مقارنة بين الفيليشيا وال128 (علي مسئوليه سبعاوي)

23-04-2007 09:42 PM

لو عايز تحسن عربيتك عن ال 128 يبقى الفيليشيا ليست ابدا الإختيار الصحيح
رغم اناقة منظرها لكنها سيارة متواضعة الأداء جدا، خشنة وثقيلة الوزن وعفشتها طرية جدا وتتعوج مع اقل مطب، وبتسخن بشدة فى الصيف ودايما تجيب جوان وش سلندر من السخونة ، وبلوك المحرك بتاعها الومنيوم وليس حديد وقطع غيارها غاليه جدا بلا مبرر، هتلاقى الفيليشيا مشاكلها اكثر 100 مرة من ال128

الفليشيا ليست حصان شغل ابدا وال128 افضل منها 100 مرة فى هذا الصدد

انا تعاملت مع العديد من العربيات الفيليشيا، وكلهم لهم نفس العيوب، وفى وقت من الأوقات تعاملت مع فيليشيا موديل 96 و 128 موديل 72 فى وقت واحد، ال 128 كانت انعم واهدأ واحلى فى القيادة 100 مرة من الفيليشيا

بص لو عايز تعلى ال128 فكر فى الأكسيل أو الأكسنت أو الكيا عصفورة او شاهين 1300 او 1400 ، واضعف الإيمان ريجاتا، لكن نصيحة بلاش فيليشيا

اما لو عايز تخلى ال128 وتحل مشاكلها عليك بالآتى:

1- بالنسبة للكاربوريتور قصر المشوار على نفسك وهات واحد جديد، ويفضل لو كان ويبر او سوليكس، تمنه شوية ميات ، ممكن تسأل عليه فى التوفيقية او عند على شاهين (امام اخبار اليوم)

2- بالنسبة للعفشة إتأكد من حاجتين: 1- المساعيدن الامامية كويسة ولا لأ، عفشة ال128 روحها فى المساعدين الأمامية، لو حالتهم وحشة او حتى نص نص غيرهم، ويفضل لو جبت مونرو، ممكن تسأل عليهم عند لهيطة فى سوق التوفيقية،
الحاجة التانية ان كل لحامات العربية سليمة ومافيش بنط مطرقعة، فى العلب او الركب او ى جزء من حوض العربية بعد ما تعمل الكلام دا راجع على باقى اجزاء العفشة لو فيها حاجة محتاجة مراجعة وبعدين اضبط زوايا، وان شاء الله العربية هاتقل زياراتها جدا للميكانيكى

**dr.ahmed** · 08-05-2007 04:40 AM

السلام عليكم يا أحلى منتدى
من زمان ومن اول ما افتتح هذا المنتدى وانا مشارك بالقراءة فقط لكن لما لقيت حاجة أعرف اتكلم فيها واشعر بأن رأى حيكون مفيد قولت ما بدهاش
أولا أنا ماركبتش فى حياتى غير ثلاث عربيات من 20 سنة أولهم 128 من أول العادة حتى موديل 2001 اللى بيعتها من 5 سنوات ب 30000 الف وكان موضوع صعب ان حد يشترى بالسعر دة لكن زى ما بيقولو بيع غناوة وفعلا كل مسمار فيها كان بتاع المصنع وكانت مريحانى جدا
أما العربية التانية اللى اعرف عنها شوية لأنى ركبتها سنة واحدة بس فى التيعينات كانت البى أم 316
وأخيرا من 2006 حتى الأن معايا الفليشيا ........ بجد بجد حاجة تانية على الطريق ثبات مافى بعدة ... قطع غيار معمرة جدا عفشة حديد حديد ..... صاج حكاية اية تانى
أة هى خشنة ومش ناعمة بس عربية بجد غير ال128 خالص
وبأعتبر انة مفيش مقارنة ابدا بين الإثنين ودة عن تجربة مش مجرد رأى أنا بقولة وعلى الله الإعتماد
وشكرا لسماحى بمشاركتكم الغالية
د/ أحمد صلاح

