ازاي بوجيهات بلاتنيوم تقعد 13 الف كيلو بس

**Karim_Monir** · 20-07-2010 12:02 AM

السلام عليكم يا اهل الورشة
لما اشتريت العربية كرولا 1300 مانيوال 2007 وجبت الفلتر الاسبور k&n كيت كامل
جبت معاه بوجيهات بلاتنيوم اللي المفروض تقعد 100 الف كم بتاعت ليكزس
وكان تمنها وقتها 290 جنيه وكانت ممتازة
قعدت حوالي 55 الف كم وكتبت تجربتي معاها
ولما جيت اغيرها مالقتش زيها تاني
جبت البلاتنيوم بتاعت ngk اصلية ب 120 جنية وده احسن سعر لانها بتتباع ب 150 جنية
بقالي فترةملاحظ ان سحب العربية مش حلو
واستهلاك البنزين زاد
متوسط في الطوالي بالتكييف والحمولة كنت بعمل من 500 الى 550 كم في الصفيحتين عشان 1300 مانيوال
مابقتش تعمل 400 او 420 بالكتير
فرق كبير طبعا
روحت فكيت البوجيهات عند الميكانيكي بتاعي لقيت البوجيهات (منفسة) زي ما قال ومحروقة تماما
طب ازاي بعد 13 الف كم
دي لو بوجيهات عادية تقعد اكتر من كدة بكتير
تاريخ التركيب 1 ديسمبر 2009
تاريخ التغيير 17-7-2010
هل ده وقت كبير في عمر البوجيهات ان يعدي عليها شتاء وصيف
افيدوني
تحياتي
كريم منير

**SAMEH_FOUAD** · 20-07-2010 12:19 AM

منور ياباشا يارب تكون بخير
البوجيهات لما بتكون محروقة او مهببة اسود بمعنى اصح , يبقى كدة حضرتك عندك حاجة غلط فى حريق البنزين يعنى ممكن تكون الرشاشات عايزة تتنظف او فية رشاش بيسيل لان غالبا كدة استهلاك البنزين عندك زاد اوى عن المعدل الطبيعى

**samirayad** · 20-07-2010 08:47 PM

أهم شىء مع تغيير البوجيهات عامة هو أن يكون

1- مواصفات البوجيهات الفنيه مطابقه تماما للمقنن لطراز سيارتك

2- مقاس الجاب أو الثغره بتاع البوجيه يكون مظبوط فعلا على القيمه اللى محددها مصمم محرك السياره

غير كده ومع وجود أى حيود عن النقطتين 1 & 2

لابد يظهر خلل فى دورة الأشعال وبالتالى خلل فى أستهلاك البنزين

ومش مهم بأه

تكون البوجيهات بلاتينيوم أو عاديه

فلو عندك يا أبو عبده

نوع بوجيهاتك الأصليه ونوع البوجيهات الحاليه

حنقدر نقارن فعلا بين تطابق النوعين

**samirayad** · 20-07-2010 09:04 PM

لكن كانت مشكلة نوعية رديئة واتصور ان الغش في مثل هذه الانواع بدء يظهر

أكيد حضرتك

عمليات الغش فى التصنيع أو سوء التخزين

حتدى نتيجه سلبيه

مثلها مثل أى شىء غير طبيعى

من المذكورين فى النقطتين 1 &2

**SkyBird** · 21-07-2010 08:11 AM

طالما هببت يبقى البوجيه عندك من النوع البارد و تزيد المشكلة بالسواقة الهادية وعدم الجري الجامد او الحرق على الغيارات كل فترة لتنظيف البوجيه
يا ريت تكتب الكود اللي عليها
واهم حاجه الرقم لو اكثر من 6 يبقى بارده جدا وهتهبب تاني النوع ده يبقى عايز عربيات سرعة وشد كثير
البلاتينوم المفروض تقعد تقريبا عمر المحرك مش بس 100 الف
وعلى فكرة ممكن تتنظف وتركبها تاني

**Karim_Monir** · 21-07-2010 11:27 AM

للاسف رميتهم بس الميكاني وده مهندس فاهم كويس جدا قالي فعلا هما نفس مقاس عربيتك وزي الاصلي تمام
وهما مشض طالعين مهببين
لاء محروقين وطبعا في فرق بين الاتنين
ومنفسة من الجزء الابيض اللي هو النص السفلي طالع عليها حاجة زي صدى