عاوز اعرف يعني ايه كبالــن

**boing** · 24-06-2010 04:15 AM

السلام عليكم

كنت عاوز اعرف من حد متخصص او عارف سوالي
يعني ايه كبالن؟ وايه وظيفتهم ؟وايه الاعراض اللي بتنتج عن تلفهم؟ وايه اللي يسبب اي مشكله فيهم عشان نتجنبها؟؟وكيف يمكن صيانتهم؟؟الاجابه باستفاااااااضه

وشكرا

**bassem.naguib** · 24-06-2010 11:55 AM

أولاً انا مش متخصص .. بس ممكن أفيدك باللي أقدر أعرفة .

الكبالن عبارة عن مكون من مكونات آلات الجر في العربيات .. ودي بتكون في العربيات الجر الأمامي (غالبية العربيات الموجودة دلوقتي بتكون جر أمامي .. يعني بتستخدم الكبالن) وهي تعتبر تقنية غيرت مفاهيم آلات الجر في العربيات بعد ما كانت جر خلفي لنقل الحركة من الموتور للعجل الخلفي عن طريق الكرونة.. ويحتوى الكوبلن الواحد على مجموعة من رولمان البلي بيكون محكوم داخل مجرى خاص لكل بلية منه .. والكوبلن بيكون حر الحركة بمعنى أخر لو حودت العربية لجهة اليمين بيتحرك مع العجل لنفس الجهة .. ولو العربية نزلت في مطب بيكون عنده المرونة للنزول والطلوع مع العجلة (ممكن تشبهة بالحركة المفصلية لأي مفصل في جسم الإنسان)

ووظيفة الكبالن ببساطة هي نقل الحركة من الموتور إلى العجل الأمامي .

أما عن أعراض بداية تلفهم هو سماع صوت طقطقة عند أخذ الملفات أو المنحنيات الشديدة .. ولو تم إهمالها يزيد صوت الطقطقة في الملفات واحتمال حدوث نفس الصوت في المشي الطوالي (وفي الحالة دي يجب تغيير الكوبلن فوراً .. لأن ممكن البلي يفرك من مكانه ويسبب مشاكل كثيرة وحوادث أثناء السير) .

ولإطالة العمر الافتراضي لأي كوبلن وللحصول على الأداء الأمثل له يجب مراعاة ما يسمى "كاوتشة الكوبلن" .. ودي بتكون كاوتشة مرنة تغطي الكوبلن للحفاظ على الشحم الموجود داخل الكوبلن من التسريب .. ولو حدث أي قطع في هذه الكاوتشة سوف يحدث تسريب للشحم ودخول الأتربة والمياه داخل الكوبلن نفسه .. مما يسبب تلف رولمان البلي .. ولذا يجب متابعة كاوتشة الكوبلن باستمرار لملاحظة أي تسريب للشحم من عدمه .

وبالنسبة لصيانتهم .. هناك ما يسمى بصيانة الكبالن بوضع بنط لحام في مجري رولمان البلي .. ولكن لا ينصح بهذه الطريقة لأنها غير فعالة بالمرة .. بمعنى أخر لو الكوبلن باظ .. مفيش حاجة أسمها ممكن يتصلح (رأي شخصي بحت) .

أرجو المعذرة عن السهو أو الخطأ في أي معلومة .

**bassem.naguib** · 25-06-2010 03:50 AM

المشاركة الأصلية كتبت بواسطة boing

شكرا اخي الكريم على المعلومات القيمة

على الرحب والسعة

**bassem.naguib** · 25-06-2010 12:12 PM

تمام كدة

**heshamzaky** · 25-06-2010 12:37 PM

الله ينور شرح زى الفل و التدعيم بالصور فوق الممتاز شكرا لك مرة اخرى

**x512** · 25-06-2010 09:45 PM

الجزار دا حكايه.....مافيا لوحده.....بجد ما شاء الله عليك...يا ريت اعرف ايه المصادر اللي بتجيب منها المعلومات دي او المواقع الخاصه بال automotive egineering

