اطلع الطريق الدولى لبورسعيد منين و انا جاى من مطروح

**mohamed_selim** · 30-07-2010 02:56 PM

انا عارف انى همشى فى طريق الساحل لحد العجمى (اظن اسمه الكيلو 21) ... طيب و بعد كده امشى ازاى علشان اخد الطريق الدولى فى اتجاه بورسعيد؟

**Mostafa.Mahran** · 30-07-2010 03:04 PM

خليك فى نفس الطريق و انت راجع من مطروح لحد ما توصل للكيلو21 خليك زى ما انت فى نفس الطريق بتاعك لحد ما تلاقى دخلة على اليمين مكتوب عليها المكس و القبارى ادخلها و خليك طوالى لحد ما هتلاقى طريق فرعى شمال مكتوب عليه محرم بك ملكش دعوة بيه خليك مكمل على طول هتلاقى يافطة مكتوب عليها رشيد-دمياط- بور سعيد وهتخليك فى الطريق ده طوالى
وتوصل بالسلامة

**بحري** · 31-07-2010 02:29 AM

وممكن حل تاني أسهل شوية
حضرتك بتوصل الكيلو ٢١..في هناك صينية بتدخل من عندها يمين..أول يمين بعدما تنزل من الكوبري تحديدا
بتمشي شوية في الطريق ده..دقيقتين..هتلاقي الدولي الساحلي عبارة عن كوبري علوي بيقطع الطريق بالعرض ..بورسعيد هتكون كده على شمالك
بتعدي المطلع اللي قبل الكوبري..وتاخد اللي بعده..يمين في يمين هتلاقي نفسك على الكوبري باتجاه بورسعيد
تمشي على طول إلى بورسعيد لا تحود يمين أو شمال لغاية المفارق اللي قبل بورسعيد على طول
في رعاية الله

**rocker** · 31-07-2010 09:07 PM

الله المستعان
خليك معايا ياحاج
حتمشى لحد الساحلى وحتلاقى يافطه داخله يمين مكتوب عليها الى مطار برج العرب ومحور التعمير
حتمشى لحد ماتلاقى تانى ملف راجع تقوم تلف وترجع وتاخد اول يمين تطلع مطلع كوبرى تمسكه على طووووووووووووول وخللى بالك السرعه 100 لحد ما توصل لكارفور على شمالك وتستمرعلى طول برضه وده اول طريق دمياط وبورسعيد تمشى على طوووووووول وتلع كل الكبارى لا شمال ولا يمين بعد 65 كم تلاقى كمين رشيد وتمشى كمان 50 كم تلاقى كوبرى البرلس تطلعه على 40 علشان المطبات تمشى كمان 20 تلاقى بلطيم تعدى وتمشى على طول ماتجريش تطلع كوبرى على 60 علشان المطبات وتنزل تمشى 45 تكون فى جمصه تخللى بالك المفارق وتكمل على طول 20 كم دمياط الجديده تسيبها وتكمل على طول على الكوبرى حوالى 50 كم كمان بورسعيد
تطلع بدرى من مطروح وتخرج من بورسعيد قبل العصر علشان تمشى فى النور لان الطريق كحل ومش متعلم فى الارض
وربنا معاك انا على الطريق ده كل يوم وخللى بالك ماتجريش عن 100 ونام كويس