الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة hesham90

السلام عليكم ورحمة الله وبركاته

كلامك زين العقل وكنت بافكر بنفس الاسلوب وبحلم نفس الحلم طب ليه مافيش فعلا مدارس محترمة كده ويكون عندها امكانيات عالية ذى حوش مدرسة او ملعب كورة ويكون متخطط صح لمواجهة كل الظروف المحتملة واهم حاجة مدرب كفء محترم فاهم اصول التعليم ومتعلم مهندس مثلا

هو فى الحقيقة فى الخارج فيه مدارس لإعداد المدربين ... يعنى موش اى واحد يعلمك القيادة ... لازم اللى يعلمك القيادة يكون حاصل على شهادة "تدريب" تثبت كفاءته فى عملية التدريب والتعليم ... ده طبعا بخلافنا تماما ... اى حد عايز يعلم قيادة السيارة بيركب بجوارك ويتوكل على الله ههههههههههه

او فنى سيارات مش سواقين مش عارف جايبنهم منين

هو فى الحقيقة عندنا سواقين عشرة على عشرة ممتازين ... لكن زى ما اتفقنا ان موش كل سائق جيد يستطيع تعليمك او يستطيع توصيل المعلومة ... لان التدريب ده عايز صبر وعايز منهج علمى ومحتاج التدريج من السهل الى الصعب ومن البسيط الى المركب حاجات كثيير قوى ... لو قابلت سائق ممتاز وموهوب فى عملية التدريب ده يبقى شىء هايل وجميل لكن صعب شوية ... اعتقد ان المهم انك تكون عارف انت عايز ايه والمرحلة اللى بتتعلم فيها محتاجة ايه ... ولا اتخطى مرحلة الى اخرى ما دمت انا حاسس انى موش تمام .... يعنى مثلا انا حاسس انى موش تمام فى موضوع اليوتيرن ... خلاص ما انقلش الى موضوع آخر مثل صعود الكبارى ... لازم انهى المرحلة اللى انا فيها مية مية ... وبعدين انقل نفسى الى مرحلة اخرى

ولا عربيات لاتصلح اطلاقا للتدريب

ههههههههه فعلا العربيات محتاجة عربيات هههههههه يعنى عربيات "كفرانة" ... واصدقائى يقولوا لى: عشان لو ركبت عربية قديمة تقدر تتعامل معاها ههههههههههه لكن اعوذ بالله دى موش عربيات ابدا ... آخرها واحد جارى كان بيكلمنى فى الشغل كل يوم "يشتكى" من سوء العربية ومن سوء المدرب وانه آخر ما غلب من المدرب قال له: انا شايف انك تاخد منى سيجارة وتروح تجلس على الرصيف هههههههههههه تريح اعصابك شوية هههههههههههههه وتسيبنى انا اعيش شوية مع العربية قلت له: طيب انت ليه ما فتحتش مخك معاه واعطيته اى فلوس قبل التدريب عشان يشتغل معاك بنفس هههههههههه قال لى: عملت زى ما انت قلت لكن مافيش فايدة السواق عصبى جدا .... قلت له: يمكن العربية عشان قديمة مطلعة عنيه ... قال لى: هى العربية تطلع عينيه وهو يطلع عينية ههههههههه

وبالمناسبة نزلت النهاردة الخميس 29 يوليو علشان اتمرن شوية مرة فى الاسبوع ولكن للاسف مستواى كان وحش ومافيش تقدم وكل اللى اتعلمته فى المنتدى وحاولت اطبقه معرفتش وكنت ضارب لخمه على الاخر ولما جيت اركن حسيت انى ماتعلمتش اى حاجة واكنى جديد لنج مع انى اقبل كده كنت تمام

ما هو حضرتك لو المدة طولت قوى بين كل حصة وحصة ... كده هاتنسى اللى اتعلمته ... يعنى لو كنت جديد على الاقل هاتحتاج حصتين او ثلاثة كل اسبوع ... ولما تتعلم كويس ممكن على الاقل تخرج بالعربية مرة كل اسبوع زى حالاتى بخرج بالعربية مرة كل يوم جمعة واذا ظهر اى مشوار مافيش اى مشاكل اخرج بالعربية لكن فى توقيت اكون عارف ان الشوارع رايقة فيه وموش زحمة قوى ... وبدون استعجال

يعنى مثلا حاولت اجرب افرمل قبل المطب بدون دبرياج فرملة على خفيف وكنت عل التانى وحبيت انفذ التعليمات فرملة خفيفة دبرياج اديها الاول علشان المطب كان عالى الغيار ماجاش معايا والعربية كانت ساحبة شوية ورجرجة جامدة والعربية حتبطل وكانت حكاية................*

