الموضوع: خطوات نقل ملكية سيارة

المشاركة الأصلية كتبت بواسطة dondark

طيب سؤال
انا عندى وش فانوس الاشارة مكسور
كدا الفحص هيعدى عادى ولا هيقولى اى بتنجان
وهو لو فى حاجة اكمل اجراءات عادى واخد النمر وابقة افحص بعدين تانى لما اصلح ؟ ولا كله هيقف
لانى ماشى من غير نمر لانى سلمت اللوحات فى مرور تانى
وعايز كل حاجة تخلص بكرا ان شاء الله

الأخ الفاضل
أعتذر أولاً عن تأخري في الرد ، ولا أعلم إذا كنت انتهيت من الترخيص والا لأ
لكن هجاوبك
زي ما قلت في الموضوع إنت بتاخد تصريح ، وده عبارة عن رخصة مدتها شهر واحد لحد متصلح الحاجة اللي قالوا عليها
لكن هتخلص كل إجراءاتك الباقية عادي ، وهتستلم النمر الجديدة وكل حاجة

ونصيحة ممكن تشتري الإشارات وتركبها لو قدامك وتخلص نفسك ، أو تحاول تركن العربية في المرور بحيث متتشافش (آه ده لو انت تبع مرور فيصل لأن بيتهيألي كل مرور وله إجراءاته)

في المشاركة اللي جاية هقول عملت إيه بعد التصليح .... تابع

الأخوة الأفاضل
انتهيت اليوم من استخراج الرخصة بعد أن أصلحت الخبطة في سيارتي وهذا ما تم:

يوم الأحد الماضي ذهبت مبكراً لشراء نموذح فحص فني (5 جنيهات) من الخزينة ، وملأت البيانات التي فيه (اسمي وعنواني ونوع السيارة ..... إلخ).
بعد ذلك توجهت إلى منطقة الفحص كما سبق في المرة السابقة ، عند دخولي قام شخصان يقفان عند مدخل منطقة الفحص بطلب أن أشغل المساحات ، وقمت بتشغيلها بعد أن رششت مياه من الرشاشات على الزجاج لتسهيل حركة المساحات (ملحوظة لازم ترش مياه إذا كانت مساحاتك لا تعمل جيداً حتى لا يتلككوا على المساحات).
بعد أن سمحوا لي بالدخول ، توجهت إلى الضابط المسئول وأخذت تأشيرة بدء الفحص ، وسالني الضابط هل أصلحت السيارة فأخبرته "نعم" وألقى نظرة سريعة على السيارة (كنت راكنها أمامه مباشرة )
بعد ذلك ذهبت وأحضرت آخذ البصمة لرفع بصمة الشاسيه والموتور ، و5 جنيهات (مش عارف ليه!!! بس خفت يعقدوا الموضوع ) ، بعد أخذ البصمة قال لي أخرج العربية وأنا مكدبتش خبر وأخرجتها ..... والحمد لله كده العملية خلصت.
بعد أن أخرجت السيارة توجهت بنموذج الفحص لمهندس الفحص لأخذ تأشيرته الكريمة على النموذج.
ثم توجهت إلى الضابط مرة أخرى لأخذ الختم (ملحوظة طلب الضابط من الواقفين الذين يريدون أخذ الختم أن يعطوا الورق للعسكري وللأسف طلب العسكري مني وصل الطفاية وأصر فتوجهت للضابط مرة أخرى وسألته إذا كان فعلاً عايز وصل الطفاية فختم النموذج مباشرة ، مش عارف إصرار العسكري ده على إيه منا مخلص كل حاجة المرة اللي فاتت )

النهاردة بقى:
توجهت مبكراً للمرور قبل ذهابي لعمل ومعي (دوسيه ورق وضعت فيه نموذج الفحص + صورة الرخصة المؤقتة + صورة البطاقة) وتوجهت مباشرة لشباك تجديد الرخصة (أتكلم عن مرور فيصل).
أخذت الموظفة الملف وأعطتني إيصال بـ 15 جنيه لأدفعه في الخزينة (رسوم تجديد)
في الخزينة أيضاً أعطوني نموذج تسيير مركبة بـ 6 جنيهات أخرى
توجهت بعد ذلك للموظفة مرة أخرى بالوصل والنموذج وطلب أن أملأ النموذج (الاسم والعنوان .... إلخ) ، وأخذت الملف وانتظرت الرخصة النهائية
الحمد لله بعد نصف ساعة أو 45 دقيقة تقريباً أخذت الرخصة

أرجو أن أكون أفدتكم

الاخ Khmonir شكراا للشرح و الافادة
ولو ممكن سؤال خارج الموضوع
هو تمن العربية بولونيز موديل 1990 او 1991 الشكل المعدل بيعمل كام في القاهرة ؟
و شكرا

بجد مجهود رائع وجزاك الله كل خير

المشاركة الأصلية كتبت بواسطة michelyousif

الاخ Khmonir شكراا للشرح و الافادة
ولو ممكن سؤال خارج الموضوع
هو تمن العربية بولونيز موديل 1990 او 1991 الشكل المعدل بيعمل كام في القاهرة ؟
و شكرا

هو السعر بيختلف حسب حالة السيارة
بس أنا لاحظت وأنا بشتري إن سعر السيارة مدويل 90 أو 91 بيتراوح من 16 ألف وحتى 20 ألف حسب حالة السيارة
فمثلاً أثناء بحثي رأيت سيارة موديل 90 فابريكة دواخل والمطلوب كان 17 ألف ، وكانت ستحتاج إلى بعض التوضيب
وسيارة أخرى موديل 91 فوانيس جولف وفابريكة دواخل وأيضاً كان المطلوب 17 ألف

المشاركة الأصلية كتبت بواسطة almosecar

بجد مجهود رائع وجزاك الله كل خير

شكراً لمرورك أخي almosecar

الاخ Khmonir اشكر ردك لسريع الوافي و ربنا يباركلك فيها و يعطيك خيرها و يقيك شرها.

المشاركة الأصلية كتبت بواسطة michelyousif

الاخ Khmonir اشكر ردك لسريع الوافي و ربنا يباركلك فيها و يعطيك خيرها و يقيك شرها.

أنا افتكرتك عايز تشتري لكن خدت بالي إن معاك بولونيز يعني عايز تبيعها
ممكن تعرضها لو حابب في موضوع البولونيز المظلومة في المنتدى
http://www.nilemotors.net/Nile/75124-a-47.html

وكمان ممكن تعرضها في موقع ContactCars وكمان منه ممكن تعمل بحث على العربية علشان تعرف أسعارها إيه قبل البيع
كمان ممكن في مصراوي