الموضوع: اتصال من مدير شركة اوماترا مصر مستر : تادروس

ازيكم ياشباب

من حوالى ساعة كدا جالى ايميل من مدير شركة اوماترا مصر
الراجل طالب منى جميع اتصالاتى وطبعا رديت برقم تليفونى وايميلى

وفعلا اتصل بيا لمدة 17 دقيقة وشرح حاجات مهمة وكان ملخص المكالمة كالاتى :

مساء الخير معاك استاذ م.ت مدير شركة اوماترا مصر
انا: مساء الخير يافندم وشاكر لسرعة اتصال حضرتك بيا
استاذ م.ت : انا شايف ان حضرتك قدمت شكوى لفيات ايطاليا .... ياترى ممكن اعرف بخصوص اية اللى أعرفة انك معندكش عربية فيات اصلا

انا : لا معنديش بس بصراحة كنت ناوى أجيب 3 عربيات منهم 2 500 وواحدة لينيا ودخلت نايل موتورز
اشوف التعليقات على العربية ومراكز الخدمة وطبعا اغلبية التعليقات كانت بتشتكى من سوء المعاملة وقطع الغيار النار
وتانى حاجة ليا واحد قربيى معاة مشكلة فى عربيته الفيات اللينيا

تالت حاجة انا مثلا من المحلة يعنى مفيش مركز
صيانة معتمد الا فى القاهرة او اسكندرية
ودول بعيد عنى ودا طبعا يخلينى افكر الف مرة
قبل ما اجيب العربية اللى بحبها وابقى مضطر
اجيب العربية اللى ماشية فى السوق ( عملا بمبدء حسن السوق ولا حسن البضاعة )
استاذ م.ت : طيب ممكن تدينى رقم تليفونة واسمة
وانا هتصل بية والعربية تتصلح وترجع تمام

انا: مفيش مشكلة بس لازم استأذنة الاول بس
تسمحلى اقولك ان فى حاجة غلط فى التسويق
ازاى عربية زى الفيات مش بتعمل توزيع كويس
زى السيراتو على سبيل المثال
( الجماعة بتوع السيراتو والله مش بهاجم العربية)

استاذ م.ت : السر ان السيراتو 1600 وفى منها اوتوماتيك بس الفيات حضرتك عارف مش بينزل منها
اتوماتيك حاليا مش زى اللينيا
اللى عندى 1400 وبتدى 77 حصان تانى حاجة ثقافة الشعب بتاعتنا
بتحب العربيات اللى بشنطة ... حضرتك عارف كام
عربية بتبيع هاتش باك فى مصر

انا : كتيير على ما أظن

استاذ م.ت : لا ..... بس حضرتك اقرا تقرير ...... عن توزيع
العربيات الهاتش باك فى مصر

انا : شوف حضرتك كان فى عربيتن اسمهم فيات
اونو وفيات بونتو كان واكلين الجو وبردة كانوا هاتش
باك مش شنطة وكانوا عاملين شغل جامد جدا

استاذ م.ت : هو فيه فعلا تقصير فى الاعلانات
بسبب ان توزيع فيات على بعضة 2000 عربية فى السنة مقارنة بعربيات تانية .... مراكز الخدمة احنا
بنزود فيها وحاليا بنحاول نظبط فيها بس الضغط كبير
اوى على المراكز الموجودة ويمكن دا اللى مزعل
ناس كتيير فى المنتدى بس اوعدك هيكون فيه
تغيير كبيير الفترة اللى جاية وانت معاك ايمليى
لو حد عندة مشكلة كبيرة اديلة الايميل
وخليه يتصل بيا شخصيا وانا بنحاول بكل جهد
نتصل بكل واحد عندة مشكلة فى عربيتة ونحاول
نحلها

انا : والله ياريت لان عربيات فيات دى مظلومة اوى ومش واخدة حقها وانا اسف على مهاجمتى لفيات
بس لما بتحب حاجة فعلا بتبقى خايف عليها
حتى لو مش بتاعتك ونفسك دايما تشوفها حلوة

استاذ م.ت : علشان كدا اتصلت بحضرتك اوضحلك حاجات كتيير حتى لو معندكش عربية فيات وانا فعلا اسف للناس اللى ملقيتش معاملة كويسة فى التوكيل

دا يا جماعة كان ملخص المكالمة ... واضح انه الفترة اللى جاية هيكون فى تغيير فى سياسات التوكيل
تجاه العملاء بتوعه

انا ياجماعة مش شغال فى التوكيل ولا بعملة دعاية بس حبيت انقلكم اللى حصل طبعا بعد استئذان مدير التوكيل فى نقل ملخص المكالمة

وربنا يهدينا واياكم والتوكيل كمان حسن المعاملة