الموضوع: لعشاق الفيرنا وأهل الخبرة في صيانة الفيرنا

السلام عليكم ورحمة الله وبركاته

شباب المنتدى الأصيل وأهل الخبرة

أحب أعرف بس منكم إيه اللي ممكن أعمله لصيانة الفيرنا من

فلتر بنزين أمامي وخلفي وإيه النوع الكويس وسعره وبيتغير كل كام ألف كيلومتر

فلتر هواء وإيه النوع الكويس وسعره وبيتغير كل كام ألف كيلومتر

بوجيهات وإيه النوع الكويس وسعره وبيتغير كل كام ألف كيلومتر

مياه خضراء وللا حمراء وايه الفرق وإيه النوع الكويس وسعره وبيتغير كل كام ألف كيلومتر

وكذلك طقم السيور وإيه النوع الكويس وسعره وبيتغير كل كام ألف كيلومتر

والكاوتش بردوا إيه النوع الكويس وسعره وبيتغير كل كام ألف كيلومتر

وزيت الفتيس وزيت الباور وزيت الفرامل وإيه النوع الكويس وسعره وبيتغير كل كام ألف كيلومتر وأشيك عليهم ازاي هل في علامات إرشادية للنقص أو ماشابه من أعطال ؟؟

غسيل الموتور هل هو مستحب ؟؟ طب لو مستحب أغسل بالمياه وللا بالجاز وللا بالمواد الكيمياوية وللا الفووم

غسيل العربية من تحت والرفارف هل هو مستحب أيضا طب كل قد إيه من حيث المدة ؟؟

وفوق كل دة ربنا يخليكم لأني عارف إني طولت عليكم ميكانيكي كويس وكهربائي يفهم في العربية دي والذمة والضمير ويعرف ربنا وأسعاره حنينه ؟

شكرا لحسن قرائتكم وتعاونكم ومتزعلوش لأني طولت عليكم بس الإفادة ليا وللجميع إن شاء الله .

ممنوع الكتابه باللون الأحمر

مشرف هيونداى 2

السيد الفاضل المحترم .
اقدر افيد حضرتك فى الموضوع اللى بتتكلم فيه . وربنا كريم .
اولا بالنسبه لفلتر البنزين . النوع الذى لايوجد عليه خلاف هو الاصلى . وسعره يتراوح بين 40 و 60 جم. ولو استعملت موبيس الكورى جيد ايضا . بس الاصلى لا يعلى عليه. ويتم تغيير فلتر البنزين كل 20 الف كم.وموضوع التغيير فى الميعاد ده مهم جدا .

ثانيا فلتر الهواء . الانواع الكوريه جيده جدا. ومابتفرقش عن بعض. وخصوصا انى عمل فلتر الهواء مش كتير. وبرده يتغير كل 20000 . بس انا رايي الشخصى انه يتبص عليه ويتنظف كل مره فى الصيانه . كل 5000 كم مثلا مع البوابه . هاتخليه يكمل معاك لحد 40000 كم . وسعر الكورى يتراوح بين 30 و 50 جم على حسب النوع. وفيه نوع هايل اسمه دريم.

ثالثا البوجيهات. حضرتك تركب طقم بوجيهات 1 شمعه اصلى مقاس 16. ده لو العربيه بنزين . ولو غاز 2 شمعه ان جى كيه.
اصلى علشان يكون مش متخزن بيتباع اسرع من الانواع الثانيه. وسعره 60 جم. وتتغير كل 20000 بردوا . وقم بتنظيف البوابه قبل التغيير دائما

رابعا . السيور . بالنسبه للكاتينه والبلى والسيور الخارجيه (3 سيور خارجيه) خليك ديما فى الاصلى . جميل . بس اتاكد من الباركود اللى عليه . ودور علي الرقم فى جوجل . علشان تتاكد انه اصلى . ودول بيتغيرو كل 60000 كم.
ولو حبيت تركب كورى فيه سير اسمه دايكو. ده احسن الوحشين . ده بالنسبه للكاتينه . اما السيور الخارجيه ففيه نوع اسمه دونجول او بوش . نفس الكلام . والانواع ديه تغيرها كل 35000او 40000بس انا مانصحكش بيها.

