الموضوع: مقابله الخميس عند بيبو والسهره علي ليموزين والدعوه عامه

المشاركة الأصلية كتبت بواسطة shnory

ويجيب شيشته معاه يا برنس
يا اما يدفع مائه وعشرون ليفر اجيبسيان لزوم امداده بالعده كامله

طيبه قلبك ديه اللى موديانا فى داهيه
امداد العده كنا بنعمله بميه و عشرين استرلينى فى ليفربول
و 500 دولار فى نيو جيرسى و مليار ين فى اليابان و فيل صغير فى الهند
و ببلاش للاظوغلى و 12 قرش فى السبتيه

يعنى الراجل عاملك احلى ديسكونت

و عشان خاطرك الميه اللى فى الشيشه بمتين جنيه بس

الطريق إلى بيبو.. هام جداً
لكل الذاهبين إلى بيبو يوم الخميس ..
هذه أنسب الطرق للوصول يوم الخميس .. وليست طرقاً حصرية ، لكنها الأفضل في الوصول

القادم من الطريق الصحراوي (6 أكتوبر ) محور 26 يوليو
القادم من هذا الطريق يسلك محور 26 يوليو ثم من كوبري ميدان لبنان للنزول والالتفاف من أول يوتيرن إلى شارع السودان في اتجاه الكيت كات إلى ميدان الكيت كات على الكورنيش ثم كورنيش امبابه فكوبري الساحل آخر نزلة شمال فتاني يمين بعد منزل الكوبري إلى شارع باحثة البادية حتى نهايته ثم يمين ويدور على أي مكان يركن فيه حيث بيبو على بعد 100 متر

وهذا الطريق في العموم مهما كان مزدحماً فهو أوفر في الوقت عن تجربة من الطرق البديلة وهي :
سلوك كوبري 15 مايو حتى الكورنيش ثم الدوران إلى شارع كورنيش النيل طوالي حتى باحثة البادية (زيادة في الوقت حوالي 15 دقيقة )
طلوع الدائري في اتجاه الزراعي والنزول من نزلة امبابة القومية العربية (أسرع الطرق لكن لو مستغني عن عربيتك حيث الحفر والمطبات كثيرة ولا ينصح بهذا الطريق لمن ليس له خبرة بالطرق لأنك هتتوه هتتوه .. وهاتضطر تسأل .. وربنا يكفيك هناك شر التكاتك وميكروباصات الجمعية ) ومن يتحمل هذه المغامرة هايدعيلي من السرعة الخرافية التي سيجد نفسه بها في شبرا .

أو الدائري حتى الزراعي وغالباً بيكون فيه كمين قافل الدائري قبل الزراعي ، ولو نزلت الزراعي هاتكمل طوالي .. وده هاشرحه في نزلة الزراعي القادمة .


القادم من الزراعي / القادم من دائري السلام
القادم من الزراعي / دائري السلام هاينزل اتجاه المؤسسة
لا تقع في الخطيئة الكبرى وهي سلوك مخرج الكورنيش .. حيث يوم الخميس كوبري المظلات بيكون واقف في الاتجاهين
الحل هو التحضين شمال في اتجاه شارع أحمد حلمي
بعد حوالي 50 متر هتلاقي فوقك كوبري (عرابي ) سيبه وكمل حوالي كيلو ونص
هتلاقي كوبري تاني خش من جنبه ده كوبري أبو وافية
كمل طوالي في هذا الشارع حتى ميدان الخلفاوي (أنت الآن في شارع شبرا )
هاتخش يمين إجباري وتلف أول يوتيرن الإجباري وتقف في الإشارة
هاتلاقي شارع على اليمين بعد ما تعدي الإشارة مباشرة ده شارع جسر البحر
هاتدخل فيه حوالي 1.5 هتلاقي بيبو على شمالك ظاهر وبين
طيب لو غلطت وكملت في شارع شبرا لا تقلق أي يمين هايرجعك على شارع جسر البحر ثم شمال حتى بيبو

القادم من دائري المعادي / نهاية الهرم
أنصحهم ما يجوش من هذا الطريق ويقعدوا في بيوتهم أحسن ..
لأن الطرق الأسلم هي الدائري في الاتجاه البديل .. اتجاه الزراعي
سلوك دائري المعادي الهرم يعني السير حوالي 50 كم حتى طريق الإسكندرية الزراعي ثم 10 كم حتى بيبو
بينما في الاتجاه البديل حوالي 40 كم فقط
طيب كدة اتقفلت .. لأ .. هؤلاء الناس لديهم ميزة رائعة وهو استقلال مترو الأنفاق حتى محطة سانت تريزا .. والرحلة تستغرق من المعادي أو الهرم أقل من نصف ساعة فقط ..
نصيحة لهؤلاء مرة ثانية لا تغامر بالسير في الطريق الدائري طيلة هذه المسافة يوم الخميس والمترو عندك ..
طيب تاني كدة اتقفلت .. لأ أنت أمامك ميزة رائعة لو مصمم تروح بالعربية وهي النزل من الدائري في اتجاه كورنيش المعادي وطوالي حتى ميدان التحرير .. والتكملة في الوصفة اللي جاية .
القادم من الجيزة / الهرم / فيصل :
للأسف لا يوجد سوى طريقين أحلاهما مر ..
كورنيش الجيزة .. وهذا لا أنصح به على الإطلاق كفاية ميدان الجيزة وزحمة شارع مراد ووقفة نفق شيراتون المريعة ، وزحمة العجوزة ، ثم أزمة ميدان الكيت كات .. يعني لا ينصح بهذا الطريق على الإطلاق إلا لو كنت من محبي ركوب المراجيح ، وكييف سجاير ..

