سؤال ساذج بالنسبة لـ rpm في اللانوس

**Sw0rdD** · 10-03-2010 09:45 AM

السلام عليكم
في سيارتي القديمة "ريجاتا" كان rpm عطلان.
بعد أن رزقني الله باللانوس.. لا أعلم ما هي وظيفة الــ Rpm و كيف يفيد في عملية نقل الغيارات من الأول للثاني للثالث.. و كيف يفيد في اقتصاد البنزين.. قرأت بعض المشاركات في المنتدي و زادت حيرتي.. برجاء المساعدة .. بأسلوب سهل لمن معلوماته عن الـ rpm صفر.
حياكم الله

**zomzom11** · 10-03-2010 12:36 PM

اهلا بسيادتك اول عربيه ليا كانت ريجاتا والحمد لله بعتها وجبت اكسنت ثم كليو ثم لانوس الحمد لله
ال ار بى ام ده يدلك عن عدد لفات الموتور والمفروض فى الطبيعى يكون فى السلانسيه تحت الواحد يعنى .7 ولو ذاد يبقى العربيه عاليه ده فى السلانسيه
اما للغيارات كل غيار بيبدأ المؤشر فيه من فوق 1 يعنى مثلا 1.5 يعنى 1500 لفه ويزيد بزيادة السرعه ويتخطى ال 2 ويوصل لل 3 يعنى 3000 لفه وهنا يبدا صوت الموتور يعلى معاك حسب حالة الموتور وهنا ممكن تقرص شويه او تغير لسرعه اعلى فيبدأ ينزل المؤشر ويبدا من جديد مع زيادة السرعه
اول ما اتعلمت علمونى اغير الفتيس على ال ار بى ام وفى ناس بتغير على السرعات يعنى 0-20 لاالول ومن 20-40 التانى ومن 40 -60 التالت ومن 60 ل 80 الرابع ثم الخامس
وفى ناس بتغير على حسب صوت الموتور وكل الى فات واحد
ربنا يوفقك ويوفقنا والف مبروك عليك

**محمد الشامي** · 10-03-2010 12:46 PM

المشاركة الأصلية كتبت بواسطة Sw0rdD

السلام عليكم
في سيارتي القديمة "ريجاتا" كان rpm عطلان.
بعد أن رزقني الله باللانوس.. لا أعلم ما هي وظيفة الــ Rpm و كيف يفيد في عملية نقل الغيارات من الأول للثاني للثالث.. و كيف يفيد في اقتصاد البنزين.. قرأت بعض المشاركات في المنتدي و زادت حيرتي.. برجاء المساعدة .. بأسلوب سهل لمن معلوماته عن الـ rpm صفر.
حياكم الله

اخي الكريم سؤالك مش ساذج ولا حاجه ومهما كنت حاسس ان السؤال صغير لكن ممكن تكون الافاده من وراه كبيره للكثير

الار بي ام بيستخدم لتوضيح عدد لفات الموتور في الدقيقه , ودايما بتلاقي عداد الار بي ام مكتوب عليه 1 - 2 - 3 - ..... وفي نص العداد مثلا بتلاقي مكتوب X1000 وده معناه انك بتضرب الـ 1 -2 -3 ...... في 1000 , يعني لما بيكون المؤشر على 2 فده معناه ان الموتور بيولد 2000 لفه او دوره في الدقيقه الواحده

والار بي ام بيساعدك في الحفاظ على اداء عربيتك عند عدد لفات معين
يعني مثلا لما تكون على السرعه ثالثه المفروض اقصى وصول للمؤشر عند 3000 دوره في الدقيقه وبعدها تنقل للنقله التاليه (حفاظاً على الماكينه) وهكذا , وده كمان بيساعدك في انك تتعامل بشكل اقتصادي مع عربيتك
يعني لو انت ماشي على الرابع ومؤشر الار بي ام على 3000 لفه/ الدقيقه وسرعتك 100 كم/ساعه فده بيستهلك نسبه بنزين اعلى من انك تمشى على الخامس وعلى سرعه 100 كم/ ساعه لان وقتها هيكون مؤشر الار بي ام عند 2500 لفه مثلا , ده مثال توضيحي مش اكتر , يعني حسب موتور و نوع كل عربيه طبعا

و كمان تقدر تكتشف خلل معين في عربيتك عن طريق الار بي ام , وده مثلا لو انت على السلانسيه وكان الار بي ام عالي شويه عن المعدل الطبيعي فده معناه بالنسبه للانوس ان الايدل كنترول محتاج تنضيف ( على سبيل المثال وليس الحصر) وطبعا حاجات تانيه كتير زي كده

و دي تقريبا معلوماتي عن الار بي ام