الموضوع: شرح فكرة تقطيع السيارات و استخدامها لتصليح عربيات الحوادث

بعد دخولى على اكثر من موضوع و لقيت ان الكثير يجهل ما هى العربيات المقطعة و الملحمة نصين و ايه الغرض منها و استخدامتها المختلفة, و بما انى سألت على تفاصيل كتير و من أفراد كتير شغالين فى المواضيع ديه (و منهم اصدقاء ليا) و ما ذهلت من معرفته عند محاولتى الدخول فى هذا الموضوع و مدى انتشار العربيات الملحمة بينا, قلت أعمل موضوع أجمع فيه ما جمعته من معلومات أو شفته بعينى و كلها اراء من مصادر مختلفة كان السبب الرئيسى لمعرفتى بالمعلومات ديه هيا حادثة سيارتى, الغريب انى لقيت تهافت و تنافس على شرائها أكثر من اى عربية سليمة

عموما أنا هحاول اشرح على قد ماعرف المعلومات و تسهيلها للأول مرة يسمع المصطلحات :

الأول أنا كان عندى امل انى أدخل عربية كاملة بنظام الجمرك أو التريبتك بنفس مواصفات سيارتى الراحت فى الحادثة و باسم حد مش تبعى أو مليش علاقة بيه و بعدين هو يبلغ عن سرقة العربية الجمرك أو يأخذ عربيتى و نحطلها نرم المرور الخاصة بهاو نقول ان العربية الجمرك هيا العملت حادثة و انا الزق رقم شاسيه عربيتى الحادثة فى العربية الجمرك و أحطلها نمرى الملاكى و الكان مشجعنى اكتر انى مكنتش عامل محضر بالحادثة.
طيب أولا من ناحية الحرمانية أنا مش قادر أفهم ليه هيا حرام لأن الجمارك ديه جباية من الدولة بتأخذها مننا و بتكسب فى العربية أكتر من المصدر المصنع و أكتر من المستورد و فى المقابل بتدينا خدمة زبالة و طرق زبالة و بتأمنش عليك و لو عملت حادثة عمر ما حد هينفعك, فمحدش يأولنا حرام عشان احنا مش النية نأخذ فلوس حد أو نسرق حد ده احنا البنتسرق.
طيب ايه الخلانى أتراجع, لأنى سألت ان أنا لو بلغنا عن سرقة عربية تريبتك الموضوع بيتحول لمباحث الأموال العامة و بالنسبة ليهم أى عربية جمرك مسروقة يبقى اتاخدت و اختفت عشان يتغير رقم الشاسيه الخاص بها بعربية أخرى ملاكى عاملة حادثة و بيفضلوا مراقبين صاحب العربية أو البلاغ و يراقبوا نشاطاتو (هيقرفوا حبتين) و هتلاقى مباحث العربيات نشطت حبتين فى الحرفيين و الورش المعروفة بنظام التلحيم بحثا عن العربية المبلغ عنها و كمان بتطلع نشرة بأوصافها لادارات المرور عشان أى حد يجى يرخص عربية بمواصفات قريبة يتم التدقيق فى رقم الشاسيه الخاص بيه و هل هناك اختلاف بين الصاج أو اللون بتاع منطقة رقم الشاسيه عند مقارنته بباقى صاج العربية و فى ناس بتهرب من ده بانها بدل ما تقطع المنطقة الخاصة برقم الشاسيه فقط و لحمها فى السيارة البديلة لأ بيأقطع الحوض ككل من العربية الحوادث و يحطة فى العربية الجديدة بس عيب الموضوع ده انه بيكلف زيادة و بيحصل رش فى الدواخل كنت هتجتنبه لو كنت نقلت المستطيل الفيه رقم الشاسيه فقط (عموما أغلب الناس بتفضل الطريقة الأسهل و هى تقطيع رقم الشاسيه و فقط و لحمه و رشه

طيب لو بلغت بحادثة توتال لوس عشان تخلص و تأمن نفسك فالبيجى يعمل المحضر مش أمين شرطة لا ديه لجنة متخصصة من المرور للتأكيد على انها العربية الدخلت جمارك فعلن. و طبعا لو اتفقست فيها محضر محترم و قضية و قصة

طبعا ده المفروض يحصل و أنا مجربتش أى حاجة من دول و عموما الناس أكدت ان الموضوع فيه نسبة خطر و ناس تانية قلولوى أن الموضوع مش خطر أوى كده, بس أنا اخترت ال safe sideو مرضتش أدخل فى الصداع ده, و عموما موضوع العربيات التريبتك ده و ضرب الملفات و أرقام الشاسيه كان بيحصل زمان كتير و خصوصا مع المرسيدس لغاية ما الحكومة شمت الموضوع و حطوا العوائق الأنا اتكلمت عليها.

طيب حل عربية الحوادث ايه, فى حل غير قانونى بس ناس كتير بتعملوا بسهولة و منتشر أوى عندنا فى بلدنا هوا انك تجيب نص عربية او عربية كاملة (و بيسموه هتجيب كورسليه كامل) من برة و تلحمها و تنقل رقم الشاسيه (طبعا الموضوع هيبقى أسهل لو جبت نصين بنفس اللون المثبت على الرخصة) و خلاص المرور ملهوش دعوة غير بس انك تروح تثبت الموتور الجديد الأساسا مفروض داخل مع العربية النصين بورقو.