بالنسبة للمطب الصناعى ... لازم يكون لحضرتك نظرة خاصة يعنى ايه ... يعنى مثلا انت شايف ان المطب ده عالى قوى وجامد ... يبقى خلاص اهدى جدا جدا جدا قبل المطب ... لدرجة انى احيانا عشان العربية يابانى "وواطية" شوية هههههههههه يعنى منخفضة الارتفاع شوية موش اخلاقها وحشة ولا حاجة هههههههه المهم فى الحالة دى بهدى العربية جدا جدا جدا لدرجة بكون شبه متوقف وانقل الغيار الاول واطلعى على المطب فى منتهى الهدوء لحد ما اخرج منه ...... فيه مطبات تانية موش محتاجة كل ده لو انا داخل عليها على الغيار التانى مافيش مشاكل كل المطلوب ادخل عليها بهدوء شوية حتى ولو عديت عليها بالعجلتين الامامية والخلفية مافيش اى مشاكل .... وفيه مطبات بسيطة جدا موش محتاجة تغير الفتيس خالص بتمشى عليها زى ما انت ... يعنى لازم تشوف المطب شكله ايه وتبدأ تقرر انت هاتدخل على المطب ده على اى غيار الاول ولا التانى ... طبعا لو رفعت رجلك من على الدبرياج وفى نفس الوقت لم تضغط بنزين خفيف العربية هاترج منك وممكن تتوقف ... يعنى وانت طالع على المطب عشان العربية ما ترجعش للخلف ارفع رجلك من على الدبرياج وثبت رجلك على البنزين


المهم الحكاية كملت فى الركنة اكنى اول مرة اركن مع انى كل اسيوع بركن عادى فى ثوانى

هههههههههه طيب ايه اللى اتغير ما انت كنت كويس جدا

النوبة دى ربع ساعة وانا لا عارف شمالى من يمينى وعايز احضن شمال قالااينى روحت يمين واحضن يمين قالااينى روحت شمال وحكة بسيطة فى العربية اللى راكنة على شمالى وكان مغطيها فمحصلهوش حاجة وعربيتى حكة بسيطة الحمد لله-------- اخيرا هو الواحد حيفضل على كده لامتى وهل السبب قيادتى للسيارة والتعلم مرة كل اسبوع او عشرة ايام مش عارف

عشر ايام ده كتيير قوى ... على الاقل مرتين كل اسبوع لو انت جديد ... ولو انت عندك فكرة كويسة قوى خلاص على الاقل مرة كل اسبوع

وهل لو كل يوم ساعة يبقى احسن

لو كل يوم ساعة ... ده انت تبقى عشرة على عشرة وهاتكون ممتاز خلال شهر واحد

وبصراحة اصل انا خايف عللى العربية

عندك حق ... الخوف على العربية ده سبب اساسى فى عملية القلق عند كل المبتدأين

وكمان بنزل لوحدى علشان مش عارف حد وطبعا زى ماقلت فى المشاركة السابقة مدرسة القيادة الخاصة ماتعلمتش حاجة وعلى فكرة عربيتى ماتريكس2002

طيب ما تغير مدرسة القيادة دى ... وشوف غيرها ... او على الاقل ممكن تجرب مرة واحدة وتدفع حصة واحدة لو وجدت ان المعلم كويس استمر فى الكورس ... لو وجدت انك لا تستفيد منه خلاص غير المدرسة وشوف حد تانى .... وما دام حضرتك عندك السيارة ممكن تشوف سائق جيد بدون الاستعانة بأى مدرسة قيادة .... يعنى تشوف سائق كويس يركب معاك عربيتك ويعلمك عليها ولو كان سائق تاكسى هايكون مية مية ... يعنى بدل ما يلف بالتاكسى هايركب معاك ساعة ولا ساعتين كل يوم او يومين وهايعلمك كل حاجة وفى نفس الوقت هاتتعود على عربيتك وهاتفهم العربية كويس اما لو كنت خايف عليها قوى ... يبقى مافيش غير مدرسة القيادة وعربياتها التعبانة ههههههههههه تخبط فيها وما يهمكش حاجة

