الموضوع: الحقونى العجل سخن مولع

والله حضرتك دوختنى فى الموضوع..بس المهم..
انا كان عندي نفس المشكله فى 128 كنت كل يوم الصبح أدو وأمشى..العربيه تقيله جدا جدا جدا..
تقيله إزاي؟؟؟يعنى أمشي وأدوس بنزين..و أجي أنقل للتاني ألاقيها متلته كده و عايزه تقف و ادوس التاني و أكبس..
فين وفين على ما أدركت المشكله..
كانت ببساطه مشكله فرامل و مكلبشه...
وسهل جدا تتأكد من المشكله دي..
حضرتك لو المشكله حصلت....
حتقف و تبتدي تجس على جنط من العجل...
لو لقيت واحده سخنه قوىقوى قوى..إعرف ان التيل بتاعها قافش على العجل..

المشاركة الأصلية كتبت بواسطة adelco

السلام عليكم
الساده الخبراء برجاء المساعده فى المشكله دى انا مش عارف اعمل ايه
من حوالى شهر انا غيرت التيل وبعد ماغيرته بفترة قصيرة بدأ يصفر المهم من حوالى اسبوع بدات الصفارة تزيد جدا لدرجه تضايق وكانى سايق كارو فرحت للميكانيكى (ميكانيكى بتاع واحد صديقى)وحكيت له على الموضوع فقالى التيل اللى هتركبه هيصفر برضه خلى التيل راكب احسن
وفعلا قلت استحمل الصوت وخلاص لكن ما قدرتش استحمل ورحت للميكانيكى وقلت له غيرلى التيل حالا انا مش طايق الصوت وغيرت التيل ووانا بجرب العربيه لقيت الفرامل ضعيفه قلت للميكانيكى فقالى لازم كده فى الاول وبعدين لازم تكارك عشان تجمع فى الاول شويه
المهم اخذت العربيه وروحت وتانى يوم وانا طالع لاقيت العربيه زى ما يكون مكلبشه مش عاوزه تتحرك وكان تحتيها حجر فقلت فى نفسى يمكن باردة يمكن كان حجر وما اخدتش واديت بس وانا ماشى كنت حاسس ان فى حاجه مش مضبوطه رحت الشغل وخرجت على الميكانيكى قلت له الموضوع فركب العربيه وجرب معايا وقالى انت كده فى عندك مشكله فى السحب على فكرة كدة يبقى فى حاجه فى الاسطوانه او الديسك مش فاكر قالهم الاثنين ولا واحده بس قلت يعنى ايه قال هنحل وبعدين نعرف فى ايه
طبعا انا اتصدمت لكن وافقت على كلامه قلت له حل وشوف عاوز كام قال لا بعد ما اخلص انا مش عارف هلاقى ايه قلت طيب حل قال دا الموضوع محتاج يوم شغل كل دة وانا مش فاهم فى ايه
المهم انا كان عندى مشوار قلت للميكانيكى طيب اروح مشوار 1/2 ساعه واجى اسيبلك العربي
ورحت المشوار لاحد اصدقائى وحكيت له على الموضوع فاستغرب واستبعد كلام الميكانيكى وقالى انه كده عشان يعمل اللى بيقول عليه لازم يحل الموتور بره العربيه فصعقت لانى كنت فاهم انه هيفك حاجه بسيطه واتصلنا بصديق اخر فقال اطلع كوبرى بالعربيه وجربها وجربت وما لقيتش مشكله
المهم انا ما رحتش للميكانيكى وروحت بعد ما تعبت لكن تانى يوم اللى هو الجمعه
اتصل احد اصدقائى وقالى انه عنده حاله وفاه فنزلت رحت له ولفينا شويه جبنا الكفن وعربيه الاسعاف ورحنا مستشفى الدمرداش واول ما وصلنا ركنت العربيه ببص لقيت ميه خارجه من العربيه فتحت الكبوت لاقيت القربه بتغلى والغطاء بيطلع ميه استنيت لما العربيه هديت وبفك الغطاء رجلى جت على العجل لاقيته مولع فحطيت ايدى كنت هتحرق ببص على العجله اليمين لاقيت نفس الموضوع وكمان ريحه زى ما يكون كاوتش محروق وبصيت على العجل الخلفى لاقيته كويس
المهم بقيت لايص مش عارف اعمل ايه سالت احد سواقى التاكسي عن ميكانيكى قالى مش عارف وبعدين قالى انت تبع الجنازة قلت له اه فقال طب ورينى عندك ايه فشرحت له الموضوع قالى كدة يبقى الفرامل واخده هوا وقالى ادخل العربيه وكارك وكرر معايا العمليه دى وهو بيعمل حاجه فى الكبوت وقالى كده تمام العجل مش هيسخن منك ثانى استنى لما العربيه تبرد وبعدين زود ميه واتكل على الله وكنا هنروح المنوفيه وفعلا عملت زى ما قالى
وصلينا الجمعه واخدت الناس وطلعت ورا الجنازة لحد ما وصلنا الطريق السريع بتاع قليوب والعربيات ركنت على جنب تستنى بعضها عند المؤسسه وركنت معاهم وببص لاقيت الميه بتغلى تانى ولاقيت العجل مولع برضه رغم ان الحرارة فى المؤشر كانت 90 - 91
المهم كان شكلى وحش جدا خصوصا انى كنت معايا 3 حريم وصديقى طبعا نزلوا كلهم واتوزعوا على العربيات وانا استنيت لما العربيه بردت وروحت لانى كنت اتخنقت وما رحتش فى حته
المهم اتصلت اليوم بالميكانيكى الغالى اللى انا كنت بروح له من البدايه وحكيت له قالى تعالى بعد الشغل نشوف يمكن المساطر قافشه ولا حاجه
وانا هروحله بعد الشغل
ارجو المساعده وانا هتابع معاكم واقول لكم حصل ايه
انا عارف انى رغاى 3 شويات بس انا ما بعرفش احكى طيارى فسامحونى
وجزاكم الله خيرا

