الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

بسم الله الرحمن الرحيم
اللهم صل على محمد وعلى آله وصحبه أجمعين

كيف تقود سيارتك بآمان
وكيف تصبح سائق جيد

تدريب هام للتحكم فى السرعة
معظم السائقين اللى عندهم خبرة ... يستطيعوا ان يحدد ما السرعة التى يسير عليها ... يعنى لا يحتاج الى النظر الى عداد السرعة طول الوقت عشان يعرف هو ماشى على سرعة كام
بالنسبة للمبتدأين ... يحتاج المبتدأ دائما ان يعرف ما هى السرعة التى يسير عليها ... لكن فى نفس الوقت من المهم انه يطور احساسه بسرعة العربية ... يعنى يحاول يعرف سرعة عربيته خصوصا فى الطريق المفتوح او فى طريق السفر وعلى سرعات مختلفة ... طبعا التدريب ده هايساعدك على عدم تخطى السرعة المناسبة للطريق .. ويسمح لك بالتركيز فقط على مشاكل الطريق .

على سبيل المثال:
عندما تسير على سرعة 50 او 60 او 80 كيلوا فى الساعة .... حاول تشعر بالسرعة خصوصا وانت بتمر بأى حاجة على الطريق ... حاول تشعر بالسيارة ... حاول تدرب حاسة السمع لديك ... حاول تسمع صوت الموتور ورعشة المحرك اثناء السرعات المختلفة .... بدون تخطى السرعة القانونية ....
شوف هل تستطيع تحدد سرعتك بدون النظر الى عداد السرعة ...
جرب الأول وانت راكب بجوار سائق آخر
حاول تقول له احنا ماشيين على سرعة كام ... بعد كده اطلب منه يقول لك السرعة الحقيقية

حاول تدرب نفسك على سرعات مختلفة .. الاول وانت راكب ثم بعد كده وانت سائق

معظم التدريب هايكون على سرعة 50 او 60 او 80 كيلوا فى الساعة ... لان دى هى معظم السرعات التى يتعامل معها اى سائق

حافظ على المسافة بينك وبين السيارة التى امامك

مرة تانية هانشرح الموضوع ده
المسافة اللى هاتقرر انك تتركها بينك وبين السيارة التى امامك ... هى التى تحدد متى ستتوقف سيارتك عندها خصوصا وانت ماشى على الطريق السريع او طريق مفتوح
كل ما هاتمشى بسرعة كل ما حتحتاج مسافة اكبر عشان تتوقف

على سبيل المثال
اذا كنت ماشى على سرعة 90 كيلوا سوف تحتاج الى مسافة مضاعفة لكى تتوقف ... مقارنة مع نفس السيارة لو كانت سرعتك على 60 كيلوا فى الساعة ... ده لو كان الطريق جاف ومافيش اى عوائق على الطريق زى الامطار

ده معناه ايه ... انك تحتاج الى زيادة المسافة بينك وبين السيارة التى امامك خصوصا اذا زادت سرعتك .. اذا ما عملتش كده النتيجة انك هاتخبط السيارة التى امامك من الخلف ... ده لو السيارة التى امامك توقفت مرة واحدة ...
على فكرة الحوادث من النوع ده بتحصل كثيير مع سائقين قدام وعندهم خبرة ....
لكن فيه طريقة ممكن تجنبك مثل هذه الحوادث

الطريقة دى اسمها قاعدة الـ 3 ثوانى

كل اللى هاتحتاجه انك تنظر الى السيارة التى امامك وهى بتمر بجوار اى حاجة مثلا شجرة.
اول ما السيارة التى امامك تمر بجوار الشجرة .. تبدأ على طول فى حساب 3 ثوانى
لو عربيتك وصلت لنفس الشجرة قبل 3 ثوانى ... يبقى فى الحالة دى سرعتك عالية قوى
لو عربيتك وصلت لنفس الشجرة بعد 3 ثوانى ... يبقى المسافة بينك وبين السيارة التى امامك مناسبة جدا

طبعا لو مشيت على طريق فيه امطار مثلا او ليلا ... فى الحالة دى لازم تزيد من المسافة بينك وبين السيارة التى امامك

انظر الى الصورة التالية

فى الصورة تظهر المسافة التى بين سيارتك والسيارة التى امامك ... ودى تقريبا حوالى ثانية واحدة
قريبة جدا وغير آمنة وغيرمناسبة للسرعة التى تسير عليها السيارة وهى 60 كيلوا

انظر الى الصورة التالية

فى الصورة تظهر المسافة التى بين سيارتك والسيارة التى امامها ... ودى تقريبا 3 ثوانى
مسافة كافية وجيدة جدا خصوصا فى الطريق الجيد الجاف

انظر الى الصورة التالية

فى الصورة تظهر المسافة التى بين سيارتك والسيارة التى امامها ... ودى تقريبا 4 ثوانى
مسافة كافية وجيدة جدا خصوصا ان الطريق صعب وغير مثالى


الخلاصة:
هاتمشى بالعربية بسرعة ... هاتحتاج مسافة اكبر للتوقف
استخدم قاعدة الـ 3 ثوانى لكى تحافظ على المسافة بينك وبين السيارة التى امامك ... سوف تزيد المسافة لو كان السير على الطريق ليلا او فى الشبورة او فيه امطار ... الخ

نصيحة هامة:
معظم السائقين يجد ان المحافظة على مسافة 3 ثوانى خصوصا فى زحمة المواصلات عملية صعبة جدا ... وان فيه عربيات تانية ممكن تدخل امامك .. وده بيسبب لك ازعاج كبير ... لكن حاول المحافظة على المسافة بينك وبين السيارة التى امامك بأى حال من الأحوال ... او وسع المسافة اكثر من كده وده هايساعدك للابتعاد عن المشاكل خصوصا فى الزحام ..... يعنى انت شايف ان امامك تجمع من السيارات داخل على زحمة مثلا إِشارة .. خلاص احاول اهدى انا شوية .... لحد ما العربيات تتجمع امامى ... واكون انا فى المؤخرة بعيدا عنهم واسير خلفهم.

