الموضوع: النوبيرا و مشكلة الميكانيكية عديمي الضمير

السلام عليكم و رحمة الله و بركاته,
اشتريت عربية نوبيرا مو2005 من سنتين, حالتها كانت جميلة و عاملة 57000كم, طبعا اول لما جبتها كنت عايز اغير طقم السيور و الكاتينة و الذي منه, و بدأت رحلة البحث و العذاب, التوكيل غاليييي نار و الميكانيكية بيجربوا في العربيات, كان عندي سوزوكي سويفت قبل النوبيرا و كانت حقل تجارب و بوظولي الموتور و افلام كتيرة, المهم قلت اتعلم من خبراتي السابقة و لكن!! قلت في نفسي ماهو التوكيل برضه الصنايعية فيه بني ادمين و ممكن يغلطوا برضه. و في يوم روحت اشتريت طقم السيور و سير الكاتينة .. الخ و دلنى محل قطع الغيار على مركز لتصليح السيارات و قالي انه محترم جدااااااا. سمعت كلامه و رحت المركز دة في فيصل و فعلا لقيت عربيات حديثة بتتصلح هناك. المهندس صاحب الورشة ديه مش بيحط ايده في حاجة, سايب الصنايعي اللي عنده هو اللي بيشتغل بايده, المهم عملولي طقم السيرفيس و كنت مبسوط جدا الصنايعي ايديه تتلف في حرير و صاحب الورشه كل جيرانه بيسلموا عليه و بيضحكوله و كانت هذه بداية جر الرجل. بدأت المشكلة لما قلت اغير المساعدين امامي و خلفي لان المساعدين الامامي كانوا جايبين زيت و الخلفي كانوا تعبوا خالص. كلمت الاسطى صاحب الورشة قلتله انا رايج اجيب مساعدين قالي اوعى تجيب جديد السوق كله مضروب, هاتلك استيراد احسن جدا و كنت مندهش هو ليه متحمس للاستيراد بس مكنتش واخد خوانه و صدقته, المهم رحتله قالي انا هاجيبللك المساعدين الاستيراد من محل جاري اللي بيبيع قطع غيار استيراد بس سيبني انا اروحله لوحدي علشان لو شاف بيه قدامه هيعلي السعر, برده مخدتش خوانه, راح و رجع قاللي المساعدين سعرهم 450 جنيه و المقصات 230بعد مفاصل معاه (يا حرااام) قلتله موافق و بنية طيبه كنت فاكر الاربع مساعدين ب 450 بس عرفت في الاخر ان اللي قدام ب450 و اللي وره ب 450 يعنى 900 جنيه و 230 مقصات و 200 تركيب بس للاسف فهمت متاخر بعد مركبهم. دفعت الفلوس و طلعت بالعربية و الاقي المساعدين الامامى مش متربطين كويس, رجعت بسرعة الصنايعي قالي دة راح مشوار ايه المشكلة؟ قلتله انتم مركبين الحاجات مفككة ( صنايعي تاني غير اللي انا شفته في اول زيارة), طلع جرب و قالي فعلا تعالى يا واد يا فلان فك تاني, و طبعا دمي اتحرق و كنت نفسي امشي منا عنده في الشغلانة دية من الصبح و الليل قرب يدخل, المهم ظبطولي ربط الحاجات و مشيت رحت اضبط زوايا, كل ماجي اجيب الدركسيون و انا واقف شمال اسمع صوت طقة قلت يمكن بعد ما اظبط الزوايا الصوت دة يروح بس مراحش بعد ضبط الزوايا, قمت كلمت الاسطى قالي اصبر على العربية يومين كدة علشان البيض و الجلب تلين قلت ماششييي, يومين و برضه الصوت زي ما هو, روحتله قلتله شكل بيض و جلب المقص الشمال و حشين, زعل قوي و نده الصنايعي فك المقص و ندهلي و قالي ده مش من المقص انت هتظلمنا ليه؟ ده الصوت ده من علبة الدركسيون و حلها تجيب علبة استيراد ب 450حم قلت في باللي يا و لاد الايه انتم عايزين تشتغلوني تاني ده حتى مكلفش خاطره ياخد وقت يتاكد؟ المهم قلتله طب هشوف كدة و هابقة ارد عليك (علشان انفد بجلدى و اقول يا فكيك) روحت سالت عند سوسو في فيصل لقيت المساعدين ب 550جم الاربعة و علبة الدركسيون ب 300 جم فعلا اتنصب عليا, المهم اللي حصل حصل.. انا طولت عليكم بس علشان تخدوا بالكم و ميتضحكش عليكم من الميكانيكية دول ولازم احنا في المنتدى دة يكون لينا وقفة مع اللي بيحصل دة.عندي سؤال علشان ميتضحكش عليا تاني حد يعرف الطقة اللي في الدركسيون ديه ممكن يكون سببها اية؟ انا شاكك تكون بطاحات و كوبايات؟ و حسبي الله و نعم الوكيل ميكانيكي و بتاع قطع غيار مستعمل ضميرهم مات

ارجوا المساعدة؟