الموضوع: التمبرا وراس سدر مغامرة عجيبه بس ربنا ستر

يوم الجمعه عقدت العزم اني اخد ولادي واطلع على راس سدر اقضي يوم وابيت واجي تاني يوم توكلت على الله وتحركت من البيت حوالي الساعه 11 الصبح مسكت الطريق كله تمام ومشغل التكييف زي الفل قبل السويس يحوالي 100 كيلو الحراره ارتفعت ركنت على جنب ونزلت ابص على العربيه لقيت كوعة المية الألمونيوم مخرومه وبتطلع نافورة ميه سبحان الله اتخرمت ازاي ما اعرفش قعدت افكر ودورت على العجينة اللي بتلزق ما قيتش منها معايا المهم كان معايا اللزق اللي هو الانبوبتين اللي بيتخلطوا على بعض سديت خرم بخلة اسنان وحطيت عليها الماجه دي الميه منعت شويه بس لسه بتنقط بس تمشيني لقيت على بعد نص كيلو تقريبا ورايا زي استراحه كده وعربيات نقل رجعت بضهري على الطريق لحد هناك وقعد نص ساعه لحد ما لقيت حد عبرني كلهم بتوع نقل واللي يقولي معايا شغل واللي يقولي ما اعرفش المهم رحت للراجل بتاع اللحام قالي دي المونيوم وما تنفعش لحام كهربا قلتله الحل قالي اطلع على السويس المنطقة الصناعية اقربلك من رجوع القاهرة المهم طلعت على السويس صليت الجمعه وطلعت على المنطقة الصناعية المحلات كلها قافلة اجازتهم الجمعه يا حلاوة مشيت شويه لقيت واحد بتاع رادياتيرات قلتله قالي صعب ولازم تتغير قلتله اتصرف والحمها تمشيني المهم الواد لحمها وبعد كده حط عليها لزق الأنبوبتين عشان يمنع التنفيس دورنا بنتقط ميه من الجوان واضح ان السخونه بوظته قلت مش مشكله نقط بسيطه مش هاتأثر
خلاص العربية مشيت قلت ما ابوظش اليوم اطلع على راس سدر رحت قضيت اليوم وتمام
تاني يوم تحركت من راس سدر الساعه 6 مساء واول ما دخلت في طريق النفق قبل بوابات النفق لقيت الحراره عليت تاني والدنيا واقفه قبل النفق البوابه بتعدي عربية عربية ركنت على جنب نزلت للقيت المروحه واقفه اراجع على الفيش كله تمام ببص على الفيوز العمومي لقيته محروق وانا ما معاييش فيوز المهم جبت سلك وشعرت الفيوز وركبته برده المروحة مش شغاله بزقهها بايدي لقيت الحاجه مروحة قافشه كملت زقيتها بايدي مشيت بس تقيله قلت ها خليها على الله واتحرك قبل ما اوصل النفق شميت ريحة شياط كانت المروحه اتحرقت والفيوز ولع والسلك بتاع المروحه كمان ربن الهمني كان قدامي عربية نص نقل قلتله تقطرني تطلعني بعد النفق قالي ماشي طلعت واير القطر اللي معايا ده مهم جدا واي حد لازم يبقى في عربيته المهم اباشا قطرني وياريته ما قطرني انا شفت الموت بعيني والله كان بيجري جوا النفق على سرعة 70 وانا وراه لا حول ولا قوه والفرامل كمان بتبقى تقيله جدا والعربية مش دايه يعني لو ضرب فرامل في اي لحظة انا لبست لبسة العمر وفين جوا نفق الشهيد احمد حمدي ربنا سترها وخلصنا النفق واشاورله يهدى ابدا المهم عداني النفق ونزل يقولي انت بوظطلي الاكصدام ما معاكش شاكوش ندقه قلتلهل ياعم شاكوش مين شوف اي سمكري والكصدام اصلا ما فيهوش اي حاجه بس هو بيسبك المصلحه المهم خد اللي فيه النصيب وانصرف انا باه مش عارف اعمل ايه اتصلت باخويا ونا صحابي كلموا اوناش قالوا تكلفه الونش 900 جنيه و700 جنيه واسعار غريبه المهم انا عارف ان العربية هاتدور بس مافيش مراوح ولا تبريد كلمت واحد من اصحابي قالي امشي بيها زطول ما انت على طريق مش هاتسخن هاتسخن بس لو الدنيا وقفت ساعتها ابقى اقف بردها بس خد معاك مسه كتير المهم توكلت على الله واخدت طريقى وبفضل الله ربنا يسرها ووصلت بالعربيه لحد الهرم بدون اي اختناقات ولا الحراره عدت 90 ما كانش فاضل غير ان الكاوتش يضرب وانا راجع بس ربنا سترها
قدر الله وما شاء فعل معلش طولت عليكم ربنا يستر طريقكم جميعا

المشاركة الأصلية كتبت بواسطة zalabany

شكرا يا شباب على مروركم الكريم
أولا قطع الغيار مروحة جديده ايطالي ريش وموتور ب 350 جنيه وفيوز عمومي 40 امبير ولسه كوعة الميه ب 40 جنيه اللي بثرموستات وفي من غير ثرموستات ب 25 بس انا مش عارف هل اللي بثرموستات ليها سلك كهربا ولا ايه لاني مش شايف اي سلوك داخله في الكوعه عندي
ما ينفعش عربية تتقطر في طريق سريع ده خطر جدا انا بجد شفت الموت جوا التفق الله يسامحه سواق النص نقل لازم يبقى معاك واير قطر كنا جايبينه من التوفيقية بحوالي 40 جنيه ممتاز وبينفع في الزنقه من غيره كنت اتمرمط غير ستر ربنا طبعا في المقام الاول وكمان مهم يكون معاك كابل بطاريه هاجيبه ان شاء الله بس هاعمله عموله ده غير عده ومجموعة سيور وفيوزات وسلك وربنا يستره مع الجميع

زلبانى المروحة استيراد بالقميص بالمكثف ب 150 جنية بس بالنسبة لكوعة المية وضح انهى واحدة انا كدة ملخبط الوير السلك انا جبت واحد قطرة 10 ميلى ما رضتش اجيب الى قطرة 8 ميلى و طولة 4 متر و مغطى ببلاستيك كابل البطارية فية نوع ممتاز زى العمولة بس غالى سعرة حوالى 90 جنية العمولة الى فى دماغك حا يتكلف حوالى 75 جنية و فية نوع ب 50 جنية خسارة فية الفلوس وحش جدا جدا