فكرت في عمل هذا الموضوع لنستفيد من خبرات بعض في هذا الزمن العصيب الذي تزيد فيه قيمة كل شي ماعدا نحن البشر
عرض للطباعة
فكرت في عمل هذا الموضوع لنستفيد من خبرات بعض في هذا الزمن العصيب الذي تزيد فيه قيمة كل شي ماعدا نحن البشر
ده بيرجع للمبلغ المتاح معاك يعنى ماينفعش يكون معاك 20 ألف و تقول حطهم فى إستثمار عقارى
لكن ينفع تحطهم فى البورصة هايعملوا مكسب كويس بس تتعامل مع شركة محترمة
لو معاك مبلغ ينفع يتحط فى أرض أو شقة ده برده إستثمار كويس
الإقتراحيين دوول ممكن نسميهم الإستثمار المحدود و المضمون
لكن مشاريع و ما إلى ذلك لو مش متفرغ هايكون صعب جدا بجانب إن كل مشروع ناجح مش ناجح عشان ماهيته أو تخصصه بل ناجح لعوامل كثير مختلفة من شخص لآخر بمعنى تانى لو أنا عامل مشروع إكس و ناجح جدا فيه مش لازم لو إنت عملته تنجح فيه أو العكس ممكن أفشل أنا فيه و إنت تنجح
علشان تستثمر اموالك
بس الاول ياجماعة خلينا نتكلم عن الحاجات الحلال ، يعنى خلينا بعيد عن فوايد البنوك والحاجات ده
فيه طرق كتيرة للاستثمار بس ده بتعتمد على اماكنيات صاحب المال
يعنى هوا يقدر يعمل ايه بجانب الفلوس اللى معاه
لو انت تعرف مهنه معينه يعنى مثلا الوالد كان عنده تجاره معينه وانت كنت بتساعده فى الصيف لما كنت طالب ولما اتخرجت وقفت معاه شويا وبعد كده اشتغلت وعملت قرشين
ممكن ساعتها تفتح حاجه مشابهة مع بعض التطوير طبعا وساعتها هتكون فاهم كل حاجة كويس
طيب معندكيش خبره فى اى حاجة
شوف السوق عاوز ايه والمنطقة اللى انتى فيها ناقصها ايه وكمان انت هتعمل حسابك ان اول سنتين من اى مشروع جديد ان الدخل يدوبك هيغطى المصاريف وده حاجة كويسه فى الاول
ونصيحة متنزلش بتقلك كله مره واحده فى اى حاجة
يعنى ابدا واحدة واحده ، لاقيت العمليه مشيت اتكل على الله
الاستثمار العقارى طبعا شىء مربح جدا
يعنى انتى لو معاك 100 الف دور على تسعة من اصحابك مع كل واحد 100 الف
هيبقوا معاكوا مليون جنيه
اشتروا ارض وابدا بنا فيها ومع الدور الاول هتلاقى المشترين وتقدر تكمل وده الاستثمار فيه مضمون جدا ومش محتاج خبره كبيره فى اى حاجة
معارض العربيات انا شايف انها بتكسب كويس اليومين دول
انت ممكن تفتح معرض وتبتدى ب 3 عربيات يعنى محتاج حوالى 250 الف وساعتها مين عارف ممكن ربنا يكرمك وال3 يبقوا 30
هوا فيه افكار كتير بس الاهم صاحب الاستثمار نفسه مستعد يعمل ايه.
مشاريع الاطعمة والكافتيريات برضة كويسة جدا بس عايزة حاجات كتير يعني خبرة علي مكان مميز وطبعا لازم التفرغ
لازم حضرتك تقول تخصصك ايه و بتحب ايه و بتفكر تعمل ايه و إمكانياتك ايه ،،
عشان نقولك ايه اللي يناسبك و محتاج ايه
طبعا الحاجات اللي ذاكرها حضرتك ممتازة كاستثمار مضمون ،
بس دي يعني استثمار اخر العمر أو فلوس الزمن ،، لكن مش استثمار عشان تحقق ذاتك ،،
باستثناء الإختيار الأخير
ممكن اديك نصائح عامة :_
1- الرزق بيد الله ،، و ده طبعا السبب لحد المليون
2- ادرس المشروع اللي عايزه كويس من كافة الجوانب ، و دور علي أهل الخبرة فيه و اسألهم بس متطولش في الدراسة ،، عشان الوقت اهم ،
3- No risk No gain
اعمل حساب أسوأ النتائج و شوف خسارتك هتبقي ايه لو انتا متقبلها و تقدر تستحملها ،، اتكل علي الله
عشان متخوضش في حاجة مش قدها ،،
4- خليك صبور و اعمل فترة زمنية مش قصيرة لتقييم مشروعك و زي ما قال أخ في رد سابق لو قعدت أول سنة أو سنتين ،، اللي جاي علي قد اللي رايح ،، يبقي انتا كده علي الطريق
5- متعملش كل حاجة بنفسك عشان إنجازك هيبقي قد مجهودك ،، ده ممكن يكون في الأول بس ،، لكن كل ما العجلة تسير استعين بموظفين و مساعدين و موردين و غيره ،، و ربنا هيرزقك و يرزقهم ،،
في مثل صيني بيقول لو عايز تكسب كل الفلوس لوحدك مش هتكسب حاجة ،،
6- ممكن نقسم المشاريع لمشاريع تجارية ، و خدمية و صناعية ،،
التجارية ،، أقلهم مخاطرة و متوسطة المكسب ،، و اكثرهم احتياج لرأس مال
