السلام عليكم و رحمة الله
الطريق من ا6 اكتوبر الي العريش كالتالي
هتطلع بالسيارة من اكتوبر علي المحور و منه تطلع علي الدائري اي ناحية تريحك سواء يمين او شمال
هانقول ان حضرتك هتدخل يمين يعني هتطلع علي دائري اللي بيروح للمعادي و القاهرة الجديدة
هتفضل ماشي عليه لغاية منزل الاسماعلية الصحراوي " هايكون علي ايدك اليمين "
الطريق علي الدائري هياخد من 60 ل 65 ك و الطريق مفتوح و حلو
خلال هذه المسافة ستسير علي الوصلة الجديدة بتاعت الدائري و ستعبر المنيب و القطامية و كارفور و هاتدخل من نفقين بالتتابع واحد للقاهرة الجديدة و التاني الحي العاشر بمدينة نصر
و ستمر علي منزل السويس و سيكون منفذ مطار القاهرة علي يسارك
الي ان تجد منزل طريق الاسماعلية
كما اسلفت المسافة حوالي 60 كم
بعد نزولك الي طريق الاسماعلية الصحراوي الطريق واحد مفتوح المسافة الي الاسماعلية في حدود 110 كم ما فيش فيها توهة
عند مدخل الاسماعلية ستجد طريقا الي اليسار بجوار بنزينة يشير الي القنطرة غرب و بورسعيد ادخل فيه
الطريق سيكون موازي لقناة السويس من بعيد
هذا الطريق في حدود 15 كم ستجد في هذه الاثناء انك تمر من اسفل كوبري مبارك للسلام بدل ما تكمل طريقك لبورسعيد خذ اول يوترن و ارجع عشان تدخل الكوبري - كأنك راجع الاسماعلية تاني"
ادخل الي الكوبري يمينا ادفع الرسوم 2 جنيه للملاكي و استعد بالحزام لأن هناك لجنة رزلة
هاتطلع الكوبري عادي جدا و استمتع بالمنظر
بعد الكوبري ما يخلص هتجد يفطة بسهم مكتوب عليها العريش اتبعها
و بعدها بعشرة كم تاني يافطة بسهم لليمين مكتوب العريش
من هنا 160 كم تقريبا للعريش طريق واحد مفيش لا يمين و لا شمال ما يتوهش
المسافة الاجمالية تقريبا 350 كم اكثر قليلا او اقل قليلا
طريق العريش بعد العبور الي سيناء ممتاز
فردة رايحة و فردة جاية و الاثنان بعيد عن بعض
الكثافة السكانية منعدمة
الطريق به انارة بالكامل و عليه علامات ممتازة
لا يوجد ردار في الغالب الا بعد شركة النصر للملاحات قبل مدخل العريش بعشرين كم و يكون نهارا فقط
الطريق في سيناء به عدة كمائن شرطة لا تقلق منها " حوالي الاربعة"
احذر من الرمال التي تأتي من الصحراء علي الاسفلت فهي كفيلة مع السرعة بقلب اي سيارة مهما كانت ثابتة او ثقيلة
اخيرا اذا كنت قادما للعريش الان للمصيف فيرجي ارجاء الرحلة لبداية شهر اغسطس حتي يمكنك الاستمتاع بالنزول في البحر بعيدا عن قرص القناديل شهري 6 و 7
المفضلات