من نصر الدين لمدينة 6 اكتوبر

**wise** · 29-06-2010 12:44 PM

يا جماعة انا ساكن في شارع الهرم في نصر الدين عمرانية و معايا عربية عايز اعرف امش ازي لحد ما اوصل ل اكتوبر ك مدينة من الداخل و بردوا طريق الرجوع هيبقي ازاي للاسف عمري مروحتاها و شكراااا مقدمااا

**wise** · 29-06-2010 12:45 PM

بجد يا ريت الي يعرف يوصفلي وصف تفصيلي لروح ازاي و ارجع لنصر الدين ازاي تاني

**Salamonti** · 30-06-2010 06:37 AM

السلام عليكم..

أنا هاوصفلك طريق بس معلش هو طويل شوية

فيه طريق أسهل منه بس انا مش حافظه

بص يا سيدي (أنا ساكن جنبك في نصر الدين)

هاتطلع من نصر الدين من عند الجامع
سيبك من شارع الترعة (اللي التكاتك بتقف عنده)
وخش أول ناصية يمين بعده (من عند السوبر ماركت)
خليك مع الشارع للآخر لحد ما تطلع عند كوبري فيصل
اطلع كوبري فيصل وانزل أول منزل شمال
هاتنزل على امتداد شارع السودان
خليك مع شارع السودان طوالي
تعدي شارع الملف بتاع شارع التحرير وتكمل مع شارع السودان
تعدي بولاق وتعدي جامعة الدول وتكمل مع السودان
تعدي أرض اللواء لحد ما توصل لميدان لبنان
من ميدان لبنان تاخد طلعة المحور
خليك مع المحور على طووووول
تلاقي نزلة الصحراوي سيبك منها
تنزل من عالمحور وتكمل طوالي
تلاقي مدخل الشيخ زايد والهايبر سيبك منهم وكمل طوالي
لحد ما توصل لميدان جهينة (في الميدان فيه تمثال كبير فيه إعلان شركة جهينة بتاعة العصير)

خد منه يمين واتوكل على الله شوف رايح فين بقا في اكتوبر

زي ما قلتلك فيه طريق أسهل من ده عن طريق الدائري من آخر شارع الهرم.. بس انا للأسف ماعرفوش

وفيه طريق تالت عن طريق شارع البحر الأعظم وتطلع الدائري وتاخد الوصلة الجديدة تنزلك عند طريق (أعتقد الفيوم أو الواحات حاجة كده) بس للأسف برضه مش حافظها !!

معلش انا آسف اني وصفتلك طريق طويل وفيه لفة كبيرة بس انا مالقتش حد رد عليك خالص
فقلت اهو نص العما ولا العما كله

**dr-mohamed** · 30-06-2010 07:48 AM

طيب خد عندك العما كله
الطريق الاول
من عند نصر الدين تاخد شارع الهرم لاخره وتلف يمين مع اللفة هتلاقي نفسك عند نادي الرماية تخلي النادي على شمالك وتكمل على طول
عند اول لفة هتلاقي مكتوب المطار تدخل يمين مع اللفة دي وتكمل على طول لغاية ما تلاقي فيه اشارة وتقاطع تاخد شمال تلاقي نفسك عند جامع الحصري وجامعة 6 اكتوبر

الطريق التاني من نصر الدين تاخد كوبري الجيزة وتنزل شارع مراد وتفضل ماسك الطريق على طول لغاية العجوزة وتكمل لغاية ما تلاقي نفسك تحت كوبري مايو تقوم تاخد شمال وتمشي شوية اول لفة شمال تلف فيها وترجع تاني كانك راجع على جامعة الدول اول لفة يمين هايبقي جنبك سنترال تاخد اليمين وهتلاقي كشك المرور تاخد يمينك وتمشي شوية وبعدين تكسر شمال وتمشي على طول تلاقي نفسك اخدت الطريق اللى اخونا السابق وصفه لك
بس ميزة وصفتي ان الزحمة فيها اقل كتير
وتكمل باقي الوصف زي ما اخونا قالك عليه

**mohamedrabia** · 30-06-2010 12:46 PM

ليه هياخد السودان والمحور ما عنده شارع الهرم لاخرة ومن الرماية علي طول لحد مايخلص سور حدائق الاهرام يلف يمين معاه علي طول ولا يمين ولا شمال لحد ما يلاقي يافطة المدينة او يطلع الدائري من المنيب جانب سوق السمك ويطلع الوصلة الجديدة هتبقي جانب دريم بالك في اقل من ربع ساعة ومنها يمين علي طول