الموضوع: الى خبراء التمبرا

المشاركة الأصلية كتبت بواسطة abdelmessih67

أهلا بالاخ الفاضل اديلكو

على فكرة انا شاري تمبرا مستعملة مو 1998 من حوالي سنة بالتمام و الكمال و بأشكر ربنا عليها و ربنا يوفقك في واحدة تكون كويسة لانها عربية ممتازة ربنا يحفظها و يكفينا شرها .

أنا أول ما اشتريت العربية برضه كان زيت الباور بينقص و قلت أيه المشكلة ممكن يكون جوان او اويل سيل لكن بعد ما اشتريت العربية لقيت الميكانيكي بيقوللي ان خرطوم الضغط العالي بتاع الباور عايز يتغير , قلت ايه يعني خرطوم الباور هيكون بكام يعني 50 و لا 100 جنيه بالكتير !!!!!!!!

لكن لقيته يا محترم ب 450 جنيه سواء عند الكيلاني او يوسف أو المواردي و الميكانيكي أخذ 50 مصنعية يعني كلفني 500 جنيه في حتة خرطوم .

دلوقتي نصيحة قبل ما تشتري العربية راجع الاسكاترا اللي هي علبة الدركسيون و فيها مجموعة تروس بتحول الحركة الدائرية للدركسيون لحركة خطية يمين و شمال و خلي بالك حكاية أنه كل شوية يزود زيت الباور ده كلام فارغ لان المفروض زيت الباور يتزود كل كام شهر و ساعات بيقعد 8 أو 10 شهور بدون زيادة .

دلوقتي لازم ما تتكرش غلطتي و تكشف على نقص الزيت لو كان خرطوم الضغط العالي أو حتى الواطي اعرف ان امامك 500 جنيه تصليح , لو لا قدر الله الاسكاترا ( علبة الدركسيون ) يبقى يا بطل فيها 3995 جنيه لو كانت جديدة و في موضوع رفعه أحد الاخوة حاطط فيه اسعار قطع غيار الفيات عند الكيلاني هتلاقي فيه السعر ده لعلبة دركسيون التمبرا .

حتى لو هتجيبها استيراد ستدخل في 600 أو 700 حسب حالتها و لازم تخفض الرقم ده أو غيره من ثمن العربية قبل ما تشتريها مافيش حاجة اسمها تمشي باعلبة الدركسيون بايظة و كل شوية تزود زيت الباور ده اسمه ترقيع .

بالمناسبة هي مواصفاتها ايه و الراجل عايز فيها كام يمكن أقدر اساعدك في سعرها

السلام عليكم
انا اشكر حضرتك جدا على نصيحتك الغاليه بس انا هقولك مواصفات العربيه وبعدين انت قولى تساوى كام
وبعدين انا اقولك سعرها كام
بص ياسيدى هيا موديل 97
راشه بره حزام وسقف وكبوت فقط ما كانش فيها مشاكل فى الصاج بس خرابيش وانبعاجات
جوه فبريكه
التكييف شغال
عداد عادى
كاوتش عادى
جنوط عاديه
زجاج امامى كهرباء
سنتر
لا يوجد بها مشاكل سوى موضوع الباور
الموتور حالته جيده وسحبه كويس
لو عاوز تسالنى عن حاجه ثانى من فضلك لا تتاخر
وبكرر شكرك للمرة الثانيه
وانا اسف على تاخرى فى الرد لانى مش متواجد باستمرار فسامحنى .
وانا اتصلت بالراجل صاحب العربيه الان وعرفت ان احنا هنضر نغير ميعاد الاستلام لظروفه الخاصه حتى الاحد صباحا
ارجو ياجماعه تقدروا لى ثمن العربيه وانا هقولكم على الثمن بعد ما تخلصوا توقعات والتوقعات بتاعتكوا هتعرفنى انا اتخميت ولا لا
وجازاكم الله خيرا