اقلهم مخاطرة لأن فلوسك في بضاعة بمعني حتي لو المشروع فشل تماما البضاعة موجودة لكن المكسب محدود بناء علي المنافسة و اكثرهم احتياج لراس مال كل ما كان عندك بضاعة اكثر بتكون اقوي
الخدمية ،، اكبرهم مخاطرة و اعلاهم مكسب و اقلهم احتياج لراس مال
اكثرهم مخاطرة لأن معندكش اي راس مال مثلا لو هتفتح شركة سوفت وير او خدمات او عيادة هتأجر مكان و تدفع اجور عمالة ساعة ماهتكسب هيبقي مكسبك 300% لأنك محتطش راس مال كبير و ساعة ماهتخسر مش هتعرف ترجع و لا نكلة
الصناعية ،، متوسطة المخاطرة ، و ضعيفة المكسب و متوسطة الحاجة لرأس المال
متوسطة المخاطرة لأن بيكون عندك اصول قابلة للتسييل و في نفس الوقت عندك مصاريف عالية دورية لو خسرت متعرفش ترجعها
ضعيفة المكسب لأنك اول يد ،، واحد تاني بياخد من وراك و ممكن يكسب اكتر ده غير مشاكل العمالة و الخامات متذبذبة الأسعار و تاني يد مالهوش دعوه
متوسطة الحاجة لرأس المال و ده طبعا حسب نوعية المشروع و شطارتك فيه
فأفضلهم طبعا الخدمي و لكن ده يحتاج خبرة او مهارة معينة و الأهم طرق تسويق
و اقلهم الصناعي و لا انصح بيه غير مرحلة تانية لمشروع خدمي أو تجاري ناجح ، عشان تضمن التسويق لأنك مينفعش تعمل مشروع صناعي بمصاريف تشغيله العالية و مشاكله ،، و انتا معندكش طرق لتسويقه
7- التميز في المشروع ،،
علي عكس ماناس كتير فاكرة مش عشان مشروع منتشر و ناس كتير عملاه يبقي مخاطرته اكبر ،
بالعكس لو في 1000 فرن عيش يبقي معني كده إن المشروع ده بيكسب و شغالو مش هيفرق لو بقوا 1001
لكن تتميز في الخدمة اللي بتقدمها ،،
بس طبعا لو مشروع فكرته جديدة تماما ، يوم بينجح بتبقي مكاسبه مضاعفة و في نفس الوقت مخاطرته اكبر لأنه مشروع ملهوش سوابق و محتاج وقت اطول عشان تعرف الناس بيه
8- مهما عملت لما تبدي مشروعك هيكون في أوجه قصور ،، عشان كده بقولك متخدش وقت كتير في الدراسة و طور و انتا شغال ،، لأنك هتكون جربت و شفت بنفسك ،، و هتاخد قرارتك اسرع
اسف للإطالة ،،
اتمني اكون افادتك ،،
في برضو مشروع التاكسي ده مربح يعن ي التاكسي بتاع واحد صاحبي بيدخله ماشاء الله من 2200 لـ 3000 جنيه في الشهر بس التاكسي جديد و غاز و السواق أمييين ودي هي أهم نقطة .
--------------------
كمان في المواشي , لو عندك حته أرض صغيرة انشالله 100 متر ممكن تجيب فيها كام معزة على جاموستين وتور كده يكون (شديد) و باذن الله البهايم ممكن تزيد مع الوقت
- ممكن تأجر كام قيراط برسيم جنبك علشان الأكل (لأنه أغلى حاجة في الموضوع)
- أو تشتري كسب و علف و تبن و رجيعة (بالطن) علشان تكون رخيصة .
- طبعا محتاج سايس أمين و محترم و ممكن يزبطك لبن وقشطة و اللذي منه :)
---------------------
شراء الجنيهات الذهبية أثبت في اليومين اللي فاتوا فاعلية كبيرة لأن أسعار الذهب العالمية تقفز باطراد (و لا يمكن انحسارها لزيادة الطلب و قلة العرض يوما بعد يوم).
- سعر الجنيه الذهبي اليوم تقريبا 1060 جنيه مصري.
---------------------
استثمر المال في أولادك , فيكبروا ليصونوا مالك ومالهم (وان كان حصاة جعلوه جبلا)
ولا تستثمر المال لأولادك فيكبروا ليبددوا مالك و مالهم (وإن كان جبلا جعلوه حصاة)
رأى الشخصى أحسن إستثمار فى مصر :
1- العقارات و الأراضى.
2- المطاعم .
3- محطات البنزين .
لإن من الأخر مهما حصل فى البلد دى الناس مش حتبطل تاكل او تدور على شقة أو تمون العربية :D
يا جماعة معظم اللى ردوا شجعوا الاستثمار الخاص طيب الواحد لو في وظيفة وعايز يعمل مشروع ده موش عايز تفرغ وهل الصح الواحد يترك الوظيفة من أجل المشروع
ولو موش عايز تسيب الوظيفة وعاوز بس تستثمر مدخراتك حتى تأني بأعلى عائد ايه احسن حل
أنا عن نفسى حتى الآن مشتت مدخراتى بين البورصة والبنوك والقليل من شراء الذهب وبصراحة البنوك الآن اصبحت فائدتها قليلة جداُ وموضوع الذهب ده استثمار طويل الأجل من وجهة نظري أما البورصة فهي يوم لك و10 عليك علشان كده انا محتار وموش عارف ايه الصح خاصة ان اليومين دول مفيش وظيفة مضمونة وكمان المشاريع الخاصة محتاجة تفرغ وخبرة
احسن اقتراح انك ترمي الفلوس في وديعه في اي بنك و خلاص