انا والاضراب والعجلة

**wael3m** · 10-07-2010 05:48 PM

السلام عليكم جميعا

امبارح خير اللهم اجعله خير كان فى اضراب فى وسائل النقل العام بدولة ايطاليا الشقيقة
الاضراب دا اسمة اضراب 24 ساعة ( واحد بيقول يانهار اسود .. يعنى مفيش اتوبيسات ولا قطارات شغالة ) اة
أرد وأقوله لاء بس هو يالظبط الاضراب دا بيتدى من 8.30 الصبح الى 5 العصر يعنى قبل كدا فى مواصلات
ويرجعوا يشغلوا الخدمة من 5.30 العصر الى 8 باليلل بعد كدا مفيش مواصلات

واحد فيكم سامعه بيقول هو كدا اضراب دول مدلعين الناس خالص
أقوله ايوه ياسيدى اضراب لان فى ناس بنتزل شغلها الساعة 2 الضهر مثلا او احيانا اللى عنده عربية
بيستخدمها وهنا بقى تكره نفسك بجد انك عندك عربية الواحد بيحس انه فى القاهرة

المهم اخدت عجلة من واحد جارى فى الشغل علشان اروح بيها واكتشفت المفاجاة
انى وصلت بالعجلة فى نص ساعة من باب الشغل الى باب البيت المسافة حوالى 7 كيلو انا بالمترو بخدها فى
حوالى 45 دقيقة .... تشتمل الوصول الي اقرب محطه مترو والمشي من المترو اللي الشغل
وانا سايق العجلة حسيت انى رجعت طفل من تانى وافتكرت اول عجلة جاتلى هدية
من ابويا وانا عندى 9 سنين بجد احساس جميل منها رياضة وتوفير للبنزين وكمان فى الزحمة بتفوت بسرعة الريح

علشان كدا قررت انى اشترى عجلة انا والعضو Brown eyes
كنت افتكرت الدكتور احمد العلاوى لما كان عايز يجيب حصان وينطلق بيه فى غابات الزقايق ويحرر
جمهورية نايل موتورز العربية من ايد الدولة بس الفكرة مكلفة اوى انى اجيب حصان دا غير انه عاوز مكان

تانى حاجة مش عارف اذا كانت فكرة العجلة دى تنفع فى القاهرة ولا لاء ... نظرا لرعونة بعض سائقى
المكيروباص والتوك توك والاتوبيسات والملاكى بس اكيد تنفع فى اى حتة غير القاهرة واسكندرية نظرا للاسباب
السالف ذكرها

ياجماعة كل قصدى من الموضوع انه لو تقدر تجيب عجلة وتروح بيها مشاويرك الداخلية ( رايح تصلى - السوبر ماركت ) الخ الخ كدا منها رياضة وكمان توفر فى حق البنزين اللى كل شوية عمالين يخوفوا الناس بالزيادة
كأن البنزين دا امنا الغولة ..... لو اتعمل فى كل مدينة فى مصر حارة للعجل اظن المشروع ممكن ينجح

مراسلكم من رومــــــــــــــــــــــ ـــــــــــــــــــــــــ ــــــــــــــــــــــا
وائل المنشاوى حصرى لنايل موتورز

**mohamed_selim** · 10-07-2010 06:08 PM

وائل حبيبى ازيك :)
تصدق الموضوع ده فى دماغى بقاله فتره و متردد
انا ساكن عند النادى الاهلى مدينة نصر و شغلى على بعد 6-7 كم (على عداد العربيه) فى مصر الجديده و عايز اجيب عجله بس متردد لسببين:
1- عادة الواحد بيكون عنده مشاوير بعد الشغل فكده العجله هتستخدم يوم او اتنين فى الاسبوع بالكتير
2- الشوارع ... مشكلتى فى تعدية شارع الثوره ... مسخره و خصوصا لو الدنيا فاضيه شويه كله بيجرى و لو زحمه هتعدى بس مش هتعرف تمشى ... نفسى الاقى حد عنده عجله جنبى اجرب بيها كام يوم و اشوف الدنيا هتمشى ازاى قبل ما اقرر اجيب واحده :)

تشحنلى عجلتك الجديده اجرب بيها اسبوع يا كابتن؟ :)))

**Car's Sniper** · 10-07-2010 06:26 PM

فكرة حلوة جدا

**FunnyMickey** · 10-07-2010 06:30 PM

معرفش فيه حد يعرف الجروب بتاع العجل اللي علي الفيس بوك
بس حبيت احطهولكو

Anmelden | Facebook

وده كمان

Anmelden | Facebook

ده عباره عن شباب بيتجمعوا كل يوم جمعه الساعه 7 الصبح
في اماكن مختلفه

وبيلفوا بالعجل لحد الساعه 12
اللي يحب يشاركهم

وانا عن نفسي حشتري عجله قريب وابطل انزل بالعربيه خالص
عشان عاوز اخس
ويبقي جسمي رياضي

