الموضوع: الي العمالقه: سبعاوي و محمد ممدوح و

مممممممم.
مش عارف كان عندى مشكله زى كده فى 128.و إتضح أنها الفرامل كانت قفشه على العجل ومش بتفك إلا بعد مشوار.
أتأكد كده بعد المشوار....حط إيدك على العجل و جسه لو لقيت عجله سخن قوى ولا حاجه يبقى زى مقولت لحضرتك.
ملحوظه:سهوا حضرتك نسيت إسم البشمهندس:سميرsamirayad

اكثر عاملين بيؤثروا فى اداء المحرك هما البنزين والسخونة
البنزين فى بلدنا للأسف مواصفاته مش ثابتة، يعنى لو انت متعود ترمرم من اى محطة تلاقيها هتلاقى العربية كل يوم على حال، ولو عودت نفسك على محطة بيعينها بعد ما اطمنت انها كويسة هتلاقى انك فى معظم الوقت ماشى زى الفل، لكن بعد تفويلة بعينها العربية بقت نص نص لحد ما تمون تانى ، ده لأن فى النهاية مش كل تشغيلات البنزين فى بلدنا بتطلع زى بعضها بالظبط، درجة حرارة تبخر مخلوط البنزين اعلى شوية ، لزوجته اختلفت شوية مما يصعب تحوله الى رذاذ، كمية المية فيه زادت شوية(أى بنزين لازم يكون فيه شوائب من المية ولو بنسب قليلة جدا) مما يؤدى الى انه هيخلى العربية تسقف فيقوم حساس التسقيف يأخر الحريق علشان يمنع التسيف وده بيخلى السحب ضعيف وصوت الموتور عالى، فيه عوامل كتيرة فى البنزين تخلى الدنيا احيانا تبقى مش وردى، العامل الآخر هو حرارة الجو، الجو لما بيكون سخن الهواء بيكون متمدد وبالتالى كمية اقل من جزيئات الأكسجين بتشغل نفس الحيز من الفراغ الللى كانت بتشغله كمية اكبر والهواء بارد، وده معناه دخول عدد جزيئات اكسجين اقل الى المحرك ، فيما معناه برضه ان احتراق الوقود بيكون غير كامل لعدم توافر ما يكفى من اكسجين، وده برضه معناه ان الموتور يكون خشن وضعيف ومبيسحبش، كما ان الحرارة بترفع قابلية المتور للتسقيف مع تثبيت كل العوامل الأخرى ، وده معناه ان كونتور المحرك برضه هيأخر الحريق منعا للتسيقيف فيما معناه ان برضه السحب هيضعف والصوت هيعلى

