الموضوع: جهاز قراءة أعطال كمبيوتر السيارات

يعني انت تقصد ان الجهاز دة بيتوصل علطول بالعربية ولا في همزة وصل بين الجهاز وبين العربية؟ :-)

بالضبط يتوصل مباشرة من الكابل اللي في الصورة
الي الفيشة الموجودة بالسيارة

طيب وهو الجهاز دة مبيشتغلش لغير علي العربيات الجديدة؟
ويقدر يشخص اغلب الأعطال ولا الأعطال كلها؟
والف شكر :-)

أعزائي

- الجهاز ثمنة مذكور في اول المشاركة الخاصة بي وهو 50 دولار من موقع
أمازون امريكا يعني يساوي 300 جنية حاليا مع الشحن والتوصيل (او ازيد شوية)

- بالنسبة لتواجدة بمصر ، اسف جدا ليس لدي علم بذلك

- بالنسبة للموديلات التي يعمل عليها فدي قصة شوية تحتاج لشرح
الجهاز دة يعمل علي السيارات التي تتوافق مع نظام التشخيص OBD2
ودة مركب عموما بالسيارات من 1996 فما فوق
قبل كدة من موديلات السيارات يكون النظام القديم وهو OBD1
وهذا الموديل لايعمل مع النظام القديم ولكن من الممكن ان تجد اجهزة اخري
تعمل علية (تكون الفيشة بالسيارة مختلفة عن النظام 2 والبرنامج بالجهاز مختلف)

طبعا مش كل السيارات اللي بتتصنع حتي بعد 1996 لازم يكون بها نظام
أعطال الكمبيوتر دة وانكا حسب تصميم السيارة ورغبة المصنع نفسة

دي مقالة ممتعة باللغة الأنجليزية عن فكرة تشخيص نظام الأعطال بالسيارات
وكيفية نشأتة من الأساس والمستقبل المتوقع لة
http://www.asashop.org/autoinc/may2004/mech.htm

http://www.smogsite.com/obd2.html

طيب ، نيجي لشرح أكثر عن الجهاز

- يوم من الأيام وانت ماشي او اول ماتدور السيارة تلاقي فية نور في التابلوة
علية علامة الموتور ومكتوب علية Check Engine Soon او
Maintenance وهي تعني صيانة او أفحص الموتور بأقرب وقت

- اللمبة دي لما بتنور دي معناة ان فية عطل في الموتور او الأجزاء المغذية له
او الملحقة بة ، ودة طبعا بيكون عطل من ضمن حوالي 1000 كود

- علشان تعرف ان العطل دة خطير او ضروري او بسيط او ممكن تمشي بية شوية
لازم تروح لحد عندة جهاز كشف الأعطال علشان يقرأ العطل من كمبيوتر السيارة
وبعدين يقولم معناة اية ويتصلح ازاي

- عادة الشركات او محلات الصيانة اللي عندهم الجهاز دة مش بيدوا تفاصيل فنية
عن رقم العطل او نوعيتة بس بيقولك الجزأ دة محتاج ضبط او تغيير او صيانة

- طبعا الكشف دة لوحدة علشان يقولك رقم العطل ومعناة حاليا مكلف
(هنا بالكويت يكلف 10 دينار = 200 جنية مصري!!!)
طبعا دة بدون اصلاح ولا حتي يرضي يطفي اللمبة رغم انة ممكن يعمل كدة

- طيب الحل اية اذا كان عندك اكثر من سيارة وبتفهم شوية في السيارات
الحل هو انك تشتري جهاز زي دة وعلي الأقل تعرف العطل فين وتقدر خطورتة من عدمة
وتصلحة حسب مزاجك

نيجي للجزأ العملي في أستخدام الجهاز

معظم السيارات الحديثة حتلاقي فيها فيشة في منطقة ركوب السائق
لاتبعد حوالي 80 سم بأي اتجاة (حسب شروط المصنعين) وبدون غطاء عليها
يعني تقدر تلاقي الفيشة دي تحت الدركسيون ، خلف طفاية السجائر ، علي الجنب
بتركب فيها كابل الجهاز مباشرة والسيارة مطفية ، وبعدين تفتح الكونتاكت الي
درجة الأنوار الحمراء ، بدون تشغيل الموتور

يبدأ الجهاز بالعمل وتظهر علي شاشتة بعض الأختيارات ويبدأ بقراءة كمبيوتر السيارة للأعطال

اول عطل بيظهر رقمة علي الشاشة ومعاة علامة السهم الأسفل لو كان هناك اكثر من عطل
(ودة ممكن يحصل كثير) علشان كمبيوتر السيارة مصمم انة يخزنأكواد اكثر من عطل

الجهاز اللي انا جايبة دة بيظهر الكود فقط ، ثم اقرأ انا الكتيب الملحق معاة او ادخل علي النت
لمعرفة تفسير رقم الكود وساعتها اعرف الجزأ العطلان وطريقة أصلاحة

فية موديلات أخري من الجهاز بتديلك كود العطل ومعاة شرح مختصر او تفسير وأحتمال
للجزأ العاطل او المحتاج صيانة ( طبعا أجهزة اغلي)

بعد ماتكتب كل أرقام الأعطال علي ورقة خارجية ، الجهاز بيسمح لك انك تقدر تمسح
الكود من كمبيوتر السيارة ، وساعتها اللمبة الخاصة بفحص المحرك راح تطفي
طبعا ممكن تنور تاني اذا كان العطل متكرر او الجزأ العاطل لم يتم أصلاحة كما يجب

اتمني اني اكون جاوبت علي استفساراتكم ،،،