الموضوع: تجربتى مع مركز السبع

بعد شراء عربيه صنى 2010 والسؤال عن افضل مكان للصيانه الكل اجمع على السبع اللى فى المعادى وعلشان كده قررت انى اروح الصيانه بتاعت الالف عندهم وياريتنى ما روحت !

العيوب اللى كانت فى العربيه كالتالى :

1- تاخر فى الدوران الصبح بصوره ملحوظه
2- صوت ونه فى التكييف تظهر عند السير على الاول التانى
3- النور عالى جدا يحتاج الى ضبط
4- ضبط الدبرياش لانه كان عالى وممكن ياكل الاسطوانه
5- تربيط العفشه وربط صاملوله علبه الدركسيون


المهم نبدأ الحكايه حجزت يوم الثلاثاء 6 يوليو الساعه الواحده والنصف

ووصلت عندهم الساعه الوحده واربعين دقيقه نظرا لعدم معرفتى بالمكان المهم لما دخلت لقيت مهندسين قاعدين فى الاستقبال
وسالونى حجز ولا جاى عادى قلت لهم حجز فوجهونى للمهندس رؤى اللتى قامت بدورها باخد بياناتى وكتالوج الصيانه والرخصه وسمعت منى كل الشكاوى وكتبتها فى الورقه اللى العربيه حتدخل بيها الصيانه
وقالت لى استريح فوق والعربيه حتخلص الساعه 4 ونصف

المهم طلعت بره تستلم منى العربيه واول ملاحظه لى عليها هى عدم التركيز عندما اوقعت المفاتيح على الارض واخدت فراءه عداد الكم وقالت لى ارتاح فوق

سبتها وطلعت فوق لقيت زحمه قعت شويه وبعدين قلت انزل اشرب سيجاره بره كان عدى حوالى ساعه

تزلت لقيت العربيه لسه فى مكانها وكل العربيات اللى جت بعدى دخلت فهمت ان المهندسه رؤى مش بتاعت شغل اصلا
قرحت للمهندسه وقلت لها قالت لى ببرود ما تقلقش كل شىء حيبقى تمام

المهم خرجت وقعدت بره حوالى نصف ساعه ودخلت تانى قابلت مهندس اسمه احمد شكله بيفهم ونشيط المهم حكيت له عن القصه والعيوب اللى عندى قال لى لا كده ممكن تاخد وقت طويل ولا زم ندخل العربيه
وقالم راح خد العربيه ودخلها بنفسه مشكور

( مع ملاحظه ان اى حد عايز يسرق عربيه تيسان ممكن يروح مركز السبع ويثقف لغايه ما المهندسه رؤى تستلم اى عربيه وتسيب المفاتيح فيها بالساعتين والعربيه واقفه بره والمفتاح جوها بدون حراسه ولا يحزنون )

المهم المهندس احمد مشكور سمع منى تانى العيوب بسرعه كده وهو اللى دخل العربيه وفهم المهندس محمود على اللى فبيها

ولما العربيه دخلت قعدت كتير جدا وكل شويه بقيت انزل ابص الاقيهم عاملين ايه بقى
العربيه راكبها ولد بيشتغل جوه وخارج يجربها ويخرج بره فى الحته المكسره يقعد بالربع ساعه ويرجع تانى يدخل يصلح ويخرج يجرب 3 او 4 مرات

وف النهايه الساعه 5 لقيت العربيه ركنت بره عند مكان التسليم فهمت انهم خلصوها
توجهت للدخل علشان ادفع وامشى والاقى المهندسه مش موجوده المهم ندهوا لها وجت رحت ادفع وقلت لها انا عايز استلم العربيه قالت احنا كده حنمشى ممكن تجربها انت

خرجت اجربها وصعقت
لما لقيت لسه موضوع الدواره لم يتصلح بالرغم من انهم قاموا بتغيير البوجيهات تبع الضمان اعقدادا منهم انها السبب فى مشكله تاخر الدواره

ولما ركبت العربيه لقيت الاتى

1- مشكله الدواره زى ما هى لم تتحل
2- صوت ونه التكييف زى ما هى لم تتحل
3-النو ما عرفتش اشوف هو اضبط ولا لا -- بالليل لقيتهم وطوه سنه بسيط بس لسه عالى جدا وبيضايق الناس اللى ماشيه
4-تم ضبط الدبرياش كويس
5- تم تربيط العفشه كويس

6- تم رجلاش لفرامل اليد واصبحت دواسه الفرامل ناشفه زياده عن اللزوم

المهم طبعا انا اتنزفزت وكلمت المهندس احمد راح ناده لى المهندس محمود بتاع الورشه وركب معايا وجربنا العربيه وقلت له على صوت التكييف وسمعته له قالى لى عادى

المهم عرفت انهم مش شاطرين فى شغلهم وحسيت انهم بيعكوا

خدت بعضى ومشيت وانا متضايق من هذا المستوى الردىء لخدمه العملاء من التشغيل مهندسين ليس لهم اى خبره مثل المهندسه رؤى ومحاوله اقناع العميل ان العربيه هى كده مش المهندس محمود

المهم قلت عوضى على الله

وانا راجع شغلت التكييف وكانت الصاعقه تالعربيه بقت مش بتسحب مع تشغيل التكييف رغم انى وانا رايح كنت مشغل التكييف وكانت طلقه