على فكرة انا فيه عربيات كثيرة قوى ... الاحظ انها تفضل السير خلفى ... ولمدة طويلة ... حتى ولو كان الطريق خالى ... الله اعلم يمكن شاعرين ان الواحد بيمشى بشىء من العقل وعدم التهور ... فاكرين قاعدة "استمر فى السير" ..... يعنى خليك مستمر فى السير حتى ولو كان بشكل هادىء ... احسن من انك تجرى وتلزق للعربية التى امامك ثم تتوقف ثم تبدأ فى التحرك مرة تانية من وضع الوقوف.

فى انتظار التواصل

مع اطيب التمنيات
اخوكم حسين غزالة

بسم الله الرحمن الرحيم
اللهم صل على محمد وعلى آله وصحبه أجمعين

اولا شكرا لجميع الاصدقاء على كلماتهم الجميلة التى اعتبرها احسن تشجيع للاستمرار فى الموضوع ... بارك الله فيكم وشاكر افضالكم.

كيف تقود سيارتك بآمان
وكيف تصبح سائق جيد

حافظ على مسافة كافية بينك وبين السيارات التى بجوارك

عملية المحافظة على مسافة كافية بينك وبين السيارات التى بجوارك تعتبر من اساسيات نظرية "الوسادة الهوائية" حوالين عربيتك .. فاكرينها ؟

فى حالة انك توقفت فجأة او انحرفت بالسيارة مرة واحدة .. المساحة الخالية بجوار سيارتك هاتساعدك انك تتحرك بحرية .
المساحة الخالية بجوار سيارتك هاتجنبك الاصطدام مع السيارات الأخرى اثناء وجود اى مشاكل على الطريق.
حاول تترك على الأقل مسافة 1 متر واحد بينك وبين السيارات الأخرى او حتى السيارات المتوقفة على جانب الطريق.
الموضوع ده مهم جدا خصوصا لو كنت ماشى بجوار سيارات متوقفة على جانب الطريق .. لماذا ؟
لانه ممكن فى اى وقت تلاقى باب عربية بيتفتح مرة واحدة ... ومهم كمان خصوصا وانت بتمر من اى سيارة على اى تقاطع.


يعنى انت داخل على تقاطع ... طبعا اسوء مكان هو الحارة القريبة من السيارات الموجودة فى الطريق المتقاطع معاك ... بتحاول تبعد شوية عن السيارات المتاقطعة معاك .

على فكرة ترك مسافة معقولة بينك وبين السيارات التى بجوارك مهم لتجنب مشاكل راكبى الدراجات البخارية والهوائية ... احسن ما يظهر لك واحد منهم خصوصا بتوع "الدليفرى" وانتم عارفين دول بيمشوا ازاى ...


تجنب السير بجوار السيارات الأخرى

احنا بنتكلم على قاعدة فى القيادة بتقول انه موش مستحب انك تسير بجوار سيارة اخرى ... كلام علمى ... لماذا ؟
موش مستحب ابدا انك تسير بعربيتك بجوار سيارات اخرى حتى ولو كان الطريق متعدد الحارات ... فيه اكثر من كده كلام.
انظر الى الصورة التالية

فى الصورة يظهر امامك عربيتين ... ويوجد بينهم مساحة صغيرة لا تسمح بمرور سيارتك بأمان لذلك لازم تحافظ على مسافة كافية على اجناب العربية ... المسافة دى هاتعطى لك فرصة بتجنب مشاكل المرور وتجنب التوقف بشكل قوى ومفاجىء ... يعنى انت شايف ان الطريق لا يسمح بالمرور ... ورغم ذلك تحاول المرور بأى شكل والنتيجة موش كويسة ... او على الأقل هاتتوقف بشكل جامد ويعرض عربيتك للخطر خصوصا لو كان فيه عربيات قادمة من الخلف "ولازقة" فى عربيتك ربنا يحفظ الجميع.


فى الصورة يظهر ايضا ان وجود اى سيارات على يمينك او شمالك او على الجانبين ... يعوق الرؤية ... يعنى مثلا فيه سيارة امامك من الناحية اليمين فى الحالة دى لو فيه اى تقاطع ناحية اليمين ... وخرجت منه اى عربية .. فى الحالة دى انت موش هاتشوفها خالص.


الخلاصة: صعب جدا ومن الخطر ان تسير مسافة كبيرة وبجوارك سيارات اخرى على الطريق ولا يوجد مسافة كافية بينك وبينهم ... الحالة الوحيدة التى من الممكن السماح بالسير مسافة طويلة هى الزحام .. لانك فى اى وقت تستطيع التوقف بسهولة .. لانك تسير اصلا بشكل بطىء ومافيش اى مشاكل انك تمشى بعربيتك وبجوارك اى عربية اخرى.


الخلاصة:

• اترك مسافة متر على الاقل بينك وبين السيارات الموجودة على الاجناب ناحية اليمين والشمال

• تجنب السفر والسير على الطرق المفتوحة بجوار اى سيارة خصوصا الاوتوبيسات وسيارات النقل

• اترك مساحة كافية لراكبى الدراجات البخارية والهوائية للمرور بجوارك.

ارجو ان اكون وفقت

فى انتظار التواصل

مع اطيب التمنيات
اخوكم حسين غزالة