الطريق البديل .. هو طلوع كوبري الجيزة في اتجاه منيل الروضة .. واستحمل 10 دقائق من الزحام على أكثر تقدير ..
ثم من تحت كوبري الملك الصالح شمال في اتجاه ميدان التحرير ..
وخللي بالك وانت في شارع القصر العيني خليك شمال .. ولا تدخل ميدان التحرير فقط شمال من جنب عمر مكرم ثم يمين من ميدان سيمون فسلوك نفق قصر النيل فطوالي على الكورنيش لا يمين ولا شمال حتى تجد كوبري الساحل أعلاك .. يعني هاتعدي تحت كباري أكتوبر ثم 15 مايو ثم كوبري إمبابة ثم كوبري الساحل وبعد المنزل هتخش تاني يمين أول يمين هتلاقي على ناصيته أجنس عربيات اسمه التلباني متخشش فيه ثم يمين في شارع باحثة البادية حتى نهايته فيمين تاني واركن .. زي ما قلنا قبل كدة .. وهذا الوصف تكملة للقادم من المعادي نهاية الهرم عن طريق الكورنيش

القادم من وسط البلد : لا تدخل شبرا في هذا التوقيت من نفق شبرا وشارع الترعة البولاقية .. اتبع الوصفة السابقة أو حاول الوصول إلى الكورنيش عبر طريق ميدان عبد المنعم رياض ..
لكن لو كنت ناحية ميدان رمسيس وخلاص قررت تخش نفق شبرا أنصحك أن تسلك شارع الجلاء ثم الترجمان في اتجاه المحطة الدولية وطوالي حتى فندق كونراد ثم الكورنيش ..
في الطريق عند كونراد هاتجد لافتة على اليمين مكتوب عليها شارع جسر البحر هذا طريق مختصر عبر روض الفرج .. لا تسلكه .. ليه لأن شارع جسر البحر بقى اتجاه واحد فاتبقى ماشي فيه عكسي .. كمل على لكورنيش أحسن لك

القادم من مصر الجديدة / مدينة نصر ..
مهما تكن المبررات .. لا تطلع كوبري أكتوبر على الإطلاق ، ولا تحاول حتى السير تحته ثم صعوده من غمرة في اتجاه أحمد بدوي / شارع الترعة البولاقية أبداً
طريقك الوحيد هو الوصول لقاعة المؤتمرات فكوبري الفنجري فكوبري القبة فكوبري سكة الوايلي فكوبري أبو وافية فميدان الخلفاوي .. كل ده طوالي لا يمين ولا شمال ، ومهما يقابلك الزحام فهو يتركز فقط في الزاوية الحمراء وبياخد في المتوسط 15 دقيقة ..
وبمجرد وصولك للخلفاوي اتبع الوصفة السابقة للقادم من الزراعي

القادم بالمواصلات : أسهل حاجة المترو متفكرش في حاجة تانية
هاتنزل محطة سانت تريزا .. تطلع من ناحية لافتة شارع جمال .. شارع حسن المغربي .. هتدخل أي شارع على نفس الصف اللي انت فيه .. هاينتهي في شارع اسمه شارع الجنينة هاتمشي معاه يمين هتلاقي نفسك على ناصية بيبو عند شارع جسر البحر حوالي 20 متر شمال

الركنة .. كل الشوارع اللي قبل بيبو شارع شاهين ، حسن المغربي ، الجنينة ، الدوران شوارع أليفة سكنية بها متسع للركن ولا تقلق من الركن فيها ..

العودة : الكل هايرجع من بيبو من أي شارع يمين طوالي حتى شارع شبرا ، ثم الدوران للخلف في اتجاه ميدان الخلفاوي ..
في ميدان الخلفاوي هتلاقي بنزينة موبيل على يمينك .. هتدخل يمين من جنبها إلى شارع مدرسة المماليك .. وأوعى تخش الشارع اللي وراها ده شارع محمد الخلفاوي مش هايوصلك لحاجة ..
هاتكمل في مدرسة المماليك طوالي لا يمين ولا شمال تلاقي ميدان لف معاه كمل طوالي اطلع كوبري أبو وافية ثم حضن يمين علشان كوبري شكة الوايلي مطلعه في اليمين المتطرف وطوالي حتى قاعة المؤتمرات .. ثم يوتيرن من تحت كوبري أكتوبر فأول يمين من جانب جامعة الأزهر طوالي لا يمين ولا شمال حتى محطة الجبل الأحمر فإجباري شمال ، ثم يمين بعد محطة التعاون فطوالي تاني حتى ترى مخرج شمال على ناصيته من الناحية التانية محطة تعاون برضه هاتدخل من جنبها فشمال إلى شارع الطيران ، ثم يمين من جنب الشبراوي آرابياتا وطوالي حتى ليموزين مروراً بإنبي ومسجد السلام ..

ورحلة سعيدة
تقبلوا خالص مودتي