الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

موضوع مميز جزاك الله خيرا .

السلام عليكم ...

انا اخوكم م. تامر .... لسة متعلم سواقة جديد بقالى اسبوعين تقريبا و كل يوم اقرا فى موضوعك و لسة مش عارف اخلصه :D ...

الحمد لله بقيت بخرج بالعربية و لوحدى و بروح بيها الشغل كل يوم (( الشغل جنب البيت بس بعتبره تدريب ))

لحد دلوقتى عندى مشكلتين بس فى السواقة ...

1- لما بكون طالع مطلع و لو حتى فيه ميل خفيف ... يا دوب مسافة ما اشيل رجلى من الفرامل الاقى العربية ريحت لورا ... و مرة ريحت على عربية اللى ورايا و كان هيحصل مشكلة مع السواق اللى ورايا

2- الركن ... لحد دلوقتى لما بحاول اركب فى مكان ضيق لازم اخبط العربية او احكها ... رغم انى بقعد حوالى ربع ساعة عشان اركن و مش بستعجل ... انا طبعا بحاول اركن فى الواسع على اد ما اقدر ... بس حضرتك عارف شوارع المحروسة ... مكان ركن ضيق مش موجود فما بالك بالواسع

المشاركة الأصلية كتبت بواسطة husseinoo

اهلا وسهلا بحضرتك

بالنسبة للسؤال الاول
والسيارة متوقفة على مطلع
ممكن يكون كوبرى
شارع مرتفع
اى حاجة تتوقف عليها وتشعر ان العربية ممكن ترجع للخلف ... لازم تعمل التالى:

على طول بلا اى تردد
ارفع فرامل اليد

وخليك ضاغط على الفرامل للاحتياط
وطبعا لو موضوع التوقف عايظول .... يبقى الافضل "تمور" الفتيس .... يعن ماتعشقش الفتيس خالص

انظر من خلال زجاج السياة التى امامك
انظر الى الامام على قدر المستطاع

واول ما تجد ان السيارات البعيد بدأت فى التحرك

استعد
انقل الغيار الاول

اضغط على البنزين

اول ما تسمع صوت الموتور بدأ يعلى حاجة بسيطة
او
العربية بدأت فى التحرك

شيل رجلك من على الفرامل
ونزل فرامل اليد

هاتلاقى العربية اتحركت الى الامام وعمرها ما هاترجع للخلف


توقف على مكان مرتفع
واتمرن على الوضوع ده كثثير وبراحتك خالص

لحد ما تتعود

ما دام فرامل اليد مرفوعة ... عمر العربية ما هاترجع للخلف
وانقل الغيار الاولانى وامشى براحتك
ونزل فرامل اليد عند الشعور بأن العربية عايزة تتحرك أو صوت الموتور بدأ يعلى


لو حصل لا قدر الله العربية بطلت
ارفع فرامل اليد على طول
مور الفتيس
دور العربية
انقل الغيار الاولانى
ارفع رجلك براحة من على الدبرياج واضغط بنزين خفيف
اول ما صوت العربية يعلى شوية
نزل فرامل اليد واتحرك عادى خالص اكنك ماشى فى شارع مستوى

بالنسبة لركن السيارة هاشرحوا مرة تانية فى المشاركة التالية

وكل عام وحضرتك طيب والامة الاسلامية بخير

مع اطيب التمنيات
اخوكم حسين غزالة

الف شكر يا استاذ حسين .. و كل عيد و حضرتك و الاسرة الكريمة بخير

هجرب طريقة فرامل اليد دى ان شاء الله ... بس هل هى مش مضرة ع العربية ؟ و ممكن بعد كدة استغنى عنها و استخدم فرامل القدم فقط ؟

السلام عليكم ...

هحكيلكم عن تجربتى اللى حصلت امبارح عشان نستفاد كلنا ...

امبارح خدت حباية جراءة و قررت اوصل والدتى و اختى من المعادى لحد شبرا ... و دى كانت اول مرة اطلع برة المعادى لوحدى فى مشوار طويل ... الحمد لله المشوار مشى زى الفل مفيش بس الا انى كنت باخد اى بلاعة بقابلها و كنت بمشى بالميدأ اللى حضرتكم قلتوا عليه انى لو قابلت بلاعة او حفرة فى الطريق احسن اخدها بدل ما اغير الحارة بتاعتى فجأة

المهم بعد ما وصلت بامان الله .... الجلالة خدتنى و قلت انا بقيت سواق بريمو و قررت اعمل شهم و اوصل خالتى من شبرا لحد التجمع الخامس ... كنت ماشى كويس الحمد لله لحد فى نص الطريق لقيت العربية بتكركر و بعدين بيطلع دخان من الكبوت و ميزان الحرارة على الاخر و بعدها العربية بطلت خالص و مش راضية تشتغل


لما واحد صاحبي بص ع العربية قالى دى العربية مفيهاش نقطة زيت و كمان الراديتاير مفيهوش مياة .... رغم ان حاطت جيركن زيت كامل من اسبوع واحد بس و المياة باصص عليه الصبح قبل ما انزل ... مش عارف ايه اللى حصل و ازاى الزيت و المياة خلصوا كدة ...

الحمد لله على كل شئ ... بعدها اضطريت اجيب ونش و اخليه يشيل العربية لحد المعادى لان مكنتش عارف اعمل حاجة و مفيش ميكانيكى جنبي ..

الواحد بعد ما كان خد ثقة جامدة فى السواقة رجع يقلق تانى و ادى العربية مرمية فى الجراج و لسة حتى مكشفتش عليها ...ربنا يستر و متكونش حاجة كبيرة لان فيه ناس قلقونى و قالوا كدة ممكن العربية تكون جابت وش سلندر