توضح بسيط

**MOK3336** · 03-05-2010 01:02 PM

السلام عليكم و رحمة الله و بركاته
يا جماعة انا حصل معايا موقف مش عارف بقي نتيجته إية
انا معايا نيسان صنى 2010 لسة من يومين
أمبارح كنت ماشي بيها و باخد ملف بس المسافة مكنتش كافية المهم العجله اليمين اتخبطت في الرصيف و الإكصدام اتحك من تحت عشان كان يادوب فوق الرصيف بحوالي 5 مم ولا حاجة
فهل ده يأثر علي حاجة في الرعبية
عشان بعدها و أنا بحود يمين سمعت صوت حكة كده وده بيحصل لما بكون باخد ملف مثلا علي سرعة 50 ولا حاجة
فأنا بصراحة مدايق جدا
فهل ممكن ده يكون بسبب الخبطة دى
انا خايف يكون حصل حاجة في المساعد ولا حاجة أو المقص ( معلش أص دى أول عربية زيرو ليا )
و حاجة تاية اسوجر الطارة أزاى

**abdo_general** · 03-05-2010 01:38 PM

اولا الف مبروك علي العربية يا ياباشا

ما اعتقدش ان حصل حاجة عندك خالص ولا في العفشة ولا المساعد ولا المقص

تقريبا كل الحكاية ان من اثر الخبطة بقيت بعد كده وانت بتلف العجل بيحك في الرفرف
بمعني ان الرف متأثرا بالخبطة تحرك بضعة ميلليمترات وبقي بيحك في العجلة في الملفات

وما اعتقدش ان دا يأثر علي العربية في المشي يعني من جهة الثبات ولا السرعة
بس انت ممكن تعدي علي سمكري احتياطي علشان يبص علي الرفرف ويعدله في مكانه لو كان اتحرك حاجة بسيطة

وبرضه استني شوف الاعضاء هيقولولك ايه

عاوز بقي تسوجر الطارة وانت فاصل العربية وشايل المفتاح من الكونتاكت
لف الدريكسيون
بصراحة انا مش فاكر يمين ولا شمال
بس انت عامة لما تيجي تقف بالعربية خلي العجل مستقيم حفاظا عليه
وجرب تلف بقي هيبقي حاجة بسيطة يمين او شمال
وهتلاقيه عمل لوك معاك

**MOK3336** · 03-05-2010 01:47 PM

الله يطمنك يا جينرال عبده
بس انت انت قصدك الرفرف ولا الإكصدام
عشان الحكة كانت في الإكصدام و مفيش أى حاجة جات يم الرفرف

**Ahmed Galal** · 03-05-2010 02:22 PM

ما تقلقش ان شاء الله خير طالما العربية ماشية عدل فى الطوالى و ما فيش مشاكل و على الحكة ممكن يكون حتة من الكرتير البلاستيك نتيجة الخبطة خرجت من مكانها و بتحك فى العجل فى الملفات زيادة فى الاطمئنان ارفع العربية فى البنزينة و بص عليها و الاكصدام بيتحك على طول و الف مبروك على العربية معلش خدت بوسة خفيفة و ان شاء الله تكون الاخيرة و سيبها كده عشان العيون الحارة تهدى

**abdo_general** · 03-05-2010 02:24 PM

المشاركة الأصلية كتبت بواسطة MOK3336

الله يطمنك يا جينرال عبده
بس انت انت قصدك الرفرف ولا الإكصدام
عشان الحكة كانت في الإكصدام و مفيش أى حاجة جات يم الرفرف

تصدق انا مش عارف الفرق بين الاكصدام والرفرف

ما علينا انا قصدي زي الي في الصورة دي

Uploaded with ImageShack.us

علي حسب كلامك ان انت قصدك العجلة اليمين دي الي طلعت فوق الرصيف
والاكصدام الي اتحك برضه
فا الجزء الي انا مشاور عليه في الصورة بالاحمر هو ممكن الي اتغير مكانه بعض الشيء وبقي بيعوق حركة العجلة في الملفات
او بلاش بيعوق دي علشان كبيرة شوية
بيحك في العجلة وهو دا الصوت الي انت بتسمعه
فا انت ممكن تروح عند سمكري وانت واقف يبص عليها
علشان تطمن برضه
وممكن تخليه يعدلهالك
وما اعتقدش ياخد اكتر من 15 جنيه بالكتير اوي اوي

وان شاء الله تطلع حاجة بسيطة

واستني برضه شوف رائي الناس هنا ايه

**MOK3336** · 03-05-2010 05:31 PM

إية يا جينرال ده
انت بتدي مثال علي bmw طيب يسمع منك ربنا
يا جينرال العجله مطلعتش علي الرصيف الحمد لله هي اتخبطت فيه بس

أخويا أحمد جلال
شكرا علي الإهتمام و يا عم لو كان البوس بالطريقة دي انا مش عاوز بوس خالص
و انا هجرب تاني كده أنهرده لو ليقت الصوت تاني انا هتضر أعمل زى ما حضرتك قولت كده
بس يعني أروح البنزينة أقوله اية
و هياخد كام

وهل الخبطة دي ممكن تأثر علي حاجة في العربية ( مساعد - مقص - و خلافة )
معلش يا جماعة أستحملوني دي الغالية بت الغالي

**Ahmed Galal** · 03-05-2010 06:20 PM

معلش انا عارف انك زعلان العربية لو اتخدشت الواحد كانه هوا اللى اتعور المهم انت هاتروح البنزينة و ترفعها او تحطها على المجرة و بتاع الزوايا يبص لك على العفشة الادمانية و الكرتيرات و المصفح و انت بنفسك هاتلاحظ لو فيه حاجة غريبة بس قله العربية مخبوطة من تحت و عايز اطمن عليها و اديله 3 جنيه ده هايبص بص مش هايعمل اى حاجة و ما تخليش حد يوهمك انت بنفسك هاتبص تحت اللعربية و تقارن الناحية اليمين بالشمال السليمة و هاتقدر تلاحظ اى فرق