بس خد بقي تريقه من الناس اللي في الشارع
انتا اجنبي ياباشا
welcome to cairo
وحاجات من دي

**A7MED_PHARMA** · 10-07-2010 07:14 PM

ماهو مرض الحج ...لخمني عن أي حاجة ..وعن فكرة الحصان ده بالذات

وأنا نفسي ...ومنى عيني ....نفسي أروح الصيدلية بالعجلة لعدة أسباب
1.الطريق المتبهدل إلي زي الزفت ..كل يوم عفشجية عفشجية
2.توفير النفقات ..وكل يوم أغسل العربية من التراب
3.أحاول أشيل بعض الدهون الخفيفة من على جسمي
4.رياضة ممتازة
5.لياقة بدنية وصحة

بس للأسف
لو على أني أروح الصيدلية بالعجلة ....سهلة
لكن الرجوع ..صعب
الطريق زراعي مقطوع تقريبا
يعني مستحيل أركب العجلة على طريق زراعي بالليل بعد الساعة 3 أو 4 صباحا
والحاجة التانية..الناس هتقول ده بيدعي الفقر ههههههههههههههههههههههههه ههههه

**wael3m** · 10-07-2010 08:00 PM

المشاركة الأصلية كتبت بواسطة a7med_pharma

ماهو مرض الحج ...لخمني عن أي حاجة ..وعن فكرة الحصان ده بالذات

وأنا نفسي ...ومنى عيني ....نفسي أروح الصيدلية بالعجلة لعدة أسباب
1.الطريق المتبهدل إلي زي الزفت ..كل يوم عفشجية عفشجية
2.توفير النفقات ..وكل يوم أغسل العربية من التراب
3.أحاول أشيل بعض الدهون الخفيفة من على جسمي
4.رياضة ممتازة
5.لياقة بدنية وصحة

بس للأسف
لو على أني أروح الصيدلية بالعجلة ....سهلة
لكن الرجوع ..صعب
الطريق زراعي مقطوع تقريبا
يعني مستحيل أركب العجلة على طريق زراعي بالليل بعد الساعة 3 أو 4 صباحا
والحاجة التانية..الناس هتقول ده بيدعي الفقر ههههههههههههههههههههههههه ههههه

ألف سلامه للحاج وبرضه متسمعش كلام الناس
لأن الناس برضه ممكن تقول إن معاك فلوس تجيب مرسيدس وراكب لانسر

وبعدين روح مشاويرك بالعجلة وسيب العربية

المشاركة الأصلية كتبت بواسطة w-m-a

حاولت اعملها فى رمضان بس
واشتريت حته حلوة مستعمله بمساعدين علشان ظهرى
وعينك متشوف الا النور
تريقه وتهريج ولفه ياكابتن
واقفل الباب واطفى النور
ادى اشارة
عقدونى وبعتها بعد رمضان علطول
ونفسى اكرر التجربه بس المشكله فى السن

نفس الكلام متسمعش كلام الناس واللهِ الناس هنا بتركب عجل لحد 60 سنة

**mohamed_selim** · 10-07-2010 08:21 PM

المشاركة الأصلية كتبت بواسطة w-m-a

حاولت اعملها فى رمضان بس
واشتريت حته حلوة مستعمله بمساعدين علشان ظهرى
وعينك متشوف الا النور
تريقه وتهريج ولفه ياكابتن
واقفل الباب واطفى النور
ادى اشارة
عقدونى وبعتها بعد رمضان علطول
ونفسى اكرر التجربه بس المشكله فى السن

جبتها منين و بكام و بعت على كام و ايه موضوع المساعدين ده ؟؟؟

**abdo_general** · 10-07-2010 08:34 PM

اولا وحشتنا يا استاذ وائل

ثانيا بقي في قاهرة المعز

ولو حد شاف واحد روسي او اجنبي عامة راكب عجلة تلاقي شعب مصر بيقول شوف الشعوب المتقدمة ورياضية
والخ الخ من مدح في راكب الدراجة

ولو شافو مصري يقولو فاكر نفسه صغير
واحترم سنك
والخ الخ الخ برضه من سخرية لراكب الدراجة

بس انا فعلا لولا اني سايبها في اسكندرية كنت بنزل اركبها ومش بيهمني

بس شغالة برضه في اسكندرية اعمل بيها مشاوير ورياضة جميلة جدا