الموضوع: سؤال غريب و مقارنه بين (2000 - 1800 - 1600)

جميع كماليات 2000 سي سي تركب فى 1600 سي سي بس استهلاك البنزين حيزيد و عزم الموتور حيقل شوية و فى ميزة موجودة فى 132 ان عامود السبيراتير(شامل وش السبيراتير ومحتوياته) فى 1600 سي سي تقدر تركبه على يمين الموتور او على شمال الموتور اعتمادا على المكان اللى حتركب فيه طلمبة الباور و كمبريسور التكييف (الخاصية دي مش حتلاقيها فى اى عربية فى العالم).
حاجة تانية لل 132 الدبابة ان كل عجلة امامية مثبت بها عدد 2 مقص فوق بعض و عدد 2 عامود استابيليزر منفصلين بالإضافة لعامود استابيليزر متصل وتقدر تركب فيها مساعدين ايطالى و الماني و مساعدين بعض السيارات الأمريكية(المساعدين الأمريكي ناشفين شوية).
و الكربيراتير موجود منه كذا نسخة المانية من ماركة ...er,solex و الكربيراتير موجود منه بكابل هواء و في منه بسنسور كهرباء لتسخين الموتور و في منه بسنسور كهرباء و داخل عليه كمان ماء سخن من الرادياتير لتحميص البنزين قبل الإحتراق بغرض توفير الوقود وتنعيم صوت وخفض ضوضاء الموتور
و بالنسبة للسبيراتير في منه بأبلاتين و كوندنسر و في نوع اخر ماركة ايطالى magnetti marelli اشعال اليكتروني.وصاجها محمل وطلمبة البنزين فى منها ميكانيكية و فى نوع اخر للفيات كهربي
و العربية جر خلفي (محتاجة توطى شوية علشان الثبات وسرعة الفرامل بدون ما يصوت الكاوتش) .ده غير وسع الصالون ورخص قطع غيارها
"الفانوس الخلفى متقسم لأربعة بلاستيكات منفصلة كل واحدة فى الفانوس بتتباع مستقلة ب3جنيهات"
لما الاقى كل المميزات دي فى العربية موجودة يبقى مش خسارة فيها تأكل بعض الوقود الزيادة مقابل امكانياتها كدبابة وكصالون وكسيارة عائلية.

بص يا سيدي انا معايا فيات 132 2000cc اول ما جبتها كنت فاكر اني جايب صاروخ هيطلع من اي حاجه........ دي 2000cc, بس للاسف اكتشفت ان الزمن مر عليها وخلاها مباتش حمل حاجه ممكن ال 112 حصان دول يكونو اول ما نزلت بس دلوقتي مش حيبقوا اللي هما انا عارف انك عايز تجري بس متفكرش انك ممكن تطلع بيها من اي عربيه جديده 1600 الا اذا كنت سواق محترم بس مش معنى كده انها عربيه وحشه لا هي احسن من حاجات كتير وفي نفس الوقت هيا تقيله على الارض ودي احلى ميزه فيها لان هي دي اللي هتخليك تقدر تشد مع اي عربيه تانيه مستريح والله باخد بيها غرز على 130 140ولا عمرها عومت معايا بس اهم حاجه انها متكونش عاليه من على الارض
بص عمتا هي عربيه محترمه وفيها نوع من الراحه مكنش موجود في العربيات القديمه (بور, ازاز كهربا,وممكن كمان تلاقي تكيف)والقعده ورا فيها مريحه وواسعه بس هقولك على حاجات تخلي بالك منها وانتا بتشتري العربيه دي اولا تجيبها فابريكه جوه وتاخد بالك من صوت الكرونه عشان لو فيها مشكله هتكلفك القرشين اللي انته عايز تظبط بيهم العربيه بعد كده , وخد بالك من الدركسيون ميكونش فيه بوش عسان برضو لو فيه بوش هيكلفك جامد ممكن تلاقي علبه الدركسيون بايظه او تخش في موال العفشه و انته في غنا عن كده وتبص على الشاسيه من قدام عند الركبه كده وتشوف الحتت دي مشرخه ولا لا وهتلاقي في الشاسيه قدام 3 دواير بص عليهم وشوف في المنطقه دي شروخ ولا لا عشان دي ممكن تخليك تروح تلحمها وتقعد تظبط زوايا كل شويه و بص على حاله الصالون والطابلوه عشان الطابلوه ممكن يكون غالي برضه وبص على الازاز, الازاز الاصلي بتاع ال2000 بيكون غامق سنه بسيطه وعايزك تاخد العربيه وتروح على اي طريق سريع وتجري بالعربيه هتظهر معاك عيوبها اذا كان الكرونه فيها ونه او العربيه بترج فتكون محتاجه ترصيص او الجنط يايظ ولما تيجي تدوس فرامل اذا الدركسيون قعد يرج معاك ممكن تحتاج خرط طنابير اوطنابير جديده و برضو تبص على الجنوط لان ممكن تلاقيهم مصديين وبايظين من عند البلوف وبالتالي هتتطر تغيرها وبص على الكاوتش اذا كان لسه ممكن تمشي بيه او بايظ ..............معلش انا طولت عليك بس ديخبرتي مع العربيه دي