**Atef Saleh** · 08-05-2007 01:27 PM

الله ينور عليك يا دكتور احمد و الله حرام عليك يا ابو نورا اللى انت عملته فى الفليشيا ده انت قارنتها بال128 و ده فى حد ذاته اهدار لأى عربيه و شكرا

**MOHAMED ABD EL SHAFY** · 09-06-2007 11:26 PM

ال 128 ايه بس اللى تتقارن مع الفليشيا
انا كان معايا 128 وبعدين غيرتها ل فليشيا
حسييت بفرق كبيييييير اوى
عفشة قوية بمرور 6 اشهر بمعدل 50 كم يوميا لم اربط مسمار واحد فيها والحمد لله مع ان كانت ال 128 كل اسبوعين او 3 اربط عفشة نتيجة طبيعة الطرق اللى دايما امشى فيها
ظبط الموتور والميكانيكا والاعطال مرة واحدة فى الاول وبعدين نسيتها تقريبا مع ان ال 128 كل كام يوم مشكلة جديدة تطلع
ثبات وسحب واداء وتحمل مشقة عالية جدا
بصراحة السيارة تساوى اكثر من ثمنها فى مصر ودا عشان سوقها تقيل شوية
حرتم تتقارن ب ال 128 ممكن تتقارن مع الكيا برايد والهونداى اكسل مثلا تكون مبلوعة شوية

**amir** · 08-07-2007 03:42 AM

مش هتكلم كتير اكيد الاسكودا موضوع مقارنتك متهانه عند ميكانيكيه ملهومش فيها , وده عن علم, انا معايا سكودا 98 و بتثبت عكس كلامك خالص, و لجميع مالكي سكودا شوفوا الموضوع اللي انا ناشرو , و الي الاخ المحترم سبعاوي بجد انا مش قصدي اسيء اليك لان بجد انا استفدت من معلوماتك الغزيره في السيارات و بسببك عرفت المنتدي الجميل ده من ايام
contactcars

د/امير

**Mohamed_Ibiza** · 17-02-2008 05:32 PM

والله يا جماعة انا محتار وشكلي هتعقد

انا ان شاء الله هجيب عربية الشهر الجاي وكنت ناوي باءذن الله على فيليشيا لكن الكلام اللي بقراه هنا في المنتدى مش مطمني خالص سواء كان كلام الاخ سبعاوي او الموضوع اللي باسم يوميات مواطن مصري ده وده طبعا غير كلام اعضاء تانين عن الفيليشيا

انا بجد محتار يا جماعة لان انا خبرتي بالسيارات معدومة ودي اول مرة اركب فيها سيارة

ياريت يا جماعة تساعدوني ولو هي فعلا الفيليشيا كويسة طيب ايه سبب الهجوم ده عليها

وياريت حد يقولي عيوبها ومميزاتها

انا محتار والله

**crazylambada** · 18-02-2008 10:06 AM

بص يا باشا
حاول تجيب سكودا فيليشيا حالتها نظيفة
لان لو اللي كان بيستعملها استخدامه وحش بلاش احسن
انا عندي سكودا فيفوريت يعني اقدم منها موديل 94
بس علشان انا محافظ عليها الحمد لله معايا كويسة جدا
و عامل بيها 35500 كيلو واحسن ميت مرة من 128
مش الفليشيا
انتا لازم تشوف ميكانيكي يكون معاك و انتا بتشتريها
بس المهم انها متكونش متبهدلة

**Mohamed_Ibiza** · 18-02-2008 05:31 PM

الف شكر يا crazy lambada بجد مش عارف اقولك ايه

بس كان ليا استفسار هلى ممكن اخد العربية توكيل سكودا هما يكشفو عليها ولو كان ده ينفع ياريت اعرف يتكلف كام ؟