الموضوع: أنا وجين :خطوبة ودخلة..وكتب الكتاب بعد اسبوع!!!

أمس توكلت على الله و ذهبت لعز العرب في الصحراوي علشان أخطب منه جميلة الجميلات جين2(أحجز يعني) بعد قصة حب طــــــــــويـــــــــلــ ــــــــــــــــــــة من بعيد لبعيد.

قابلت أ.محسن وقلت له أنا من طرف العزيز أيمن وجاي أحجز جين أوتو –(بعد تردد طـــــــويـــــــــــــــ ـل بين المانيوال و الأوتو)- قاللي تحب تستلم إمتى؟؟ قلتله طبعاً أحب أستلم دلوقت لو ينفع!!! قاللي لون إيه؟؟ قلتله رمادي.. قاللي ياللا استلم!!!

إيه الحلاوة دي؟؟؟

قمت كلمت أيمن وقلتله أنا جاي أحجز وشكلي حخلص دلوقت!! قاللي طيب أنا جايلك!!! أصل حظي الحلو إنه كان بيعمل صيانة في نفس اليوم!!

طبعاً كانت مفاجأة جامدة وتوفيق من ربنا إن أيمن باشا بنفسه يجي يستلم لي الجين بتاعتي.. طبعاً شال عني هم الاستلام.

رحت دفعت المهر وفوقه 150 جنيه لزوم تخلص ورق مش فاهم إيه كده وقعدت أنتظر...

كان هناك جين رمادي واقفة زي العروسة أمام المبنى أول ما دخلت عيني وقعت عليها وشاورت لحماي (هو اللي كان معايا) عليها وقلتله هي دي –أصله مايعرفش شكلها أصلاً-

المهم... محسن قال لنا العربية بتتغسل وقعدت أستنى...أستنى...أستنى...أستنى. .

بعد انتظار طــويـــــل قاللي العربيه التانية طلع فيها خربوش صغير وحسلمك اللي واقفة بره دي !!!

طبعاً فرحت لأني طول مانا قاعد ببص عليها وقلوب طالعة من فوق راسي!!!

كان أيمن وصل بالسلامة وخرج يستلمهالي وخرجت معاه و كان معاه بروتوناوي ساجاوي زميل ربنا يكرمهم بصراحة عملوا الواجب وزيادة و فصصنا العربية وكان كل شيء تمــــام ما عدا شرخ صغير في الفانوس الخلفي أيمن قاللي أثبته في المحضر وخلاص..

رجعت لمحسن وقلتله كله تمام قام مكلم اللي حيسلمني العربية و قعد يقلب فيها قلتله نثبت الشرخ ده قاللي أنا حاجيبلك واحدة تانية خالص!!!

لييييه ؟؟؟ بعد ما فصصنا دي و أيمن كان راح يشوف عربيته!!!

كلمت أيمن قاللي أنا معاك لو عاوز تغيرها نستلم التانية!!! -بصراحة ماشفتش جدعنة وذوق كده-

وجاءت التانية نسخة من الأولى بس مش عارف ليه محبيتهاش و قعدو يمسحوها وأنا ببص عليها من غير نفس ففوجئت بنفس الشرخ بس في الفانوس الشمال فقلت للراجل خلاص أنا حاخد الأولانية إحنا حنقرف نفسنا ليه؟؟؟

قاللي اللي انت عاوزه بس حسيت إنه عاوز يديني التانية!!! –يمكن مجرد احساس؟!!-

وقف يا عم المسح وروح امسح الأولانية!!!

دخلنا من الشمس و قعدنا نتفرج على العروسة وهم بيجهزوها ومحسن نبه علي لا أعطي عامل فلوس في إيده لكن لو عاوز أسيب لهم حاجة أسيبها معاه وبتتوزع عليهم آخر الشهر...( بصراحة حركة شيك لأن الجو بتاع كل سنة وانت طيب يا بيه ده بيبقى جو بيئة و بيلـزّق غير مريح. ) سيبت لهم 50 جنيه وطلعنا نستلم العروسة..

بالعافية رض الموظف يثبت موضوع الشرخ –(مش عارف هو خسران إيه هو أنا يعني حاغيرة استخسار لو فضل زي ماهو صغير كده؟؟- ماستلمت المفاتيح و مضيت على الورقة ومع السلامة.. طيب يا اخوانا أنا مش حاخد أي ورقة؟؟؟ قالولي ماهي الورقة اللي معاك دي كفايا!!! -(ورقة استلام مافيهاش حتى ختم يعملها منظر)- وقاللي محسن الورق على الأسبوع الجاي إن شاء الله...

توكلت على الله و سميت وركبت حبيبتي الجديدة (وشغلت التكييف) – أخيراً !!! - وفولت في شل اللي جنب التوكيل وانطلقت الى مصر الجديدة.

طبعاً مشوار علقة في عز العصر و الزحمة وتهت شوية بعد المحور بس الحمد لله وصلت بالسلامة وكلمت أيمن تاني شكرته و أخذت غطا سيراتو بتاعت واحد صاحبي وغطيتها علشان البرد... أصلهم قالولي العربيات اللي من غير نمر خطر تتساب مكشوفة.

و الحمد لله.. تتوجت قصة الحب التي بدأت من سنين طويلة -كحب بلا أمل- بالبداية السعيدة.

أما عن انطباعاتي... فهي بصراحة مش كتير.. يمكن لأني كنت مصدع و هلكان على آخر اليوم؟؟

لكن طبعاً الأداء ممتاز مش محتاج كلام و التكييف عمل الواجب و الحمد لله الحرارة كانت ممتازة –كانت عيني عليها بعد مشكلة راؤل- و أبعاد السيارة كانت طبيعية رغم أن المرآة الداخلية كادرها أضيق نا اللي معتاد عليه لكن المرآة اليمين قامت بالواجب.

ولما كنت بآخد ملف ضيق خفت يكون قطر الملف للسيارة واسع لكن ما شاء الله طلع ممتاز..

وهي الآن نائمة في سلام بانتظار استلام الأوراق ونكتب الكتاب ونعلي الجواب وعقبال عندكم!!!

الف مبروك ربنا يديك خيرها و يكفيك شرها و يبعد عنك العين