عايز تعرف ايه بالضبط ممكن تخلى السؤال بشكل اوضح؟
على العموم لو بخصوص التكييف انا وصفت عامود الإسبيراتير اللى ممكن تفكه و تحطه يمين او شمال الموتور فى مكنة ال1600 الألماني
علشان تركب طلمبة الباور و كباس التكيف في الجنب اللى يريحك بواسطة تركيب بكرة و سير مع تثبيت الاجزاء الجديدة بواسطة وصلات معدنية تثبت للموتور علشان التكييف وطلمبة الباور تأخذ حركتها .
اما بالنسبة للإشعال الإلكتروني فيوجد حلين :
- اول حل هو الغاءالكوندنسر مع بقاء الأبلاتين و تركيب دائرة الكترونية في حجم كف اليد و غرضها توفير الوقود و تخفيض knockingللمحرك وتركيبها سهل مش محتاج كهربائي
- ثاني حل انك بتفك عامود السبيراتير و بتركب عامود اسبيراتير بأشعال الكتروني كامل لل132 و بتركب الدائرة الالكترونية الخاصة به و بكده لغيت الأبلاتين و الكوندنسر و ممكن تركب الإشعال الإلكتروني بتاع الأرجينتا موديل 1982و موجود استعمال
وتقدر تركب فتيس الأرجينتا الأوتوماتيك فى 132 1600 والمكون من 3مراحل.
اما بخصوص الزجاج الكهرباء فممكن تركب زجاج كهرباء ماركة هيلا على الأربعة ابواب و ممكن تركب ابواب 132 2000 فى 132 1600
شاملة المرايات و الزجاج الكهرباء و السنترال لوك الأصلى .
وتقدر تنقل السقف الداخلى بتاع 2000 فى ال1600 شامل التند اللى بتنزل من الأمام و من الجوانب الأمامية من السقف بالأضافة للشماسة
وبالنسبة للكربيراتير تقدر تفك الكربيراتير الsolex القديم و تركب الكربيراتير الجديد اللى داخل عليه مية سخنة و به سنسور كهرباء علشان يوطي rpm المكنة لما تسخن .
وتقدر تأخذ تابلوه ال132 2000 الأسود ذات العدادات المستطيلة الكبيرة و تركبه بدلا من تابلوه 132 1600 GLS ذات العدادات المستديرة و المطعمة بشكل خشبى.

اما بخصوص الإكصدام فتحط اللى يعجبك فيبر او نيكل
كل كلامي بيتكلم عن مكنة 1600 و 2000 هما دول اللى عليهم الشغل
هل انا رديت على سؤالك ولا فى نقط مارديتش عليها؟
انا أسف للتأخر عن الإجابة لأني مش بتابع الأسئلة تاني فى الصفحة اللى برد عليها فلو حد يحب يستفسر اكتر يقدر يبعت لى رسالة خاصة على نفس الموقع علشان اقرأها اول ما ادخل على الموقع