الموضوع اكبر من كدة بكتير و غالبا مش حتعرف تحدد مدى ثبات اى عربية الا بتجربة عملية
من ضمن العوامل مثلا وزن العربية ... و على عكس اللى ناس كتير بتعتقدة ان العربية التقيلة ثابتة... دة مش شرط خالص... ما عربية الفورميولا وزنها حوالى 500 كيلو (اخف من الاونو) و بتمشى بسرعات فوق 300 كيلو فى الساعة... و اللادا تقيلة بس طبعا ثباتها لا يقارن باى عربية من نفس وزنها من صتناعة BMW مثلا
عامل تانى اهم هو توزيع الوزن دة... التوزيع الصح لوزن اى عربية بيعتمد ان معظم ان لم يكن كل وزن العربية يبقى بين المحورين بتوعها... و طبعا بيفرق توزيع الوزن دة فى استجابة العربية للمناورات اللى بيطلبها السائق من العربية... يعنى العربيات الجر الامامى اللى بمحرك امامى بيبقى 60% او اكتر من وزنها قدام بالتالى العربيات دى بتميل انها تعمل under steer اكتر من غيرها... العكس فى البورش لان موتورها ورا فا احيانا مع الضغط عليها فى الملفات بتعمل over steer... السوبر كارز بيبقى غالبا محركها وسطى... يعنى مكان الكنبة الخلفية بالتالى بيبقى وزن العربية بين المحورين لضمان افضل استجابة من نظام التعليق على الطريق
حاجة تانية هى التكنولوجيا المستخدمة... انظمة التعليق فيها تصميمات كتير و كل تصميم لة ميزات و عيوب و دة بيفرق فى اداء العربية على الطريق.... الاهم من كدة مدى توافق النظام دة مع وزن و حجم و سرعة العربية ... يعنى لو العفشة طرية زيادة عن اللزوم حتبقى العربية عايمة على الطريق بغض النظر عن التكنولوجيا المستخدمة
زى ما انت شايف القصة معقدة جدا و مش سهلة خالص... ولا يمكن الاعتماد على اى بيانات من كتالوج او مطبوعات تسويقية للحكم على ثبات اى عربية... لازم تجربة عملية و احساسك بالعربية فى التجربة هو الفيصل
MMamdouh
المفضلات