربيه دبرياجها عالي جدا وده ممكن يداري عيب العربيه لو فيها اسطوانه او طقم دبرياج كامل وده كمان بيضعف سحب العربيه وده كان حاصل فعلا في عربيه وليد اللي بالاجماع اتفقنا على ان دبرياجها عالى وسحبها سئ جدا وبالفعل انا روحت معاه عشان نوطي الدبرياج والكشف على الاسطوانه والحمد لله طلعت سليمه والعربيه بعد توطيه الدبرياج سحبها اتحسن جدا

ثانيا العربيه اداءا ليس سئ هو في المجمل العام مرضي وعلى فكرة اراء الناس بتختلف في العربيه على حسب طبيعة السواقه والدليل ان انا ما كنتش راضي عن اداء العربيه خالص لحلد ما جربت كل العربيات اللي كانت في المقابله ولم اجد اي فروقات اللا طفيفيه جدا وده راجع لطبيعه السواقة اللي بتخلي عربيه ممكن تكون خشنه شويه او ناعمة شويه عشان كده لو سمعت راي حد في اي عربيه ممكن تعتبرة وسيله مساعده بس مش قاطعة عن العربية الا لما تجربها بنفسك عشان تقدر تحدد راي خاص بيك

في الهايه نقدر نقول ان المقابله دي كان ليها نتائج ايجابيه جدا زي انها طمنت ناس زيي انا عن اداء العربيه وساعدت ناس زي وليد عشان موضوع الدبرياج العالي

وان شاء الله عطاء الرابطه يزيد ونقدر نفيد كل اللي محتاج يعرف حاجة عن العربيه سواء مالك ليها او بيفكر يشتريها

تقرير مختسر ومفيد
بس افهم من كده
ان انت كنت فاكر ان عربيتك سحبها وحش ولما جربت غيرها عرفت ان ده الطبيعر بتاعها صح ؟؟
ثانيا فرق صوت الموتور ده مش ناتج من طريقة قيادتك
ده العكس المفروض العربيه اللى بيتقرص عليها جامد صوتها بينعم اسرع ويهدى اكتر من العربيه اللى لسه ماتفتحتش
ممكن يكون البنزين بتاعك اوحش منه او نوع زيت الموتور مختلف

وبجد فعلا الله يكون فى عون ابو مارو على اللى حاصله
وفعلا اداء العربيه بشكل عام مرضى جدا لكن مش خطييييير زى ما فى اعتقاد ناس كتير انا كنت منهم
وربنا يباركلكو فيها كلكو
ولو عملتو مقابله تانى قولولى عشان عايز ااجى اتعرف عليكو (ولا لازم يبئى معايا اكسينت ؟؟)

شكرا يا بسام على التقرير الجميل دة و اتمنى ان المقابلة تتكرر تانى لان بجد الواحد اتعرف على ناس محترمة جدا فى المقابلة دى .

اول عربية بسام جربها كانت عربيتى و فى الاول حسيت ان سواقتة عادية و مش عنيفة زى ما كنت متصور ، فقلتلة سوق براحتك - لو عايز تقرص عليها براحتك خالص .. و قد كان .. و كانى اديتة اشارة البدء .. و دى كانت اول مرة اشوف rpm 6 فى عربيتى .. كفاية انة جاب بالعربية 140 قدام سور الميريلاند .. و فى هذة الاثناء ابو مارو كان قاعد ورا بيتشاهد و بيقولة اهدى يا بسام .. و لما جرب عربية دكتور وليد انا كنت قاعد ورا مخدتش بالى جاب كام بس اللى خدت بالى منة ان د/وليد كان ماسك فى مقبض السقف .
و اخيرا هقتبس جملة قالها اسامة - ابو دم خفيف - يا بسام انت لو جبت فيرارى هتيجى تقول عندى مشاكل فى السحب .

نتيجة كمان طلعنا بيها فى المقابلة ان التعديلات اللى بتتعمل فى العربية زى الفلتر الاسبور و البوجيهات NGK Iridium ( فى عربية بسام ) ملهاش تأثير خالص .. بالعكس انا عربيتى كانت استوك و متأخر على صيانتها كمان و كانت اهدى صوت و نفس التسارع و ان لم يكن احسن بفارق طفيف . مش عارف اية تفسير الكلام دة - بس دة اللى اثبتتة التجربة .

انشاءالله تتكرر تانى .. و اهلا بيك يا مومو لو حبيت تشرفنا و تيجى معانا .. بس بالبيرسونا مش الفيرنا عشان نجرب و نشوف الفرق بين الاتنين .