الموضوع: خطوات نقل ملكية سيارة

المشاركة الأصلية كتبت بواسطة aaah

استاذ خالد
الف مبروك العربيه والتجديد
كنت عايز اسأل حضرتك على مده الترخيص اللى حضرتك عملته ده قد ايه؟ يعنى سنه والا اتنين والا تلاته؟
وسلمت النمر فى المرور القديم والا الجديد؟
وجبت شهاده مخالفات فقط من المرور القديم والا شهاده بيانات ايضا؟
اخوك
ابو احمد

أخي الفاضل أبو أحمد
مدة الترخيص سنة ، والنمر سلمتها في المرور اللي أنا تابع له (يعني المرور الجديد)
أما عن شهادة المخالفات فأنا كان معايا شهادة مخالفات من المالك لم تكن مدتها انتهات ، شهادة البيانات اللي أعرفه إنك بتجيبها لما تكون الرخصة مدتها انتهت

أرجو أن أكون أفدتك

المشاركة الأصلية كتبت بواسطة khmonir

أتممت أمس بحمد الله نقل ملكية سيارتي التي اشتريتها (بولونيز موديل 90)
المرور الذي أتبعه هو مرور فيصل ، وأردت أن أكتب خطوات نقل الملكية ليستفيد منها اﻷخوة اﻷعضاء

قمت بعمل ذلك على يومين للتسهيل وهذه هي الخطوات:
اليوم اﻷول:
1- ذهبت باكراً لوحدة مرور فيصل (من حسن حظي أني أسكن بالقرب منها) ، كانت الساعة 8:25 صباحاً ، وتوجهت مباشرة إلى الخزينة لشراء أوراق فحص وتجديد (وهي نموذج فحص بيئي ، ونموذج فحص فني ، ونموذج تجديد رخصة السيارة [يتم شراء عدد نماذج بعدد سنين الترخيص] ، ونموذج لفحص الطفاية) إجمالي التكلفة 25 جنيه لترخيص سنة واحدة.

2- توجهت لدفع التأمين لسنة واحدة (مدة الترخيص) ، الشركة التي اخترتها كانت وثائق ، (ﻻ أعلم لماذا اخترت تلك الشركة فكلهم سواء بالنسبة لي !!!!!) المهم دفعت 86 جنيه.

بعد ذلك وقفت قليلاً أراقب عملية الفحص للسيارات اﻷخرى ، وعلى ما يتم [طبعاً الخطوة دي مش مهمة ]

اليوم الثاني:
1- ذهبت أيضاً في ذلك اليوم باكراً لأدخل منطقة الفحص مبكراً ، وكنت هناك الساعة 7:30 تقريباً (مش قلتلكم ساكن جنب وحدة المرور بقى) بس لقيت ناس سبقتني تقريباً كانت بايتة من اليوم اللي قبله

2- وصل الضابط المسئول عن الفحص تقريباً 8:15 وهنا بدأت المعاناة أقصد إجراءات الفحص ، توجهت للطابور الواقف أمام شباك الضابط ﻷخذ تأشيرة لكي أبدأ الفحص ، وأثناء وقوفي في الطابور سمعت عامل البصمة ينادي على أحد من العاملين أن يخلص صاحب البولونيز ومش عارف ليه!! ﻷني كنت بس جبته يأخذ البصمة وهو اللي قالي أخذ تأشيرة الضابط المهم العامل خد مني نموذج الفحص الفني وراح للضابط وبدل الخدمة اتقلبت نقمة ، فالضابط بص على العربية بتفحص وشاف الخبطة اللي في الرفرف الأمامي عندي ( وكنت أظنها بسيطة وهتعدي) وأعطاني شهر للتصليح
المهم رجعت لعامل البصمة أخذ بصمة الشاسيه ، ولما جه يأخذ بصمة الموتور قاللي مش دي التأشيرة إرجع للضابط وخد التأشيرة مرة تانية ، رجعت للضابط وأعطيته نموذج الفحص الفني مرة أخرى فطلب الرخصة وأشر على الورق نقل ملكية ورقم العربية (لوح جديدة على فكرة من مرور شبرا)، بعد ذلك عدت إلى عامل البصمة وأخذت بصمة الموتور.
الملخص: تأخذ تأشيرة الضابط أول ما يوصل لتبدأ في إجراءات الفحص ، ثم تأخذ بصمة الموتور والشاسيه.

3- بعد ذلك ذهبت ﻷخذ تأشيرة مهندس الفحص على نموذج الفحص الفني والفحص البيئي.

4- بعد كده فحص الطفاية واللي طبعاً طلعت مدة صلاحيتها انتهت بالرغم من إن مكتوب عليها صلاحية 10 سنوات وهي إنتاج 2005 ، واضطريت أشتري طفاية جديدة بـ 125 جنيه .

