الموضوع: ساعة الزيت للكورولا الملكة 93-97

كنت مروح بالليل و راجع من مشوار و اول ما قربت من البيت بدأت لمبة الزيت ترعش جامد و بعدين طفت و ما رجعتش تانى انا قلقت جامد و مشيت ورا نصايح النت
و لقيت طريقة التشخيص كالتالى:
1-مراجعة اللمبة اللى فى الطابلوه ممكن تكون هاتبوظ فكيت و غيرتها بلمبة تانية متاكد انها شغالة تمام فى الطابلوه
2-مراجعة السلك اللى رايح لساعة الزيت اللى فى الموتور و مراجعة فيشته و تمت المراجعة
3-تغيير ساعة الزيت و نزلت ادور عليها النهاردة جديدة لقيتها اصلى بتعمل 125 جنيه و مش موجودة حاليا و يابانى ب 25 جنيه و تعبانه جدا و هاضطر اقطع فيشة العربية الاصلية و اعدلها عشان تركب و طبعا ما رضيتش بالحل ده طلعت على الحرفيين لقيتها استيراد ب 75 جنيه و صعقت من ان تمن المكنة ال 1300 كربراتير استيراد 6000 جنيه لانها بقت نادرة جدا فاللى معاه المكنة يحافظ عليها قوى قوى قوى
و ال 1600 انجكشن ب 4500 ارقام فلكية يعنى
حاليا ساعة الزيت الجديدة ركبتها بتتركب ببيبة عادية و كمان اسغربت ان كل ما اروح لحد يقوللى ساعة الزيت فى الكورولا الملكة بتبوظ بسرعة او عيب مشهور فيها مع انها اول مرة تعمل معايا الموضوع ده من سنتين عمرها معايا
4-قياس ضغط زيت المكنة بعداد ضغط و جارى حاليا البحث عن العداد المناسب و الفتحة المناسبة عشان اركبها مكان ساعة الزيت و اقيس الضغط و العربية سلانسيه و اطمن على المكنة لو ما كانتش مشكلة ساعة زيت
5-الكشف على طرمبة الزيت و يا رب ما اوصلش لموضوع الطرمبة ده عشان وجع القلب و الفك و التركيب و بتعمل 260 جنيه اصلى و ليها جوان ب 60 جنيه بردك اصلى
6-و ده اخر و اسواء السيناريوهات ان تكون مجارى الزيت فى المكنة مسدودة و بتعمل مشكلة فى ضغط الزيت و بردك ربنا يستر و ما اكنش فى البند ده

جارى تجربة ساعة الزيت الجديدة و ربنا يسهل و تطلع هيا اللى عليها المشكلة
انا قلت اشارك ملاك الملكة بالمعلومات ديه عشان تفيدهم و اى معلومات اضافية هارفعها فى الموضوع ده ان شاء الله

ممكن تكون ال 1300 قليلة بس المكنة بتاعتها ال 2e من احسن مكن التويوتا اللى اتعاملت معاه سواء على ادائها او اعتماديتها ما اتعاملتش مع ال 1600 بس اكيد ما تقلش عنها و بعد التجربة و الخروج بالعربية كذا مرة اقدر اقول ان مشكلة ساعة الزيت فعلا هيا اللى صح بنسبة 90 % لانها ما نورتش تانى و بقت بتفصل نور الزيت بسرعة بس هاجرب تانى للتاكيد عشان يبقا الموضوع نهائى ان شاء الله و شكله فعلا عيب مشهور فى الملكة و الله اعلم و القطع الاستيراد اثبتت كفائتها بجد و شكلى هابطل اجيب اصلى تانى