اللى بتقوله معناه ان الفرامل ممكن تكون قافشة .. حط العربية على سطح مستوى .. عشق اول .. سيب دبرياج من غير ما تدوس بنزين .. خلى العربية تتحرك شوية و بعدين مور .. سيبها لما تقف لوحدها من غير فرامل .. لو العربية وقفت بشويش و بالتدريج يبقى الفرامل مش قافشة .. لو العربية و قفت بس كانك دايس فرامل على خفيف يعنى اسرع نسبيا يبقى عندك جهاز قافش .. لازم يتحل و يتنضف .. وممكن يكون عندك حاجة فى الماستر يعنى لما بتدوس فرامل و تسيب الزيت مش بيرجع تانى فتفضل الفرامل قافشة

لو المساتر قافشة , كان المفروض الميكانيكى اللى غيرلك التيل يحس بيها وهو بيفتح الماستر عشان يركب التيل الجديد
وكده كده خلى الميكانيكى يبص عليها , ممكن تكون محتاجة نضافة بس

اهم حاجة شوف ميكانيكى يكون بيفهم عشان ما يدوخكش كتير وان شاء الله خير

المشاركة الأصلية كتبت بواسطة galilio_mad

لو المساتر قافشة , كان المفروض الميكانيكى اللى غيرلك التيل يحس بيها وهو بيفتح الماستر عشان يركب التيل الجديد
وكده كده خلى الميكانيكى يبص عليها , ممكن تكون محتاجة نضافة بس

اهم حاجة شوف ميكانيكى يكون بيفهم عشان ما يدوخكش كتير وان شاء الله خير

و الله لو الميكانيكى بيفهم ماكانش قاله غير اسطوانة علشان العربية تقيلة و العجل سخن .. انا شايف انه كان المفروض بدل مايغير الاسطوانة يغير الميكانيكى