الموضوع: ازاى اشترى سيارة الشعب؟؟ 127 او 128 طبعا

المشاركة الأصلية كتبت بواسطة aymangalal510

السلام عليكم جميعا
معلش استحملونى شوية انا لسه جديد فى الـ car وعايز حد يدلنى بالراحه وبوضوح ويكسب فيا (صواب)
انا معايا اول عن اخر 14 الف ونويت (والنية لله) ابقى من اصحاب العربيات و وبما انى من الشعب ... رسى اختيارى على سيارة الشعب 127 او 128 لانهم فى حدود الميزانية
وترتيبى كالتالى: طبعا بالنسبة للسعر بس والباقى بقى على الله ثم على مشورتكم
اجيب حاجة فى حدود 10 او 12 واخلى 2 للتظبيط والذى منه .... لانى عرفت ان اى عربية قديمة اكيد هتحتاج تظبيط حتى لو متظبطة عشان تتباع
المطلوب بقى الاجابة على الاسئلة الاتيه (اجبارى): طبعا بهزر انا بطلب بأدب
هل الترتيبة دى كويسة ومعقولة ولا لأ؟؟
والمبلغ المقترح يجيب موديلات من كام لكام؟؟؟؟
والافضل ايه؟ 128 ولا 127؟؟ ملحوظة(الاستخدام عائلى مش شبابى)
وايه الفرق بينهم؟؟؟؟
الاهم من ده كله بقى وبصفة عامة وبخلاف الميكانيكى والسمكرى والحد الفاهم ازاى اقدر اعرف حالة العربية الحقيقة(ازاى اشترى واقدر الحالة يعنى من باب العلم بالشىء) اخد بالى من ايه ؟؟؟؟
(الايه ده اللى هى الحاجه اللى انا ماعرفهاش طبعا عشان كده برمز لها بـ إيه
والايه ده موجود فى انهى مكان فى العربية ؟؟؟ ولو الايه ده كان كذا يبقى ماشتريهاش ؟؟
انا عارف ان العربيات القديمة معظمها فى حالة يرثى لها لكن على قد اللى معايا
انا عارف انى هسمع مقترحات بأنى ازود المبلغ شوية واجيب حاجة احسن لكن للأسف نو امكانيات اكتر من كده

عشان كده ياريت بقى من اهل الخبرة مع النوعية دى من العربيات انهم يفيدونى بكل حاجة كل حاجة كل حاجة عشان ابتدى رحلة كفاح مع العربيات وانهى رحلة كفاح مع المواصلات
ويا سلااااااااااااااااااااااا ام لو فى معلومة بالصورة عشان الواد يبقى متخيل شكل الحاجه
وربنا مايوقعقوا فى سيارة الشعب

بص ياباشا انا هاقولك انا عملت ايه لانى برضه زيك لسه جديد فى الكار

اولا انا دورت على عربيه اكون عارفها يعنى حد من اصحابى او كده ولما فلست قولت انزل السوق بس حسيت انه هايتنصب عليا وربنا بعتلى عربيه معرفه بس من بعيد علشان كده اشتريتها على طول بسعر يعنى ممكن تقول غالى شويه انا جيبت 128 موديل 91 ب 18 الف

تانى حاجه انت عايز العربيه ليه ؟ تتعلم عليها السواقه وتبيعها والا هاتخليها معاك

لو هاتتعلم عليها بس يبقى فيه اقتراحين

الاول انك تجيب موديل فى التسعينات علشان ماتتعبكش وتتعلم عليها وتاخد فلوسك تانى لما تبيعها
التانى انك تجيب حاجه كده سبعينات بحاجه بسيطه كده وتقلبها على طول

اما لو كنت هاتخليها فاانصحك ماتجيبش غير 90 او 91 او 92 بس علشان ماتقرفكش كتير واو مش معاك يكمل اصبر لما تكمل وماتستخسرش فى حاجه لانه كله حسب حالته وسيبك من اللى يقولك اييييييييييه 128 ب 18 الف ليييييييييييييييييييييييي ييييييييييه


كل جنيه هاتدفعه هتاخد مزايا قصاده وهاتريحك فى السير

اما الاختيار فانصحك ب 128 لانها عائليه اكتر من 127

الحاجات الفنيه بقا انا ماليش فيها لانى لسه جديد انا قولتلك على قد ما اعرف

18000 جنيه على 128 موديل 91 كويس اوى يا ريت كانت قبلتنى من سنه كنت اشترتها علىطوووووووووول ربنا يباركلك فيها يا باكووووور بس مقلتليش بتحط بنزين كااااااااام(ههههههههه) بهزر معاك

شكرا على سرعة الرد والافادة يا bakkoor
لكن ايه الفرق بين حد معرفة او حد غريب؟؟
عندى واحد زميلى فى الشغل قال هيجيبلى مو90 على تقريب20 وفيه كلام وممكن ادفع اللى معايا والباقى بعدين
ماحنا موظفين بقى وبنتقابل اخر الشهر هههههههه
هوه لسه ماجابهاش وهالمفروض هيجيبها يوريهالى بكره ونشوف
ومعايا واحد تانى مر بتجربة الشراء دى بس هوه عنده هيونداى اكسل وهيبقى يشوفها معايا وعنده برضه فكره عن حالة تقدير العربية وقالى بس الاضمن ننزل على الحرفين نوريها لكام صنايعى يقدرها(انا شغلى فى العبور جنب السلام والنهضة يعنى العملية قريبة) فا ربنا يسهل ان شاء الله وهقولكم ع اللى هيتم
بس انا كان املى ان حد يدينى كام معلومة ااقدر اشوف بيها العربية واقدرها كويس ده غير التقدير المادى اللى تستاهله طبعا
وشكرا مرة تانية على ردك والنصايح الغالية

معلش نسيت ااقول
انى هشتريها استخدام عائلى ومشاوير توصيل على خفي مرة او اثنين فى الاسبوع
انا كل ماسمع سيرة زود شوية دى بتنرفز ماهو لو فيه اكتر من كده كنت هجيب احسن طبعا
وبالنسبة للماروتى مالقيتش ااقل من 25 موديل الفينات واخر تسعينات انا عارف انه حلوه قوى واقتصادية جدا للاستخدام العائلى بس عالية اوى عليا
وبعدين انا عامل حسابى على حاجه بـ 13 الف + 2 للتظبيط
لانى مش عايز احط الـ 15 كلهم بالتأكيد اة موديل هيحتاج تظبيط حتى ولو قليل

مش كده ولا إييييييييييه؟؟؟؟؟؟؟؟؟؟؟؟؟ ؟

عندى استفسار تانى
لو حبيت اجيب عربية ينفع لها تركيب تكييف اكيد هحتاج اسقط موتور بتكييفة صح كده؟؟؟
ايه الموتور ابو تكييف والنوع الانسب له فى كل حاله 127 و 128 وتكلفته كام تقريبا
يهمنى اوى موضوع التكييف ده يا جماعه خصوصا الايام اللى جايه
وماحدش يقولى اصبر وكمل وهات لان ااقل عربية مكيفة مش هتقل عن 30 الف
ياريت حدى يقولى

مشاركتك محتاجه نقاش تفصيلى يا mmffor