فى رحلتى فى البحث عن شقة بسعر رخيص (على اساس اسعار اليومين دول) قررت ادور فى منطقة جسر السويس لانى اعرف ان فيها مناطق كتيرة رخيصة وعشان كده عايز اسال عن كام منطقة فى جسر السويس ياريت لو حد يعرف عنهم حاجة يقول عيوبهم ومميزاتهم والمناطق اللى عايز ابحث فيها عن شقة واتمنى ان اى حد عنده معلومة عنها يقولى عليها :

1-مدينة قباء (ودى انا روحتها من كذا سنة وكانت الشوارع ضيقة وغير ممهدة والعربيات ركنة فوق بعض) فهل فيها مشاكل تانية فى الكهرباء والمياة والصرف الصحى ولا مفيش غير المشاكل اللى انا ذكرتها ياريت حد يعرفنى يكسب فيا ثواب

2- خلف حديقة بدر (المنطقة دى ماروحتهاش قبل كده بس اسمع ان كل الشباب اللى عايز يتجوز بيروح يشترى هناك سواء تمليك او ايجار قديم بسعر رخيص فياترى اى عيوب المنطقة هناك يعنى مشاكلها فى ايه بالظبط)

3- شارع جمال عبد الناصر (برضه المنطقة دى مشهورة باسعارها الرخيصة وفيها منطقة اسمها الحرفيين وفيها ورش وكده فهل ده السبب ان اسعارها رخيصة ولا فيها مشاكل تانية)

4- شارع عمر بن الخطاب (اعرف انه من اشهر الشوارع هناك ومن المناطق النضيفة فهل فى شقق باسعار كويسة يعنى فى حدود 100 الى 120 الف جنيه ولو فى حد راح هناك ياريت يكلمنا عن شكل المنطقة واسعار الشقق فيها)

ياريت ياجماعة تساعدونى فى الموضوع ده والأجابة عن استفساراتى لانكم مش هتفيدونى انا بس ده فى شباب كتير اوى بيدور على شقق فى المناطق دى فبدل ما حد يدبس فى منطقة فيها مشاكل كبيرة فى الخدمات وكده يروح يدور فى منطقة احسن تناسب ظروفه المادية

ياريت ما حدش يبخل بالأجابة اى حد عنده اى معلومة ياريت يقولها مش لازم عن المناطق دى بس لو يعرف مكان فى شقق فى جسر السويس بسعر كويس ياريت يقول عليه

منتظر ردودكم