5- بعد ذلك توجهت ﻷخذ الختم على الورق من الضابط فسأل على حقيبة اﻹسعافات والمثلث وعنده سألته إن معي المثلث فأخبرني أن أشتري الحقيبة فقط ، فتوجهت لمنفذ البيع ﻷشتري الحقيبة فأصر البائع على أن أشتري الحقيبة والمثلث وعندما أخبرته أن الضابط قال لي أن أشتري الحقيبة فقط قال لي أن صاحب الشركة أخبره أن يبيع اﻹثنين معاُ وفعلاً الوصل الذي معه باﻹثنين معاُ فاضررت إلى شرائهم معاً ، ثم عدت إلى الضابط ﻷخذ الختم.

6- توجهت إلى شباك تقديم اﻷوراق (وهنا بدأت المعاناة الحقيقية للوقوف في الطابور الطويل) ، عند تقديم الأوراق تأكد من أن تكون البيانات في نموذج التجديد مكتملة ، معك عقد البيع المسجل في الشهر العقاري ، معك التوكيل الذي اشترى به البائع (أو عقد البيع الخاص به) إذا لم تكن الرخصة باسم البائع ، صورة من عقد بيع سيارتك اﻷولى إذا كنت تمتلك سيارة قبل ذلك لكي لا تدفع ضريبة رفاهية ، صورة الرقم القومي ، صورة الرخصة وطبعاً الرخصة نفسها وتسلم كل ذلك للموظف لكي يقوم بحساب الضريبة (في حالتي كانت الضريبة 215 جنيه + 115 تأمين لوحات + 20 مش عارف بتوع إيه أي اﻹجمالي 350 جنيه) فلوسي كانت خلصت ، رجعت البيت جبت فلوس تاني ورجعت (الحمد لله إن بيتي جنب المرور).
7- توجهت للخزينة لدفع الضريبة والعودة لشباك تسليم اﻷوراق مرة أخرى.
8- الوقوف مرة أخرى في الطابور الطويل المرة دي كانت أطول من المرة الأولى (نصيحة اختار الشباك اللي الموظف فيه بيخلص بسرعة ومش بيعطل اللي واقفين قدامه كثير) ، بعد أن وصلت أخيراً للموظف بعد أكثر من 45 دقيقة سلمت اﻷوراق.
9- رحت أفك النمر اللي راكبه على السيارة (5 جنيه للي فكها) متنساش المسامير وقطع البلاستيك بتاعة اللوح لو نمر جديدة هتسلمهم مع النمر (مش مهم البلاستيك يبقى سليم ﻷنه غالباً اللي بيفك بيكسرهم).
10- جلست أنتظر ينادوا اسمي ، ولما نادوه أخدت أمر صرف للنمر ورحت لمخزن النمر لتسليم النمر القديمة يفضل يكون معاك صورة بطاقتك والرخصة القديمة احتياطي لو طلبوهم، أعطاني ورقة رجعت للشباك الذي أخذت منه أمر الصرف علشان أستلم الرخصة ، واستلمتها (طبعاً في حالتي أخذتها مدتها شهر علشان أصلح الخبطة اللي في العربية) بعد ذلك صورت الرخصة وتوجهت إلى مخزن النمر مرة أخرى لاستلام اللوح الجديدة.
11- ركبت اللوح الجديدة (10 جنيه)
وخلاص كانت الساعة تقريباً 1:30 ظهراً
وبعد شهر أروح أجدد الرخصة بعد تصليح الخبطة وهبقى أقلكم عملت إيه

إلى اللقاء

السلام عليكم ورحمة الله وبركاته
أنا عارفة إن الموضوع بئاله كتير بس يا ريت لو شوفت كلامي تفيدني أو أي حد من أعضاء المنتدى الكرام لو عنده تجربة يفيدني
أنا اشتريت السيارة بعقد مسجل من مرور عين الصيرة وروحت المرور بتاعي علشان افحص عمل لي بصمة الموتور والشاسيه بس لا عمل فحص للطفاية ولا العادم وكمان البربريز مشروخ من أوله لآخره ومبصش عليه..فهل كده الفحص خلص ولا لسه؟
ثانيا المهندس طلب مني أرجع للمرور القديم (عين الصيرة) علشان يأشرولي على الورق وأرجع تاني المرور بتاعي..فهل لازم أروح بالعربية بردو ولا كفاية الورق بس؟
ثالثا لما أرجع المرور بتاعي هيكمل الفحص ولا خلاص كده..وبالنسبة للبربريز هيقول لي لازم يتغير ولا هيعدي؟؟؟؟؟؟؟؟
يا ريت الرد سريعا لأني الفروض أروح بكرة إن شاء الله
شكرا جزيلا