الموضوع: أنا ودعت صيانة أماترا

السلام عليكم

بعد ما خدت قرار انى مارحش توكيل أماترا تانى بعد صيانة ال20,000 و المهزلة اللى حصلت (دفعت 950 جنيه و استنين 5 ساعات و كمان كان فى مشاكل فى العربية و ولا حاجة منها اتصلحت و كمان لما استلمتها لقيتها محكوكة خط من الجنب)

بدأت أروح لميكانيكى جنب البيت فى طنطا خصوصا بعد ما عملت حادثة و قولتله على مشاكل فى العربية حل بعضها و الباقى لأ

فى ميكانيكى اسمه صابر فى امبابة بيشكروا فيه, مارحتلوش علشان لما بنزل القاهرة بقعد فى مدينة نصر و عمرى مارحت امبابة

فى واحد صاحبى خبرة جدا ما شاء الله فى كل أمور العربيات من زمان جدا, الغريب انى عمرى ما سألته مين الميكانيكى اللى بيروحله, سألته و قالى عليه (اسمه سمير فى طنطا فى شارع متفرع من محمد فريد) و وصاه عليا و كدة

النهاردة رحتله و قلتله على المشاكل اللى فى العربية و بسببها روحت التوكيل أكتر من مرة و أغلبها ما اتعملش

1- نور الهاند بريك كان منور على طول: ظبطه و كمان خلى الهاند ترجع ناشفة زى الأول
2- بصلى بالمرة على التيل علشان بيصفر و الدركسيون بيرعش مع الفرمل على سرعة: نظف التيل على الصاروخ و قالى لسة فيه كتير , قالى الطنبورة محتاجة تتخرط حاجة بسيطة
3-لقى كرترة الزيت بترشح زيت كتير جدا (الميكانيكى القديم قالى عادى) : فقالى ان الكارتيرة واخدة خبطة و فيها خرم صغير قوى , هايفكها و يصلحها و يعملها جوان مخصوص حتى لو مش موجود
4-مشكلة الدبرياج الأزلية (بينزل لتحت كل ربع ساعة سواقة): لقى زيت الباكم ناقص خالص فزوده و قالى محتاجة "خزنة علوية" جديدة أو "عدة اصلاح" , علشان مايكلفنيش تمن ماستر دبرياج كامل على الفاضى
5-قالى قاعدة الفتيس محتاجة تتغير
6- فى صوت خبط فى الناحية اليمين مع المطبات , رغم انها حاجة مش تبعه بس بص و لقى المساعد بدأ يرشح زيت و قالى ممكن يتصلح (روحت لعفشجى قبل كدة ماعرفش المشكله من اية و قالى العربية زى الفل)
7- الزمارة صوتها بيتغير مع الضغط المتواصل , بس نسيت أقوله عليها !

يعنى راجل أمين و شاطر جدا و فى الأخر خد 30 جنيه بس!

8- فاضل أظبط التكيف فى مركز متخصص بدل عك التوكيل

هاروح الكيلانى ان شاء الله أجيب من عنده قطع الغيار دى علشان مالقيتهاش فى طنطا


خلاصة الموضوع الطويل دة
1- العربية فيها مشاكل بسيطة من زمان, بس خلتنى أكره العربية
2- روحت التوكيل كذا مرة (طبعا لازم أحجز قبلها بمدة طويلة) و بضرب مشوار الصبح بدرى من طنطا للقاهرة و برجع بأغلب المشاكل زى ماهى , و بسمع كلام من عينة
"العربية كويسة ,
دة الطبيعى ,
لو مصمم ممكن نغيرلك القطعة الفلانية ب1000 جنيه أصلها مش تبع الضمان"

3- لو لاقيت ميكانيكى شاطر و أمين (عن تجربة ناس معرفة) هايبقى أحسن من التوكيل 100 مرة لأنك مش هاتضيع وقتك على الفاضى, مش هاتغير قطع غيار على الفاضى و المليان , و الميكانيكى مهتم انك تبقى مبسوط من شغله علشان ترجعله تانى بعدين و تعمله سمعة كويسة, بعكس الصنايعى اللى فى التوكيل مش فارق معاه غير انه يشتغل بالراحة علشان يأخد ساعات مصنعية أكتر

4- عموما رأيى تعمل زى يوكو :أعمل الصيانة فى التوكيل فى أول 3 سنين بس علشان ماتخسرش الضمان (ما استفدش بيه خالص) و بعد كدة اكسر قلة على أماترا
5- ربنا معاك بأة فى قطع الغيار , ممكن ماتلاقيش و ممكن تلاقى بس بأضعاف السعر الطبيعى
و اسألوا "دكتور حلاوة" اللى راح كذا مرة علشان مشكلة فى الRPM و ماتحلتش, و الصالون كله بيزيق فى المطبات
أو cryptonX اللى مش لاقى ماستر دبرياج للباليو بقاله شهر , و احتاج يغير دنجل خلفى ب5000 تقريبا فى التوكيل

6- اسأل فى المنتدى دة علشان فى حاجات كتير عرفتها هنا علشان الناس هنا بتساعد بعض باللى عارفينه


شكرا

المشاركة الأصلية كتبت بواسطة ayman2

ياريت مسئولى أوماترا اللى معنا هنا فى المنتدى يقرأوا الكلام ده ويردوا عليه ويقولوا لنا ما هو التطوير المنشود ....ويقولوا لنا ماذا فعلوا لحل المشاكل دى

...........ولا حاجه