الموضوع: كيفية تنظيف السيارة من الخارج

حضرتك هاتجيب فوط ناعمة (يفضل اسفنج ) و لو عندك خرطوم يبقى قوة اندفاع المية تكون متوسطة اقرب الى ضعيفة عشان تحافظ على الدهان و طبعا السائل المنظف اللى هاتغسل بيه ( انا عن نفسى بستخدم بتاع غسيل المواعين بحط منه شوية على جردل مية و اقلبه كويس لحد ما يعمل الرغوة )
الخطوات بقى
1 حضرتك هاتمسح العربية كلها بالفوطة (ناشفة و ناعمة ) عشان تشيل بيها التراب على قد ما تقدر و بعد كده بترش مية بس على العربية عشان تشيل بيها اكبر قدر ممكن من التراب او الطين قبل الغسيل بالصابون
2 هاتسخدم فوطة تانية للصابون و هاتمسح العربية من السقف الاول و انتا نازل ( يفضل السرعة فى الخطوة دى عشان الصابون لو فضل كتير على العربية بيضر الدهان على المدى البعيد )
3 بعد ما تنضف العربية كلها بالصابون و تتأكد انك نضفت كل البقع كويس بتجيب فوطة تانية نضيفة و بالخرطوم بتبدأ من السقف برده و انتا نازل بتشيل اى اثر للصابون من على العربية و بالذات من على اى كاوتش فى العربية ( ازاز -ابواب -اى حاجة فيها كاوتش )
4 بعد ما تنضف العربية من الصابون كويس ترش عليها مية تانى كنوع من التأكيد ( متنساش المية لازم تكون ضعيفة ولو مش متوفر يبقى ترش المية على العربية بزاوية مش عمودى )
5 و دى اخر مرحلة و هيا مرحلة التجفيف هاتحتاج فوطة او اتنين ذات قدرة عالية على امتصاص المية هاتمسح بيهم العربية و تعصرهم كذا مرة لحد ما تنشف العربية كلها ( خلى فيه فوطة مخصوص للزجاج )

....* ملحوظة هامة ....* حاول متركنش العربية فى الشمس بعد الغسيل ( او حتى فى الاوقات التانية ) و طبعا متركنش فى مكان فى تراب كتبر و الا مش هاتستمتع بعد المجهود ده

هاغسل السيارة بنفسى للتنظيف اليومى

المشاركة الأصلية كتبت بواسطة emad_banda

هاغسل السيارة بنفسى للتنظيف اليومى:ta_clap[1]:

حضرتك الطريقة اللى سبق و قلتها دى يكفى انك تعملها مرة كل اسبوع و بالنسبة للتنظيف اليومى حضرتك ممكن تكتفى بفوطة ناعمة تمسح بيها التراب صباح كل يوم عشان ما يتراكمش على العربية

المشاركة الأصلية كتبت بواسطة se_coralsea

- أنا بأغسل العربية كل 6 شهور في المحطة (العناية الفائقة) و بأضع طبقة من الشمع لحماية الدهان من الشمس و الاتربة و في نفس الوقت بيتم غسيل الموتور بالفوم (بدون مياه) مع الهواء

- خلال مدة ال 6 شهور العربية بتتمسح مرتين في اليوم بفوطة ناعمة مبللة لأزالة أي اتربة او أوساخ من الطريق لأن العربية لونها غامق

ممكن حضرتك توضح اية هيا العناية الفائقة دى ؟! و ياريت لو تقولنا تكلفة الشمع قد اية و بيعيش قد اية و هل بيحمى من الخرابيش الخفيفة و الحاجات دى ؟
شكرا مقدما