عايز اروح دمياط من الزقازيق !!!

**SpiDerS** · 01-07-2010 04:38 PM

ياريت يا جماعة حد يوصفلي طريق يكون سهل و نضيف لدمياط من مدينة الزقازيق
بس الوصف يكون تفصيلي شوية الله يكرمكم
علشان معايا العائلة و المفروض اني اوديهم دمياط و هيبقى شكلي وحش لو توهنا
شكرا

**crazylambada** · 01-07-2010 04:41 PM

بص يا سيدي حضرتك حتسافر للمنصوره من القنايات عادي و قبل المنصوره عند الكمين لما تلاقي مزلقان على يمينك خش شمال و امشي شويه حتلاقي كوبري اطلعه و انزل منه حتفضل ماشي حتلاقي كوبري تاني يا تمشي جنبه يا تنزل من تحتيه حتمشي من جنيه يمين و تفضل ماشي علطول حتلاقي دخله دمياط و ربنا يوصلك بالسلامه

**nour2007** · 01-07-2010 04:45 PM

مفيش توهان ولا حاجه ان شاء الله
انت تاخد طريق المنصوره اللي اوله في الزقازيق عندكو طريق المنصوره
لغاية ماتوصل المنصوره هتمشي حوالي 50 كم وبعدين تدخل يمين من عند كمين مرور وشرطه بتاع اول المنصوره اسمها سندوب اول ما هتدخل يمين هتلاقي مزلقان سكه حديد وبعد كده المفروض تمشي علي طول لأن ده هو طريق دمياط بس الافضل تسأل
بس هو ده اللي فاكره عن الطريق ومفيش طريق غير ده بالنسبه لأنك طالع من الزقازيق واقرب مسافه
الطريق البديل انك تروح بورسعيد وقبل بورسعيد ب حوالي 3 كم تمسك طريق دمياط بس في الحاله دي هتمشي ضعف مسافة طريق المنصوره

وتروح وتيجي بالسلامه وماتقلقشي انك تمسك طريق جديد عليك اللي بيسأل مايتوهشي

**SpiDerS** · 01-07-2010 04:48 PM

شكرا جدا يا جماعة مش عارف اقولكم ايه والله :)

هو انا مش قلقان ولا حاجة بس انا لو لوحدي مش مهم
بس المشكلة اني مع العائلة فهي دي المشكلة :)

طيب ممكن اعرف الطريق ده طوله اد ايه ؟؟
يعني من الزقازيق لحد الكمين
ومن الكمين لحد دمياط ؟؟
وهل في يافطات في الطريق ولا هقف اسئل ولا ايه ؟؟
علشان التأكيد بس !!

**SpiDerS** · 01-07-2010 04:51 PM

وفي رادرات على الطريق ؟؟
و الطريق نضيف ولا لأ وزحمة ولا لأ ؟
معلش يا جماعة بتقل عليكم :)

**m7nsh** · 01-07-2010 05:00 PM

زى ما الرجاله قالت بالظبط
(زقازيق - ديرب - السنبلاوين - المنصوره - دمياط )
بالنسبه للمسافات
من الزقازيق للمنصوره حوالى 55 كيلو
من المنصوره لدمياط حوالى 65 كيلو
وصله المنصوره دمياط مزدوجه و كويسه
انما الوصله من الزقازيق لديرب و من بعدها السنبلاوين فهى سيئه الى حد ما .. هو الطريق مفرد بس واسع شويه
و بتتحسن من السنبلاوين للمنصوره
بس الطريق واضح و مفيش فيه توهان بالذات من المنصوره هتلاقى يفط كتير

**mazagngi2010** · 01-07-2010 05:01 PM

المشاركة الأصلية كتبت بواسطة crazylambada

بص يا سيدي حضرتك حتسافر للمنصوره من القنايات عادي و قبل المنصوره عند الكمين لما تلاقي مزلقان على يمينك خش شمال و امشي شويه حتلاقي كوبري اطلعه و انزل منه حتفضل ماشي حتلاقي كوبري تاني يا تمشي جنبه يا تنزل من تحتيه حتمشي من جنيه يمين و تفضل ماشي علطول حتلاقي دخله دمياط و ربنا يوصلك بالسلامه

انا من القنايات اسم بلدى طلع على نايل موتورز