يعنى ايه صدادات

**misoalex** · 29-07-2010 05:17 PM

دلوقتى كنت بعمل شغل فى العفشه عندى و العربيه كانت عاليه اوى من ادام وبتاع العفشه قاللى حقص (الكوز )ده الى راكب فى المساعد وحقص لفه واحده من السوسته

المهم الكوز ده عباره عن كبايه حديد مخرومه وراكبه فى المساعد مغطيه الحديده النيكل الى بتطلع وتنزل المهم وهو بيقفل المساعد والسوسته لاقيت ان الحديده النيكل دى كده بقت باينه قولتله لا كده مينفعش ومع الطينه والتراب حتدخل فى المساعد وحيبوظ بسرعه قاللى سهله هات حاجه اسمها كاوتشه تراب
وهى كاوتشه عامله زى كاوتشه الاسكاترا كده

وركبها وقفل المساعد على السوسته ولاقيت ان السوسته عاوزه تطلع من المساعد من حرفها كده كأن السوسته بقت واسعه على القاعده بتاعه المساعد بس ظبطها ولفها على المكان الى بتبات فيه وقالى لما تركب فى العربيه حتتظبط

المهم دلوقتى هو الكوز الى قصه ده هى دى الصداده لانى الى فهمته ان دى عشان المساعد يقف عند مستوى معين ولو حصل واكلت مطب جامد الفخده حتاخد الصدمه لان الكوز ده حيحوش المساعد من انه ينزل لتحت
وموضوع السوسته وقصها بالصاروخ مع انه كان مصمم انه يقصها باللمبه وانا اصريت انه ميقصهاش باللمبه
هل السوسته كده بقت واسعه على قاعده المساعد

**misoalex** · 29-07-2010 05:24 PM

نسيت اقول هو ورانى حتت من سوست بالهبل عنده مقصوصه باللمبه

والمصيبه ان واحد معاه عربيه اوبترا وجايب سوسست اسبور جديده وقص منها مرتين ادااااااامى مره لفتين ومره لفتين تانين

يعنى السوسته اتقص منها مرتين باللمبه وقعد يقوللى منت شايف اهو عمرنا مسمعنا ان سوسته يحصلها حاجه
الا لو السوست الاسبور طيب منت قصيت فيهم اهو

**SAMEH_FOUAD** · 29-07-2010 08:35 PM

اولا الصدادات دية بتتركب على المساعد وتمنعة من النزول الى حد معين عشان السيارة متحكش فى المطبات وغالبا بتتركب ورا عشان مافيش حمل عليها غير بس الركاب لكن قدام بتبقى خطيرة على شاسية السيارة لانها بتنشف العفشة شوية وبتمنع ان المساعد ياخد راحتة فى الطلوع والنزول فبتاثر على الشاسية مع وجود حمل بحجم الماتور

ولو العربية عندك 128 يبقى الافضل ان كنت تجيب سوستتين استيراد احسن من اللى انت عملتة دة لانة شغل عك

**SAMEH_FOUAD** · 30-07-2010 04:53 AM

الصدادات : بتتركب على المساعد لمنع نزول المساعد عند حد معين وبالتالى مهما بتحمل العربية ليها حد معين مابتنزلش عنة , بس بتنشف العفشة لو محمل لكن لو اتنين بس اللى راكبين مافيش اى تاثير ومالهاش تاثير فى الثبات او فى تعويم العربية

القرص الحديد اللى حضرتك تقصدة دة اسمة علاية : العلاية دية فية منها نوعين نوع كاوتش ونوع حديد الفرق ان النوع الكاوتش بيبقى اريح فى المطبات مقارنة بالنوع الحديد فى مقابل ان النوع الحديد بتركبة وبتنساة لكن الكاوتش كل فترة لازم تغيرة ودية اسمها علايات بتبقى تقريبا بمقدار 1 سم ونص او سم واحد وطبعا فية مقاسات وبتتركب مابين المساعد والسوستة وبتتحكم طبعا فامتعملش ولا تزييق ولا اى حاجة يعنى ماتقلقش منها بس بتنشف العفشة شوية

**SAMEH_FOUAD** · 30-07-2010 02:15 PM

المشاركة الأصلية كتبت بواسطة misoalex

شكرا يا باشا بس هو ليه الى عملته عك وانا السوست عندى كويسه اجيب غيرهم ليه انا كل المشكله ان العربيه عاليه اوى من ادام ومفيش حد شافها الا لما يقوللى وطيها لانى بجرى بيها للاسف فبتعوم على السرعات العاليه
وكل ال 128 الى شفتهم موطين قاصصين لفتين من السوسته انا اكتفيت بلفه واحده فقط عشان متوطاش اوى

لو عندك حل تانى غير القص قوللى ومتقوليش سوست اسبور لان سعرهم غالى وبينشفو العربيه
انا ركبت مساعدين الكورسا فيها بس عشان قصرين العربيه بقت تدب فى المطبات وناشفهه وشيلتهم بس كانو مخلين العربيه ثباتها فظييييييييع بس اقل طوبه احس بيها فى العربيه فشيلتهم

ممكن توضحللى ايه الى عك بالظبط

على فكرة انا ماقصدش عليك انت انا اقصد على الميكانيكى اللى انت وديتلة العربية
ياباشا كل ال128 اللى انت شايفها ماشية فى الشارع محدش قاصص من السوست وانا عندى اصحابى عندهم 128 ومش قاصين ولا حاجة
القص دة بيتعل السوستة ومابتعمرش , والحل انك تجيب سوست ال128 استيراد وركبهم وهتلاقيها مظبوطة من قدام , او تجيبهم جداد وتمنهم مش هيعدى 200 جنية على ماعتقد واشترى دماغك

واسف مرة تانية على سوء الفهم والله ماكنت اقصدك انت خالص انا كان قصدى على الميكانيكى بتاعك

**SAMEH_FOUAD** · 30-07-2010 05:53 PM

المشاركة الأصلية كتبت بواسطة misoalex

انا فاهم بس السوسته الجديده حتوطى العربيه 3 سم تقريبا !!
اظن انها حتعلى العربيه اكتر لان ده حصل بعد مغيرت السوست القديمه من كام شهر بسبب انى لقيت واحده مقطومه ومكنش مقصوص منها ولا حاجه واتقطمت لوحدها من عند اول لفه
ومفيش حل عشان اوطيها غير كده او اجيب سوست اسبور

هاتها استيراد بلاش جديدة لكن قص من السوست وتغير فى القاعدة بتاعة المساعد او مايسمية المكيانيكى بتاعك (الكوز) وانى يركبلك كاوتشة تراب انا اول مرة اسمع صراحة ان يتم تركيب كاوتشة تراب فى مساعد ماشوفتهاش قبل كدة

وعموما حضرتك لو عندك احساس بان العربية عالية من قدام يبقى كدة العربية من ورى واطية ولازم تترفع شوية عشان تظبط من قدام
مظبوطة من ورى يبقى حضرتك لائما هتجيب سوست استيراد الاتنين قد بعض , او تجيب جديد وهما مع الوقت مافيش شهرين وهتلاقيهم وطيوا لوحديهم وبقوا مظبوطين
سوست الاسبور فية منها انواع انواع شديدة القساوة واتواع متوسطة وانواع عادية للعفشة الناعمة بس بتبقى اوطى من الطبيعى بلفتين تقريبا