**Eng_Mostafa_89** · 26-06-2010 01:28 AM

المشاركة الأصلية كتبت بواسطة gazzar91

الكبالن هي وصلات سرعة ثابتة تنقل السرعة من محور إلى أخر مائل عليه دون أي فقد في القدرة أو السرعة...
يعني على عكس الصلايب بتاعة الكردان اللي كانت بتنقل قدرة مع فاقد كبير و كمان كانت بتقف (بتدقر) لما تنثني بزاوية أكثر حدة... يعني ممكن الكوبلن ينحني عادي جداً زي في حالة الـ steering
كانت الشركة الفرنسية ستروين أول من أنتج الفكرة... و فيات أول من نفذها مع وجود محرك بالعرض من خلال السيارة 128 موديل 1969 وأخذت عنها جائزة car of the year
الكوبلن إسمه cv joint أو constant velocity joint ..
بيتكون من(كما بالصورة)

للأسف مش فاكر المسميات دي بلغة السوق.. أعذرني

فكرة عمله..

طيب إستخداماته...
في الغالب عربيات الدفع الأمامي..
بيبقى خارج من الكرونة (مجموعة التروس الفرقية أو الساتوليك)اللي في الفتيس مودي على العجل زي كده..

و في الدفع الرباعي..
زي اللي في الصورة دي.. و مش محتاج شرح علشان مادخلكش في lمتاهات الدفع الرباعي

في الدفع الخلفي في حالة التعليق المستقل (independent suspension) زي المرسيدس
بيبقى خارج من الفتيس عمود كردان و رايح لعلبة ساتوليك خارج منها جوز كبالن...(لو عاوز شرح لعلبة الساتوليك أو الكرونة..أنا تحت أمرك بس في مشاركة تانية علشان ما أتوهش)

اللي بيظهر لما الكوبلن يبوظ بيبقى صوت طقطقة في الملفات بالذات الضيقة.
واللي بيظهر لما الكاوتشة تبوظ من غير تلف الكوبلن بيبقى نشع شحم من الكاوتشة وإنقطاعها زي كده

أسباب تلفهم...
ركن العربية فترات طويلة و العجل مش مستقيم (يعني كاسر الطارة يمين أو شمال).. ده بيتلف الكوبلن بس بطريقة غير مباشرة.. يعني بيتلف الكاوتشة اللي عليه فتجيب الشحم الي فيها تقوم مبوظة الكوبلن.
الفرك بالذات لو بعوجة... بيبوظ الكوبلن بطريقة غير مباشرة..
غير كدة الكاوتشة ليها عمر و هاييجي عليها وقت و تخر شحم..
الصيانة بتبقى في حالة إن الضرر كان في الكاوتشة و ملحقش يضر الكوبلن نفسه... بتبقى بتغيير الكاوتشة بعد ملو الجديدة شحم جديد هي و جسم الكوبلن (الشحم في الغالب بييجي مع الكاوتشة)

لو الضرر في الكوبلن يبقى يتغير أو ياخد بنط لحام بس أنا شخصياً أحبذ الحل الأول لأن الثاني مؤقت...

أي إستفسار أنا تحت أمر حضرتك و يا رب أكون أفدتك بمجهودي المتواضع ده...
في رعاية الله...

الله ينور عليك يا جزار
انا كدة هعملك حساب السنة اللى جية

-

-

الموضوع: عاوز اعرف يعني ايه كبالــن

LinkBack

أدوات الموضوع

عرض

-

-

-

-

المواضيع المتشابهه

اعرف انت تشبه انهي نوع من الحيوانات او الطيور ( سوري يعني ) بس ظريفة بجد

عاوز اعرف يعني ايه العربية تدخل على examiner

عايز اعرف يعني ايه كورنيك

عايز اعرف يعني ايه ترصيص الكاوتش

الكلمات الدلالية لهذا الموضوع

المفضلات

المفضلات

ضوابط المشاركة