واقطن بشبرا الخيمة وتقبلوا خالص تحياتى الى المشاركة القادمة


مع اطيب التمنيات
اخوكم حسين غزالة

المشاركة الأصلية كتبت بواسطة magid1010

السلام عليكم ورحمة الله وبركاته

ازيك يا استاذ حسين وحشنى كتير

الله يكرمك يا ماجد وانت عامل ايه .. إن شاء الله تكون بخير

المشاركة الأصلية كتبت بواسطة magid1010

متشكر جدا جدا على موضوع الركنة انا نزلت امبارح بالعربية و كان الشارع زحمة جدا فمشيت براحة جدا عن طريق انى دايس دبرياج و فرامل و مغير على الاول كل ما اشيل رجلى من على الدبرياج العربية تتحرك و ارجع ادوس فرامل علشان تقف و لكن واحد صحبى قالى مور لمل تيجى تقف ولما تتحرك ارجع ادى اول علشان تحافظ على اسطوانة الدبرياج وهكذا لكن دة صعب جدا خصوصا مع مبتدا زى

موش صعب ولا حاجة
كل الحكاية انك لو شعرت ان عملية التوقف هاطول شوية ... طبعا على طول بدون تردد "مور" الفتيس عشان تريح العربية ... لكن لو العربيات كانت ماشية بسرعة هادئة جدا يبقى اللى انت بتعمله ده صح وعشرة على عشرة ... لو كانت العربيات ماشية بطىء قوى لكن فى حدود 20 كيلوا .. خلاص فى الحالة دى لو كان هناك فرصة تعطى العربية الغيار التانى يكون افضل ... يعنى لو عملية السير البطىء دى هاتستمر كثير يبقى الافضل تعطى الغيار التانى على طول بدون تردد

وفى اى حال من الاحوال .. حاول ترفع رجلك من على الدبرياج بالكامل إذا قدرت بدون ما تتوقف العربية ده يكون افضل بكثير

يعنى فيه سائقين بمجرد العربية ما اتحركت على طول يغير على "الغيار الثانى" ويستمر فى السير مهما كان بطىء ..

العربية هاتبطل منك لو وقفت تماما وانت لم تضغط على الدبرياج سواء كنت على الاول او التانى او اى غيار

الاهم من ده كله ايه
لو "مورت" الفتيس
عينك على طول على إشارة المرور
وكمان عينك على العربية اللى امام العربية التى امامك
يعنى انظر على العربيات المتوقفة بعيد عنك ... واول ما تشوف ان العربيات بدأت تتحرك .. على طول انقل الغيار الاول وكن مستعد واتحرك على طول ... يعنى لا تنتظر لما العربية اللى امامك تتحرك ... لازم تنظر على العربيات التانية اللى امام العربية اللى امامك عشان تلحق تمشى مع باقى العربيات بدون اى مشاكل
وفى الحالة دى مافيش اى خوف انك "تمور" الفتيس عند اللزوم وده يكون افضل للسيارة طبعا
ممكن درس فى موضوع المشى بطئ بالصور
لو وجدت اى جديد هانعرضه إن شاء الله

؟وشكرا لحضرتك

لا شكر على واجب .. المهم نسمع اخبارك على طول وإن شاء الله تكون خير


مع اطيب التمنيات
اخوكم حسين غزالة

بسم الله الرحمن الرحيم

اللهم صل على محمد وعلى آله وصحبه أجمعين


كيف تقود سيارتك بأمان

وكيف تصبح سائق جيد

المسافة الآمنة عند المرور من السيارة التى امامك
يعتبر المرور من السيارة التى امامك عملية تحتوى على بعض الصعاب خصوصا فى السير على الطريق السريع ... وتزيد المشكلة إذا كان الطريق ليس مزدوج ... يعنى شارع واحد والسيارات بتسير فيه فى اتجاهين فى نفس الوقت .. وبيكون الشارع فى الغالب حارتين فقط ... حارة للذهاب وحارة للسيارات القادمة "مثل طريق الصعيد" على سبيل المثال
إذا لا قدر الله لم تستطيع تقدير المسافة بالنسبة للسيارة القادمة .. سوف تكون النتائج سيئة للغاية ... ربنا يحفظ الجميع
المشكلة الكبيرة ان حجم تصادم سيارتين على سرعة 60 كيلوا لكن بالمواجهة تكون اكبر وتوازى تصادم سيارتين على سرعة 120 كيلوا فى الساعة ... تخيل حجم التصادم وقوته .. اعوذ بالله ربنا يسترها معانا.

انظر الى الصورة

انت تحتاج إلى مسافة لتجنب التصادم مع السيارة التى امامك .... اختيار "الفجوة" الآمنة قبل المرور من السيارة التى امامك يعتبر مفتاج اساسى لهذه المهارة .. فأنت تحتاج الى الوقت والتدريب الجيد جدا.