ساعتها عرفت من هو مركز السبع لتدمير سيارات نيسان مصر

عملت شكوى عند نيسان قاموا بتحويله اللسبع اللى بعت لى رساله على الموبيل لو عندى شكوى اروح اصلح

المهم لما حسيت انهم ناس اى كلام سواء تييسان او السبع ركبت العربيه زى ما هى بدل ما اروح اعمل تصليح اخرج الاقى العربيه مفوته ولا ما بتنقلش ولا فيها مصيبه تانيه

حسبى الله ونعم الوكيل فى الناس اللى مش بتراعى ضميرها فى شغلها وجهله بالمنظر ده

ولما ده احسن مركز صيانه امال الباقيين ايه ؟؟

انا اوجه من هنا رساله لنيسان مصر ان تراعى عملائها باحترام وتفتح مركز صيانه كبير ومحترم تحت اشرافها المباشر حتى لا تخسر جزا ليس بالهين من العلماء نتيجه لسؤ مستوى مراكز الصيانه

على فكره انا مش حياس من اخد حقى منهم حتى لو بحمايه المستهلك -- بس لما افوق لهم لانى عندى مشروع مشغول فيه شويه

واخيرا العيب فينا احنا المصريين مش فى نيسان !!

بعد كل احترامي و تقديري لأعضاء قسم نيسان نايل موتورز و توكيل السبع المحترم

.... طبعا احب اجيب الموضوع من الاول و هو طبعا كل واحد بيكدح و يتعب و بيصحي كل يوم الصبح من الفجر عشان يروح شغله في الحر و التراب و ملل الطريق .. في النهاية بروح و ادفع من مجهودي في شغلي عشان اشتري عربية تريحني و كلنا متفقين علي كده
حضرتك لما تروح تدفع 90000 او 100000 جنيه عشان تشتري عربية تريحك دي حاجه طبعا ممكن تفكر فيها شهور كتيره عشان تاخد قرار في شراء العربية و من الحكمة انك لما تشتري العربية يبقي لازم لازم تدور علي خدمة ما بعد البيع
طيب حضرتك دلوقتي اشتريت عربية نيسان بالمبلغ ده ايا ً كان و لاقيت بعد شراؤها بكام كيلو مشاكل الدنيا و اخرها .. طيعا من الطبيعي انك هتجري علي التوكيل لما يكون عندك من الاول حكمة خدمة ما بعد البيع يبقي من الطبيعي انك متقلقش خالص لأن حضرتك لما بتشتري منتج ممكن يكون فيه عيب تصنيع و طبعا عملت اللي عليك و رحت التوكيل و انت مش راضي عن حل المشاكل و بعدين حضرتك مشيت و اتصلوا بيك عشان تروحلهم .. هل حضرتك عملت كده طبعا لأ . يبقي لغاية دلوقتي التوكيل غير مقصر في حاجه لغاية دلوقتي و كلنا بنشتغل و ممكن بغلطة نبوظ شغل بالافات انما ده توكيل و الغلطة هو اللي بيشلها .
حضرتك توكيلات نيسان عامة في مصر مش السبع بس فاتحين طول الوقت لخدمة سيارات النيسان في اي حاجه تحصل للعربية و الطبيعي لما في ناس كتير يشكروا في توكيل السبع يبقي ده معناه ان التوكيل فعلا حقق المراد منه . يبقي لازم حضرتك تكمل لغاية الاخر مع التوكيل عشان تاخد خدمة كاملة
و لن انسي و لازم اذكر هذا ما فعله توكيل السبع امام عيني و امام اعضاء كثيرين
كانت تجربتي بوجود مشكلة بضفيرة الكهربا و تم تغيرها فورا
تجربة اخري لي و هو لما جيت اعمل صيانة 5000 كيلو كنت بشتكي من دببة اماميه فتم رجلشة علبة الدريكسيون فبعد ما استلمت العربية لاقيت الباور تقيل . فأخدوا العربية تاني جوه و رفعوها علي الكوريك و بعدين طلعت بره و برده لاقيته تقيل سنة تانيه .. قامت دخلت تاني و بعد كده في الاخر العربية اتظبطت
تجربة لأحد الاعضاء هنا انه بعد استلام العربية و دفع فلوسها و مشي بيها لسه مكملش 2 كيلو راح السبع و كان العيب في الطنابير و اتغيرت امام عيني بدون ادني مشكلة
تجربة اخري بس المره ديه في توكيل تاني و ان برده واحد صاحبي المساعد جاب زيت قام التوكيل مغيره فورا
الخلاصة
التوكيل لم يقصر في حق اي عميل مالك لعربية نيسان و برده احب انوه ان في المنتدي هنا و بكل امانه بيقولوا تصريحاتهم عن تجربة حقيقية و مفيش اي انحياز لتوكيل معين لكن التجارب اثبتت هنا مدي التزام السبع مع عملاؤه و المشاكل التي تحدث هي مشاكل فردية و تحل فورا اذا التزم العميل مع التوكيل
أرجوا ان المعلومة تكون وصلت
و انا بشكر السبع اوتوسيرفيس علي مشاركتهم معنا هنا في المنتدي
بيشوي