ميزة الموضوع ده ان بيحيى العربية البتكون رايحة حوادث خلاص, و كمان بيديك فرصة تشترى عربية على مزاجك من بره, يعنى لو العربية الحوادث ديه كانت بى ام دبانة م 92 ممكن تركبلها بى ام M3 م 98 (لأنهم نفس ال شكل الخارجى), عندك عربية جولف م 99 1400 سى سى ممكن تركبها جولف 2003 1800 تربو كاملة (المهم يبقو نفس الشكل الخارجى). و الأغرب بأه من كل ده و اليبين اد ايه حكومتنا ناصحة ان انا شفت بعينى عربيات مش محدد فى الرخصة نوع العربية بالتفصيل يعنى انا شفت رخص عربية بورا مكتوب فى الرخصة "فولكس واجن م 2001" و بس, و بالتالى لو عربية بولو م 2001 عملت حادثة مثلا (و ديه حكاية واقعية حصلت فعلا) و حظ صاحب العربية ان رخصتها مكتوب فيها (فولكس واجن م 2001) فقط راح أحد الأفاضل اقترح عليه شراء عربية بيتلز نصين الشكل الجديد انتاج 2000 و أعلى بأعلى المواصفات و تلحيمها و نقل رقم شاسيه البولو و يبقى الراجل ركب بيتلز م 2000 مثلا بالمواصفات الهو عايزها بدلا من البولو .

اللطيف ان الغفير الكان بيشرد لعربيتى للبيع جابلى مشترى معتقد انها بورا م 2005 و الراجل كان جاى على الأساس ده و طلب يبص على الرخصة, و أتارى دماغو كانت ان الرخصة لو مش متحدد فيها الموديل كان هيلحمها ب جيتا الشكل الجديد أو جولف 5) و لكن عربيتى كانت م 2000 و مكتوب فى الرخصة بورا.
طيب هل فيه حل قانونى, اه فى حل قانونى لو العربية فعلن توتال لوس بتحدد ميعاد مع احد متخصصى الحوادث فى مرور الدراسة و بينقل العربية هناك للفحص و ساعتها الراجل بعد المعاينة بيسمحلك انك تركب نص, و بعد ماتكب نص للعربية المفروض انه هيلحملك رقم الشاسيه الجديد بتاع النص الركبتو على القايم (فى ناس قلولى انك ممكن تزبطوا و تتفادى الموضوع ده) وطبعا بيتثبت الرقم الجديد فى ملف العربية, بس لو دقلك رقم الشاسيه خلاص العربية ديه اتعلمت و من الصعب جدا انك تبعها حتى لتجار بعد كده


طيب ايه انظمة التلحيم, لأن كل واحد بيلحم بطريقة و ده بيعتمد على أسلوب تقطيع السيارة, و عموما الأسلوب الأكثر انتشارا العربيات بتيجى أساسا و الهدف بيعها قطع غيار (مش متقطعة خصوصا للتلحيم) وده بيخليه يقطع السقف من عند القايم الأمامى و الخلفى من فوق و يحل السقف تماما (كده العربية بأت من غير سقف) و بعدين يقطع الشاسيه (و ده تقطيعه بيختلف شوية من عربة للتانية و بسمع ان فىه بنط معينة فى الشاسيىه بيقطع من عندها عشان تكون أسهل فى التلحيم) و عموما الأسلوب ده بيستخدم عشان يقلل المساحة التخزينية داخل الكونتينر و يشحن عربيات زيادة (لأن زى ما قولنا ده غرضو استيراد العربيات كقطع غيار)

طيب فى ناس بتقطع عربية مخصوص من أجل التلحيم ف ديه بتبقى عارف حد من هيجيبها من بره و هيقطعهالك زى منتا عاوز و ده لتقليل عمليات اللحام و الدهان بيقطع القايم الأمامى فقط من فوق التابلوه الأمامى و يقطع الشاسيه من تحت من قدام الكرسى الأمامى و بالتالى العربية اتقطعت على قطعتين فقط بدلا من 3 قطع.

و أخيرا أسهل العربيات فى التلحيم و صعوبة اكتشافها هيا العربيات الكابورليه (يعنى المن غير سقف) و أكثرهم شهرة البى ام , و طبعا ده لعدم احتياج عمل قطع فى أى قوايم انتا بتقطع الشاسيه بس و طبعا عند البيع ممكن تبقى العربية كلها فابريقة او مش رشه غير العتب بس لاخفاء أثار التقطيع

عشان كده و من الانا شوفتو برجاء على أى مشترى لأى عربية خصوصوا الألمانى و اليابانى المتعدل (لانسر ايفوليوشن - سيفيك ال VTI & SIR) عدم الاستهتار و الاهتمام بالكشف الدقيق على القوايم و الحوض و الشاسيه و طبعا الأحسن الكشف عند متخصص دهان.
و خصوصا ان العربيات الموديلات الجديدة بيكون مغلفة من تحت بتصفيح للشاسيه و هو لو قطع و لحم الشاسيه من الحتت البيحط فيها التصفيح يبقى كل سنة و انتا طيب صعب جدا تعرف أو تشوف أى أثر للحم, غير أكيد البيعمل ده مفروض انع بيعفر العربية من تحت و من أثار الاستخدام ممكن بردو يخفى أثار التلحيم فى الشاسيه, و عموما أهو كل واحد و نيته و ربنا بيسترها.