المرور من السيارة التى امامك مشابه الى حد كبير من المرور من اى سيارة اخرى على طريق مزدوج او طريق متعدد الحارات "طريق طوالى سريع" ولكنه يحتوى على مخاطر كبيرة لان عملية المرور بتكون على طريق واحد حارتين فقط ... وعند المرور فأنت تذهب الى الطريق المقابل العكسى للسيارات القادمة .


بعض التحذيرات
قرار المرور من السيارة التى امامك او الاستمرار فى السير خلفها يعود إليك ... الوقت الذى تحتاجة للمرور يتوقف على سرعتك ... واحيانا كثير تحتاج الى المرور من سيارات متوقفة او اى مشكلة فى الطريق .... احسن حاجة تعملها انك تتذكر انك موش مجبر تمر من السيارة التى امامك إلا إذا كنت مجبر على كده ... يعنى لو انت موش متمكن مافيش اى مشاكل انك تفضل ماشى خلف السيارة التى امامك .... إلى إذا كنت مجبر تمر من السيارة التى امامك بسبب توقفها او وجود عطل فيها .... وعلى فكرة انا من النوع ده ... مابحبش اعمل حركات عالفاضى .... مافيش اى مشكلة انى استمر فى السير خلف السيارة التى امامى حتى ولو كانت سرعتها اقل منى بحاجة بسيطة ... مافيش اى مشاكل افضل من الدخول فى مغامرات واحاول تقليد الآخرين وانا مازلت مبتدأ فى عملية القيادة وموش هاوفر وقت بعد كل المغامرات دى ... يعنى عربيات ماشية على سرعة فى حدود 100 كيلوا ممكن تكون انت ماشى 80 كيلوا مافيش اى مشاكل وموش هاتفرق فى الوقت خالص ... المهم انك توصل بالسلامة.

انظر الى الصورة

تذكرت احد الزملاء اشترى عربية جديدة ... وخلال شهر قرر انه يسافر بها على طريق الصعيد ... طريق يشبه الصوره ... طبع للاسف صاحبنا انقلب بالعربية .. خرج عن الطريق لتجنب التصادم هههههههههههههههههه المهم ربنا ستر ... انا حتى الآن خايف اسافر بها بلدنا ... لأن فيه مسافة الطريق فيها يشبه الصورة تماما ... على إيه لما الواحد يتمكن كويس جدا ويفهم الموضوع ده ممكن يفكر انه يسافر .... الصبر جميل والعملية موش "فتح صدر" ههههههههههههه والواحد عايز يعمل فيها معلم وخلاص ....



المهم نرجع لموضوعنا
من الحاجات المهمة ايضا هو موضوع "ابعاد العربية" .... حجم العربية اللى انت عايز تمر منها ... ومدى قدرة سيارتك على زيادة سرعتها ...

على سبيل المثال:
المرور من سيارة عادية يأخذ من الوقت اقل من المرور من سيارة نقل او من سيارة شاحنة حاوية زى ما هو ظاهر فى الصور ... السيارة النقل او الاوتوبيس يحتاج من الوقت 3 اضعاف وقت المرور من السيارة الملاكى ... ونفس الشىء تحتاج من الوقت الى 5 اضعاف وقت المرور من السيارة الملاكى اذا كنت عايز تمر من سيارة شاحنة حاوية ... احيانا تحتاج الى 9 اضعاف الوقت العادى.
انظر الى الصورة

تذكر ان:
ان السيارة التى لا تستطيع زيادة سرعتها .... سوف تحتاج الى وقت اطول لكى تمر من السيارة التى امامها ........ هههههههههههه وتظهر المشكلة بحجمها الحقيقى على الطريق السريع الطوالى ... انتم فاكرين انا كنت ماشى على 80 او 85 احيانا ورغم ذلك لا تشعر بأن تسير بسرعة خالص خصوصا على الطريق السريع ... طبعا السرعة دى داخل المدينة ممكن تحس انك بتجرى جامد ... لكن على الطريق الطوالى تشعر انك راكب "سحلفاة" ههههههههههه الحمد لله على كل حال .... ما بالك لما تحب تمر من اى سيارة امامك ... لازم تفكر كويس جدا .

