الموضوع ده يا جماعه هقول في تجربتي في شراء جنط للعربيه ممكن تفيد حد

كنت مركب جنط صيني"15 في العربيه عندي هو بصراحه عاش معايا فتره حلوه بس ممكن عشان مبتحركش بالعربيه كتير لاكن اتاكلت الشفه بتعته وده كان مسبب رعشه في العربيه بعد ال 80 وفي التوكيل قلي ان الجنط السبب عشان سيء
فبصراحه قررت اغيره خصوصا اما نزلت في يوم ولقيت العجله نيمه عشان كان فيه تنفيس من عند الشفه اللي استعدلتها قبل كده وفعلن سألت عند Goodyear محل نضيف بصراحه وعند واحد بعد ميدان المطريه و عند واحد واخد نصيه في ميدان السواح محل كبير في برج بتاع 12 دور وطبعا بعد سماع النصايح من الاعضاء علي المنتدي بعدت عن الصيني وعن الروماني

-فسألت عند goodyear قلي معندوش اندونيسي وقالي التيوانيHijoin هيعمل 1700 جنيه وكان عنده كام شكل حلوين بصراحه وقال انه هياخد الجنط عندي ب 250 جنيه يعني يديني الجنط علي 1450 ج
((وقلي انه مبيشتغلش في الاندونيسي عشان بيكون 250 كجم مش 500 كجم وان الصيني بالنسباله أحسن)) !!!

-وبالنسبه لل في ميدان السواح كل اللي عنده صيني فبعدت عنه والجنط عنده عامل 1500 ج

-بعد كده رحت للمحل ال نواحي ميدان المطريه عند اليوترن اللي تحت الكوبري اللي بيودي علي الحلميه المهم ده كان عنده كتلوجات وقلي روح المخزن اختار الشكل اللي انت عيزه وقال ان الاندونيسي ب 1700 نهااااائي مرضيش ينزل ابدا وان التيواني يعمل 2000 ج وقالي في تايلاندي نفس سعر الاندونيسي وقال انه هياخد الجنط اللي معايا علي 500 علي عيبه وحتي مرضيش يبص عليه وقال الاندونيسي والتيلاندي احسن من التيواني!!!

-واخيرا رحت في الاخر لاشرفكو انا سمعت عنه كتير في المنتدي انا رحت للقصاد محطة مترو المطريه
بصراحه المكان كان كويس وعندهم تشكيله كبيره والاهم انه كان منزل عرض علي جنوط اندونيسي عشان كانت موديلات قديمه شويه ومتخزنه بقالهه فطره فممكن يكون فيهه تجريح بسيط او حاجه وكان الجنط عامل 1100ج بعد الفصال وخد الجنط مني ب 300 وبكده دفعتله 800 ج والجنط محفور عليه اسم البلد والحموله 500 كجم,مكنش فيه اي حاجه وبكده اتأكدلي ان كلام بياع Goodyear مش صح وعلي فكره كان بيبيع كمان جنوط مستعمله بس اللي شفته كان هيحتاج رش قلت خليني فالجديد احسن
وطبعا ركب ورصص وظبط كل حاجه واستلمت العربيه بصراحه اما مشيت بيهه كانت انعم مفيش رعشه خالص وعديت الميه بيهه علي طريق المطار وكانت ممتازه حتي مكنش فيه حدف رغم اني مظبطش الزوايه و حستهه ثابته علي الطريق فرق محسوس
وانا عند أشرفكو قلي انه معندوش تيواني لان اغلب اللي في السوق مش محفور عليه اسم البلد وبيكون صيني !!! انا مش عارف ايه صحت الكلام ده
معلش طولت عليكما في الكلام بس حبيت اقول كل حاجه بالتفصيل ممكن تفرق مع حد وكمان يهمني سماع ردود الاعضاء واقتراحاتهم عشان الفيدة لينا كلنا

شكرا لحكاية تجرتبك

الف مبروك يا باشا

اقتباس المشاركة الأصلية كتبت بواسطة ahmedbasto شكرا لحكاية تجرتبك

شكرا لردك وان شاء الله الكلام يساعد اي حد

اقتباس المشاركة الأصلية كتبت بواسطة caysersosaih الف مبروك يا باشا

الله يبارك فيك

شكرا
علي نقلك للتجربه

ال hijoin روعة

اقتباس وانا عند أشرفكو قلي انه معندوش تيواني لان اغلب اللي في السوق مش محفور عليه اسم البلد وبيكون صيني !!!

يا ريت اعرف صحة الكلام دا ؟؟؟

الف مبروك ياباشا
كنت عايز اعرف من سياتك انت ركب الجون فى عربية اية
وكنت عايز استفسر انك بتقول الجنط مكتوب علية بلد المنشا فهل ممكن يكون تقليد مثلا
وبعديت سياتك بتقول ان فى جنوط استعمال وعايز رش فممكن يكون اللى مع سياتك استعمال ومرشوش
انا بسال كدة عشان انا عايز اجنط عربيتى ومتردد فى حاجات ومنا انى سمعت ان الجنوط بتبوظ العفشة
شكرا لسياتك على الموضوع الجميل اللى بالتفصيل المفيد

بسم الله الرحمن الرحيم
الفا الف شكر على النصيحة الغالية

اقتباس المشاركة الأصلية كتبت بواسطة akram2011 الف مبروك ياباشا كنت عايز اعرف من سياتك انت ركب الجون فى عربية اية وكنت عايز استفسر انك بتقول الجنط مكتوب علية بلد المنشا فهل ممكن يكون تقليد مثلا وبعديت سياتك بتقول ان فى جنوط استعمال وعايز رش فممكن يكون اللى مع سياتك استعمال ومرشوش انا بسال كدة عشان انا عايز اجنط عربيتى ومتردد فى حاجات ومنا انى سمعت ان الجنوط بتبوظ العفشة شكرا لسياتك على الموضوع الجميل اللى بالتفصيل المفيد

انا كمان عندي نفس المشكله اني اولا مش بفهم في الجنوط ولا في انواعها ولا في كيفيه اختيارها بحيث لا تؤثر على عفشه العربيه ؟؟؟؟ واول مره اعرف ان الصيني والروماني تعبانين وان افضلهم الاندونيسي ويكون كمان محفور اسمه على الجنط , ده غير الواحد يفرق ازاي بين الجنط المستعمل والجديد خصوصا ان اول مره اسمع ان الجنوط ممكن تترش والي كنت اعرف انها ممكن تتلمع فقط
فياريت حد بس يقولنا شروط تركيب الجنوط على السيارة وهل ليها ضوابط وتعليمات معينه