الموضوع: كيفية التعامل مع السيارة الاوتوماتيك ... رجاء الإفادة

المشاركة الأصلية كتبت بواسطة aif

امير باشا ....... نورت المحكمة .............. الف شكر
اعتقد ان الاوفر درايف كدة معلومتة اللي عندي اتأكدت من كلامك ..... باستثناء انه بيلغي النقلة الرابعة مش الخامسة ...... يظهر ان اللي قاللي المعلومة عربيته 5 نقلات مش 4 لأنها سيارة كبيرة (تويوتا افالون )
السؤال اللي خطر في بالي وانا بأقرأ كلامك
هل لما اقف في اشارة قصيرة وابقي على d وادوس فرامل ده مش خطر على الجير؟ .... انا كدة كأني معشق الأول ومانع السيارة من الحركة بالفرامل ...... مش كدة ولا انا فاهم غلط ؟؟؟؟
اكرر شكري لردك واهتمامك

بعد اذن د/امير

في الاشاره مفيش مشكله انك تبقى عال d وتدوس فرامل بس ( الافضل ) انك تجيب n عشان ماتحملش على الفتيس والفرامل ... يعني استعمال مثالي للحفاظ على الفتيس والتيل على المدى الطويل ... فيه حاجه انا بعملها الصراحه مش متاكد اذا كانت صح ولا لا انك وانت داخل عالاشاره وقبل ماتقف خالص على سرعة 40 مثلا ولا حاجه انك تجيب n كانك سايق مانيوال ومورت العربيه وانت داخل على اشاره بتقلل العزم وتقلل الحمل عالفرامل .

فيه ملاحظه تانيه لتقليل استهلاك البنزين ... طبعا الاوتو بينقل لوحده بس هو حساس لضغطتك على البنزين ... بمعنى ان لو رجلك تقيله شويه عالبنزين بدل مثلا مالعربيه تنقل على rpm 2.5 هتلاقيها نقلت على 3 او اكتر والعكس صحيح يعني لو انت خفيت رجلك او شيلتها ثانيه من عالبنزين هتلاقيها بدل ماتنقل على 2,5 هتنقل على 2 وده هيقلل استهلاك البنزين لأن اكتر مرحله الاوتو بيتسهلك فيها بنزين بتكون مرحلة النقلات ... طبعا كل ده يعتمد على التسارع اللي انت محتاجه لو عايز تمشي براحتك او تجري

المشاركة الأصلية كتبت بواسطة amir

بص يا باشا
ال l ده معناه low gear و في عربيات تانيه بيكون 1 ببساطه
ال 2 هي النقله التانيه
و نييجي بقي لأسئلتك:

1- العربيات الاوتوماتك 4 نقلات اماميه فقط و ليست 5 نقلات
الاوفر درايف بيقفل النقله الرابعه الاماميه و يخليك تمشي علي 3 نقلات اماميه فقط
و ده بيدي عزم و تسارع كويس تحت سرعه ال 100 كيلو و بعدها هتلاقي انك علشان تجري عن كده لازم تفتحه تاني (و كأنك سايق عربيه مانيوال علي الرابع و جايب اخره علشان تزود لازم تجيب النقله الخامسه)

2- فعلا وضع الجير علي l او 2 مش هيخلي العربيه تنقل لحاجه تانيه غيرهم فقط
بمعني لو جايب الفتيس علي l العربيه هتفضل علي الغيار الاول فقط
و لو جايب الفتيس علي 2 العربيه هتنقل ما بين الغيار الاول و التاني فقط
و سواء l او 2 فدول ليهم فوايد معينه
مثلا لو طالع مطلع عالي قوي بالعربيه زي جراج مثلا و العربيه محمله ناس و حاجات ممكن تستخدمهم علشان العربيه اوتوماتك و لو سيبتها علي ال d ممكن تلاقي السحب ضايع
و كأنك بالظبط بعربيه مانيوال و طالع نفس المطلع هل بتجيب نقلات كبيره ولا بتخليك اولاني تاني؟!
و كذلك الوضع علي منزل كبير و مش عايز العربيه تفتح في السرعه(نزله المقطم علي سبيل المثال) بتجيب l او 2 علي حسب سرعه العربيه و بكده العربيه تتلجم و متجريش منك لوحدها
و في استخدام تاني خالص غير كل ده و ده
لما تيجي تشد مع واحد بالعربيه
اولا بتقفل الاوفر درايف
ثانيا بتجيب العصايه علي l
لغايه ما تجيب اخر الار بي ام و بعد كده تنقل علي 2
و تجيب اخره
و بعد كده تفك الاوفر درايف
و بعد كده تنقل علي d
علشان الموضوع ميلخبطكش
و كأنك بتنقل في المانيوال اولاني فتاني فتالت فرابع
متنساش ان الاوتوماتك 4 نقلات فقط

3- الكيك داون هو هو تسقيط النقله
كل اللي عليك تعمله انك تدوس بنزين جامد مره واحده و تفضل دايس
و في ظرف اجزاء من الثانيه العربيه هتسقط غيار لتحت و تفضل حارقه عليه لغايه ما تريح رجلك شويه من علي البنزين
و مش خطر علي الجير لأنه مصمم لعمل كده اصلا
و العربيات الانجكشن بتحمي الماتور انه يوصل للمنطقه الحمراء لعدد لفاته
فمتقلقش بس خد بالك ان الموضوع ده بيستهلك بنزين بطريقه بشعه
هو لازمته انك تتخطي حد بسرعه

4-بص يا كبير
انت ممكن تنقل بالتدرج ده بس مع مراعاه ان سرعتك تكون مناسبه و الا الار بي ام هيزعقلك!!
من d الي 2 الي l
من d الي l
من l الي 2 الي d
و كل النقلات دي و انت ماشي من غير فرامل
بس الممنوع و اصلا لو حاولت تجرب هتلاقي الفتيس مش بينقل انك تجيب من r الي d او العكس و العربيه ماشيه

5- لو الاشاره هتطول زي الاشارات الالكتروني دي يبقي تجيب n و تدوس فرامل او ترفع هاند بريك
غير كده خليك d و فرامل بس حط في اعتبارك انك بتستهلك بنزين
مهما ان كان اوعي تجيب العربيه علي الp في اشاره
لييجي واحد مهبوش في عقله يريح او يدخل فيك و ساعتها الجير بوكس بتاعك هيبدء ينهار
و لما تركن العربيه موازي للرصيف بلاش تسيبها علي ال p برضو
انا شفت ستات و هيا بتركن و اعوذ بالله منهم و مش عايز عيال صغيره او بنات مخها طاقق يقولي مبيحصلش!!!!
الستات لما ييجو يركنو بيكونو في منتهي الخطوره علي عربيات الناس و بيكون ساعتها عندهم انعدام تام في الدم و الاخلاق و الضمير
=========================
و تحافظ علي الجير بوكس انك و انت ماشي لقدام و جاي ترجع ورا العربيه تكون واقفه تماما و رجلك علي الفرامل
و الاهتمام بتغيير زيت الفتيس و الفلتر لو كان في في مواعييد تغييره
و بلاش تقطر عربيه الا لو الظروف حكمت غير كده بلاش
و ربنا يباركلك و انا كنت متابع رحله بحثك و ربنا يوفقك كمان و كمان

بصراحة كلام من الأخر