ارشادات عند اختيار "الفجوة" الآمنة قبل المرور من سيارة اخرى
نظرا لأن عملية المرور من السيارة التى امامك عملية معقدة وتحمل بعض المخاطر لازم تراعى التالى:

• حالة الطريق هل يوجد زحام ام الطريق معقول والعربيات التى تسير عليه قليلة ؟

• ابعاد وحجم العربية التى ترغب فى المرور منها

• سرعة عربيتك القصوى التى ممكن الوصول اليها .. يعنى عربية 1300 سى سى اكيد سرعتها اقل من عربية 2000 سى سى

طيب انت هاتقول لى انت عقدتها خلاص ههههههههههههههه هاقول لك لأ لسه شوية هههههههههههههههه والحل ممكن يكون بعد التدريب التالى:

ممكن ببساطة تتمرن على موضوع المرور على طريق يكون فيه اكثر من حارة .. وده الخطورة فيه هاتكون طبعا اقل من الطريق الموضح فى الصور السابقة .... لكن اذا كنت لا تشعر بالثقة فى المرور من السيارة التى امامك او حاسس انك موش مرتاح للحكاية دى .. خلاص انسى تماما وماتحاولش تعدى من العربية التى امامك ههههههههههههه "من خاف سلم"

الخطوة 1 عند المرور من السيارة التى امامك على طريق متعدد الحارات
ابحث على طريق تكون السيارات تسير عليه بسرعة 60 او 70 كيلوا فى الساعة ويكون الشارع فيه حارتين رايح وحارتين جاى ... يعنى حارتين للسيارت الذاهبة وحارتين للسيارات القادمة ... شارع حلو كده ويكون واسع
المهم ابدأ التدريب على المرور من السيارات الملاكى الصغير ... واحسب الوقت الذى تحتاجه سيارتك للمرور من سيارة صغيرة اخرى ... بعد كده ممكن تتمرن على المرور من سيارات كبيرة شوية مثل الاوتوبيسات او السيارات النقل او الحاويات الكبيرة .. وتحسب الوقت الذى تأخذه سيارتك عند المرور

الخطوة 2 عند المرور من السيارة التى امامك على طريق متعدد الحارات

انك تنزل طريق متعدد الحارات وواسع زى ما هو واضح فى الصورة
المهم ... تنزل فى وقت يكون حركة السيرة خفيفة ... والجو يكون حلو يعنى مافيش شبورة ولا امطار والدنيا نهار وميت فل وعشرة ههههههههههههه .... وتبدأ تحسب الوقت اللى هاتخده العربية القادمة لحد ما توصل لعربيتك ......... تعتبر العربية القادمة فى الطريق العكسى انها قادمة فى نفس طريقك وتحسب هاتاخد وقت اد ايه لحد ما توصل لك.... ابدأ عملية الحساب اكثر من مرة ... ولاكثر من نوع عربية ... مرة تحسب مثلا العربية الملاكة دى هاتوصل بعد 3 او اربع ثوانى ... العربية النقل دى هاتوصل لى بعد 6 ثوانى ... وهكذا ...


الخطوة 3
انت الآن تدربت على موضوع المرور من السيارت على الطرق متعددة الحارات ... فى الخطوة 1 انت حسبت الوقت الذى تأخذه سيارتك عند المرور من السيارات الاخرى مثلا 12 ثانية تقريبا من اول ما اعطيت اشارة مرور حتى الأنتهاء من عملية المرور والعودة مرة تانية لنفس الحارة التى تسير فيها . ....
انظر الى الصورة

يعنى مثلا لو كانت عربيتك هاتحتاج وقت 12 ثانية للمرور من السيارة التى امامها تقدر تضيف كمان 3 ثوانى احتياطى يبقى كده انت هاتحتاج وقت حوالى 15 ثانية للمرور من السيارة التى امامك
انظر الى الصورة

لو افترضنا ان السيارة الصفراء قادمة فى نفس طريقك ... فى الحالة دى عملية المرور من السيارة الزرقاء ليس آمنة تماما ... الموضوع محتاج الى تدريب جامد جدا وحساب كويس قوى ....


نصيحة هامة
للمرور من السيارة التى امامك تحتاج الى حساب الوقت الذى تستغرقه سيارتك فى عملية المرور بالإضافة الى 3 ثوانى احتياطى لكى تكون عملية المرور آمنة تماما
اذا كنت تشعر بعدم الراحة او الآمان من عملية المرور من السيارة التى امامك ... خلاص من خاف سلم وكبر دماغك واستمر فى السير .

طبعا خطورة الموضوع ده بتظهر على الطرق الزراعية والريفية الصغيرة ... ويفضل المرور من السيارات البطيئة فقط مثل الجرارات الزراعية وفى الاماكن المناسبة فقط مثلا يكون الطريق مستقيم ولا يوجد عليه اى معوقات مثل المطبات او امطار وتكون المسافة "الفجوة" التى تحتاجها آمنة بما فيه الكفاية وربنا يحفظ الجميع.



ارجوا ان اكون وفقت


فى انتظار التواصل




مع اطيب التمنيات
اخوكم حسين غزالة