مركز التدريب بجوار معرض الكتاب

**mahmoudbadr** · 02-03-2010 03:01 PM

السلام عليكم أخوانى القاهرينن

أرجو مساعدتى فى الوصول لمركز التدريب التابع للزمالة المصرية بجوار معرض الكتاب فى مدينة نصر

إن شاء الله هاجى من اسكندرية صحراوى

شكرا مقدما

**amrfox2002eg** · 02-03-2010 05:53 PM

السلام عليكم
انا هوديك عند معرض الكتاب وانت تكمل
انت جاى من اسكندرية الصحراوى بعد البوابات هاتلاقى المحور فى وشك هاتعدى من تحتيه وتلف اول يوتبرن وتطلعه انت كده ماشى على المحور اتجاه المهندسين هاتلاقى الطريق الدائرى فى وشك هاتعدى من تحتيه وتطلعه من على يمينك انت كده على الدائرى اتجاه المرج وطريق السويس هاتمشى على الدائرى على طول هايقابل نزلة القومية العربية وبعديها نزلة الوراق وبعديها نزلة القناطر الخيرية وبعديها نزلة المؤسسة وطريق اسكندرية الزراعى هى ديه اللى هاتنزلها هاتمسك اول نزلة يمين هاتلاقيها نصف قوس هاتتنزل وتكمل على طول انت كده رايح على المؤسسة هاتكمل وتعدى اشارة المؤسسة وتكمل يمين وتمشى انت كده على كورنيش النيل هاتكمل هايقابلك كوبرى المظلات هاتطلعه وتنزل اول ما تنزل دور على اول يوتيرن شمال ولف وارجع تانى وخد يمينك هاتلاقى دخلة يمين مكتوب عليها مدينة نصر هاتلاقيها قبل الكوبرى على طول هاتخشها وتكمل على طول هاتقابلك اشارة الخلفاوى تعديها وتكمل على طول هايقابلك كوبرى ابووافية هاتطلعه وتنزل وتكمل على طول هايقابللك كوبرى بورسعيد - الوايلى هاتطلعه وتنزل منه وتكمل على طول هايقابلك كوبرى القبة هاتطلعه وتكمل على طول هايقابلك كوبرى الفنجرى هاتطلعه وتنزل وتكمل على طول هاتلاقى الاستاد على شمالك وارض المعارض على يمينك واول اشارة هاتلاقى مسجد ال رشادن للقوات المسلحة فى وشك هاتخش يمين انت كده معرض الكتاب بقى على يمينك واعتقد المركز اللى انت رايحه فى الشارع ده
ارجو ان اكون اوضحت

**بحري** · 03-03-2010 12:35 AM

معلش يا أستاذ عمرو الراجل ده اسكندراني زي حالاتي ووصفة حضرتك تمام جدا بس ممكن تجيبله صدمة لاسيما لو أول مرة يروح لأن اسكندرية غير القاهرة خالص...

- بعد بوابة الصحراوي حتلاقي المحور بتفوت الطلعة الأولى وتعدي من تحته
- بتطلع الطلعة التانية يمين في يمين بتلاقي نفسك على المحور في اتجاه المهندسين
- تفضل ماشي على الطريق ده على طول وتطلع وتنزل مع الكباري بدون أي خروج من نزلات الكباري يمين خليك ماسك شمال على طول
- عند آخر الكوبري ترى على يمينك مبنى وزارة الخارجية (مبنى أبيض ومرتفع وضخم)
- تنزل آخر الكوبري ودي منطقة بولاق أبو العلا
- بتفضل ماشي مع الطريق لنهايته وتدخل يمين إجباري عند التقاطع
- تصل إلى ميدان عبد المنعم رياض (فندق هيلتون رمسيس وكام واحد بيبيعوا ورد) وحتلاقي قدامك مطلع كوبري أكتوبر متطلعوش
- وإنت واقف هناك اسأل فين مطلع كوبري أكتوبر في اتجاه مدينة نصر
- حيشاورولك على مطلع سري ومستخبي وزحمة جدا في نفس الوقت وحتلاقيه جنبك موازي ليك ولكن في الاتجاه العكسي
- حتحتاج تلف شمال في شمال حوالين جراج الأتوبيسات عشان ترجع للنقطة اللي كنت واقف فيها تاني
- ادخل شمال من تحت الكوبري ولف مع العربيات حول ساحة جراج الأتوبيسات وحاول تركز عشان تطلع الكوبري صح
- بتفضل ماشي على كوبري أكتوبر وتنزل نزلة العروبة حتلاقي المعرض على يمينك بعد مستشفى العباسية
- بتلف من وراء المعرض يمين في يمين حتلاقي نفسك عند المركز إن شاء الله
بالتوفيق

**Ahmed A Rahman** · 03-03-2010 01:36 AM

تمام كده بعد ما تنزل نزلة العروبة حتلاقي مستشفى العباسية للصحة النفسية : بعديها ادارة الاستثمار : بعديها معرض القاهرة

أول المعرض ما يخلص حتخش معاه يمين (من جنب منزل كوبري الفنجري)

حتمشي ثاني طوالي وبرضه المعرض على شمالك لغاية ما يخلص (حتلاقي مسجد آل رشدان على الناصية اللي ادامك

خش مع المعرض يمين وامشي معاه ثاني وخليه على يمينك

اول ما حيخلص حتلاقي شارع جنب المعرض على طول قبل نهاية الشارع

ادخل في الشارع 200 متر حتلاقي مركز التدريب (وزارة الصحة)

هو شكله حلو عامل زي مجلس الشعب كده وليه قبه كبيرة