خامسا. المياه الخضراء . اوعى تحط الحمراء ديه بتاعة العربيات اللى ماتورها خشن زى الالمانى . واحسن نوع موبيل . سعرها 85 جنيه . وغيرها كل سنتين . ولكن لو حطيت اى نوع تانى فكلو زى بعضو سواء سعودى اسبانى ولا حتى لاوندى. كله مضروب والله.
فيه نوع اسمه شيلتك ده كويتى بينافس مية موبيل . وسعره 45 جم للعبوه 4 لتر . وفيه نوع تانى اسمه زيد ايه ده بينافس شيل وسعره 15 جم للتر الواحد بس جامدجدا . وكل الانواع ديه تغيرها قبل بداية كل صيف. وقبلها يجب دورة غسيل للريداتير .

بالنسبه للزيوت . مواتير البنزين استعمل شيل للموتور والفتيس .. ولو استعملت موبيل للفتيس كويس بردو . بس اوعى تستعملوا فى الموتور. خليك فى زيت شيل بس. ولعلمك هو موجود عادى فى الاسواق. ده حتى غيروا شكل العلبه اللى مستخدمه فى توكيل هيونداى. علشان طلعت اشاعه انه اتسحب من الاسواق بسبب انى شركة شيل اتباعة لشركة توتال. ولكن البنزينات بس اللى اتباعيت . ولكن شركة استيراد الزيوت كما هى شيل . وخليك فى كامل تخليقى اللى هو الترا 10000 كم. وده سعره بين 255 و 300 . على حسب اللى بيبيعو. وكلهم زى بعض . اتاكد انه مغلق كويس. ولو البياع عنده شهادة اعتماد تدل بأصلية المنتج ده يكون هايل . علشان فيه نصابين كتير فى السوق . لدرجة انه والله مره حصلت مع زميل لينا معاه نيو اكسنت ولسه زيرو ، راح لاحد المراكز وجابولو زيت شيل 5000 . وبعد محاطوه ومشى رجع تانى بسبب صوت غريب فى الاطباق . بسبب انى الزيت كان مضروب . والله انا حضرت الموقف ده بنفسى . بس بصراحه المركزمالوش زنب . ولا حتى تاجى القطاعى ليه زنب. الغلط كله كان فى تاجر الجمله .

اما بالنسبه للسيارات الغاز فاحسن زيت هو فيسكو كما قال التوكيل .وده سعره 101 جم للعبوه اللى هى فيسكو 5000 كم.

بالنسبه لغسيل الموتور. فالغسيل يجب ان يكون بالفوم والهواء فقط . بلاش مياه والكلام المقرف ده. مره صنايعى كان بيشتغل عندى كان هيطير علبة فيوزات فى عربيتى انا والله العظيم . بسبب انه عاشق انه يغسل المواتير بالخرطوم . حتى للعملاء . وبعد كده يدى رشة اسبراى انجكشن او دابليو دى 40 علشان يخليه يلمع . وده اسمه قرف و بيبوظ الحساسات علشان الاسبراى ده عباره عن جاز فابيلم اتربه اكتر من الاول بعديومين بالضبط .

غسيل الكارتيرات وكده مافيش فيه مشكله بس لازم تكون العربيه بارده جدا جدا
علشان الطنابير. اما عن غسيل العفشه فخليها فوم بس بردو . مع العلم عدم تكرارها كثيرا خليها مثلا كل 30000 او 40000 كم. علشان ديه مش مستحبه اوى.
وبلاش غسيل الرفارف من جوه علشان البارومه واطقم الكهرباء.

وفى النهايه يارب اكون قدرت افيدك بمعلومات .

ولكم فائق الاحترام والتقدير

م. محمد عبد الجواد