فيه شوية عوامل اخرى ثانوية، يعنى مثلا، لو انت اخدت مشوار كله فى الزحمة، ده ممكن يؤدى الى ترسب شوائب كربونية على اطراف البوجيهات، ويخلى الحريق مش منتظم فتيجى تركب العربية بعدها تحس انها زى الزفت، تغصبها على الجرى شوية فالموتور يحمص ويحرق الكربون الموجود على البوجيهات ويحسن الحريق فلما تركبها بعدها تحس ان الدنيا وردى، كذلك برضه المشى فى الزحمة لفترة بيربى كربون على جدارن الشمايز، الكربون ده بيستهلك جزء من الهواء اللى داخل للبساتم لاحتراقه الخاص لما انت تركب العربية المشوار اللى بعده وده بيحرم البنزين من نسبه من الهواء اللى هو محتاجة فبرضه تلاقى اداء المحرك مش كويس
الحرارة برضه بتقلل لزوجة الزيت، فلو انت حاطط زيت ثقيل فى الحر ممكن تلاقى اداء المحرك بقى كويس فى الجو الحار ولو انت حاطط زيت خفيف ممكن تلاقى اداء المحرك تدهور فى الجو الحار
احيانا برضه الجو البارد بيكون له تأثير سئ لأن الوقود البارد بتكون قابليته للتحول الى رذاذ والاختلاط بالهواء اقل من مثيله الكثر حرارة، وده بيخلى نسبة من البنزين متتحرقش فى الجو البارد جدا وتلاقى الموتور اداؤه مش قد كدة، كما ان الكاوتش فى الجو البارد بيكون ضغطه اقل وده يخليه مبرطش على الأرض ويحط حمل عالى على المحرك
زى ما انت شايف كدة هى عوامل كتثر جدا لكن معظمها بيلف ويدور حوالين البنزين والحرارة الجو بشكل اساسى وزيت المحرك والمشى فى الزحمة بدرجة ما، لكن لو حبيت تعمل تمثيلر رياضى لكل الظروف دى علشان تستنتج شكل اداء المحرك فى اللحظة التالية لازم يكون عندك كل المعطيات من نوعية الزيت ومواصفة الوقود ودرجة حرارة الجو وحالة اكتساء الشاميز والبوجيهات بالكربون بناء علىالمشوار السابق وضغط الاطارات ، وبالتالى انت محتاج نموذج رياضى معقد جدا لاستنتاج ما سيفعله المحرك فى اللحظة التالية، وفى تعقيده يقترب للعشوائية ، مع ملاحظة انى فقط دخلت فى اعتبارى العوامل المتغيرة، يعنى متكلمناش على عوامل ثابتة يمكن تجنيبها زى حالة فلتر الهواء والعمر الافتراضى للبوجيهات ومدى نظافة باب الهواء(ألثروتل)
علشان كدة الواحد بالتجربة ممكن يكون عارف ليه الموتور مكتوم، يعنى لو الجو حر يبقى تعايش مع الموقف، لو ده حصل من آخر تفويلة يبقى ان شاء الله هيتعدل مع التفويلة القادمة، لو كان اخر مشوار انا خدته فى الزحمة يبقى نجرى العربية شوية، لو ولا واحدة من دى ولا دى ولا دى يبقى احد بنود الصيانة سواء فلاتر او زيت او بوجيهات، لو ولا واحدة من دى او دى او دى يبقى سيبه هيتعدل لوحده كمان شوية لأن ممكن يكون تداخل من اكثر من حاجة ونظرا لأن كلها بتتغير سواء بالتدخل البشرى شراء وقود نفخ اطارات الخ) او الطبيعى(تغير حرارة الجو أو الضغط الجوى) يبقى سيبه هيتعدل لوحده

المشاركة الأصلية كتبت بواسطة mechbolla

في البدايه والله احب اوجه لك جزيل الشكر لاهتمامك الشديد بالموضوع.. و كنت عايز اسالك علي حاجه بس هيا غريبه شويه..هوه ينفع بنزين من نفس التفويله يكون مثلا مثلا مش كله زي بعضه ..اقصد ممكن لو مخلوط ب ديزيل او حتي ميه يكون الخليط غير متجانس نتيجه فرق الكثافه؟ حاجه كده شبه خلط الميه عالزيت..

و ليا سؤال كمان في مكان تاني..دلوقتي هانتفق اني هانقل كل مره عند عدد لفات ثابته و هي 2.5 او 3 بالكتير...بس عندي حالتين مره هاروح لل 3 دي براحه خالص و مره هاروحلها بسرعه...هل في تاني حاله في اجهاد زياده عالمكنه او ممكن يربي كربون مثلا؟؟

فى المعتاد فأن ده لا يمكن يحصل لأن كل الألكانات والإلكيانات والمركبات الحلقية المكون منها البنزين وحتى الاعلى منها الى حد ما تمتزج ببعضها بشكل تام، يعنى لو حطيت بنزين على جاز هيمتزجوا ببعض تماما ، وبالتالى فكرة ان التفويلة يكون وشها كريمة وقعرها شرش دى مش واردة ، لكن الوارد هو ان ممكن التانك يكون فيه مية ونظرا لأن المية مش بتمتزج بالبنزين فهى بتقعد فى قاع التانك وتختلط( فى شكل رذاذ وليس امتزاج كامل) مع البنزين لو التفويلة قربت تخلص وده ممكن يسبب بعض الدربكة لمحرك السيارة قرب نهاية التفويلة