الموضوع: تجربتي مع مركز البرقان وكيل معتمد اوماترا

السلام عليكم اخواني الاعضاء
انا هادخل في الموضوع علي طول لعدم الاطالة عليكم
اولا انا معايا فيات ماريا موديل 2001 بحالة ممتازة من الداخل والخارج ماشاء الله ومن حوالي شهر لاحظت ان والعربية دايرة يوجد بقعة بنزين تحت التانك مما يعني وجود مشكلة في طرمبة البنزين وذلك لسلامة التانك وعدم وجود اى ثقوب به وبدليل ان العربية لو مش دايرة لا يوجد تسريب اطلاقا المهم كبرت دماغي علي غير العادة ولكن من حوالي اربعة ايام وكنت لسه خارج من البيت وعلي اول طريق صلاح سالم ومعايا طبعا الاولاد والعربية ماشية زى الفل وفجأة العربية ابتدت تهدى سرعتها لحد ما وفقت خالص وهي دايرة واحاول ادوس بنزين وهي مبتتحركش ومخنوقة فبطلتها وجيت ادورها تاني مارضيتش تدور اتصلت بالميكانيكي اللي جنب البيت جالي وبص عليها وطبعا هو مش متخصص فيات وحكيتله اللي حصل قالي تبقي طرمبة البنزين قطعت المهم سحبناها لحد الورشة وجبتله طرمبة جديدة علشان يركبها علشان تركيبها يعني مافيهوش اختراع المهم ركبها بعد عذاب ودور ياعم مادارتش وبعدين افتح الكبوت كده ولقيته بيقولي ايه ده وادى اعمل فيها ايه دى مش القديمة كانت احسن وكنا بننخرب فيها زى ماحنا عايزين المهم قعد فيها لغاية الساعه 3 بالليل وهو عمال يجي يمين ويجي شمال وانا مش مديله فرصه يعك وفي الاخر قلتله سيبها بقي انا هاتصرف فيها وتاني يوم اتصلت بالميكانيكي بتاعي المتخصص في فيات وكمان شغال في التوكيل وجالي عند البيت وبصراحه هو راجل فاهم وبصراحه عمل كل المحاولات وجرب يغير كل الحساسات لانه اكتشف ان لما بيشيل الفيش بتاعة حساس الماب وحساس الكرنك وحساس الواتر العربية بتدور بس لو حاولت احركها بتمشي بس مخنوقة جدا ولكن دون جدوى وجاب كهربائي يراجع علي كل كهربة العربية ولكن دون جدوى والكلام ده بدأ يوم الثلاثاء اللي فات وحتي يوم الجمعه بالليل اخر مازهقت قلتله انا هاروح التوكيل اشوف في ايه مع العلم اني عارف ان كل الاخوة الاعضاء بيشتكوا من اوماترا مر الشكوى ولكن ما باليد حيله لقيته قالي لا استني انا هابعتك لواحد معرفه في مركز البرقان وده مركز معتمد من اوماترا في اول شارع العشرين في فيصل المهم رحت امبارح حوالي الساعه واحدة ومش قادر اوصفلكوا المقابلة والاهتمام من مهندسة الاستقبال متهيألي اسمها المهندسة امنية وخدوا العربية وحطوها علي الجهاز وخمس دقايق وجالي المهندس وكانت المفاجأه ان الكنترول يونيت باظ طب ايه اعمل ايه مش عارف وخمس دقايق من التوهان وفوقت علشان اسأل عن التكلفة طلعت كبيرة والحمد لله لان القطعه نفسها غالية المهم ركبت والحمد لله ولكن مارضيوش يسلمولي العربية طيب ليه جالي المهندس وقالي ان الكنترول ما بيبوظشي لوحده كده لازم يكون في سبب فاحنا لازم نوصل للسبب الاول ونعالجه وبعدين نركب الجديد ونسلمك العربية يعني ايه يعني العربية لازم تبات بصراحه عجبني الاهتمام ده من ناحيتهم فمشيت وسبت العربية عندهم المهم النهارده الصبح الساعه 11 لاقيت المهندس بيكلمني علي التليفون بنفسه ( شوفتوا الاهتمام ) وقالي احنا وصلنا للسبب وهو ان طرمبة البنزين لما قطعت عملت قفلة بوظت الكنترول ( علي فكرة انا ماقلتلهمش اني غيرت طرمبة البنزين وهو اللي اكتشفها بنفسه ) معني ذلك ان في شغل حقيقي تم وتم الكشف بالفعل علي العربية بكامل الضفيرة المهم رحت حاكيله اللي حصل فقالي يبقي الطرمبة لازم تتغير وفقلتله غيرها وانا رايح النهاردة الساعه خمسة استلم العربية وهارجعلكوا بكرة اقولكوا اللي حصل وانا باستلمها وهاتعرف علي مدير المركز واجيب اسمه ورقم تليفونه واقولكوا عليه .
اخيرا اسف علي الاطالة بس انا حبيت اني انصح كل اخواني الاعضاء بانهم ميكبروش دماغهم علي اى عطل في العربية حتي لا يتفاقم وايضا حبيت اعرفكوا علي مركز البرقان والناس المحترمه اللي فيه اللي لاقيت فيه كل حاجه عكس ما يقول الاعضاء علي اوماترا
( انا عارف انها حاجه غريبة ان يكون مركز معتمد احسن من التوكيل نفسه ) بس هو ده اللي حصل وعلي فكره انا والله اول مرة اروحلهم وماعرفش اى حد فيهم بس دى تجربة شخصية ليا حبيت افيد بيها الاعضاء واقول شهادة حق
اسف مرة اخرى علي الاطالة وان شاء الله اكملكوا بكرة