شخلله فى الفتيس

**khaled_sabry** · 03-08-2010 08:40 AM

السلام عليكم
فى البدايه انا عربيتي كورولا 1978 فتيس مانوال دفع خلفى بكرونه زى النظام القديم المعتاد

من فتره تقريبا 4 اشهر بدأت اخد بالى ان فيه صوت زى خبطه كده فى الفتيس اول لما اسيب الدبرياج ..و بصراحه كنت متعايش مع صوت الخبطه دى خاصه انها بتطلع غالبا مع الغيار الثانى بس
و مع مرور الوقت بدأت الخبطه دى تزيد لدرجه انها بقيت فى اول كل غيار
و كمان بقى فيه صوت زى شخلله (كأنه بلى جوه علبه حديد ) بسمعه من تحت بشكل عشوائى لما امشى على مطب بسرعه او جرى بسرعه فى شارع مكسر بسرعه تبداء من 60... برضه فى الاول كنت مطنش (لأنى كنت فاكر ان الصوت ده من رايش فى علبه الشكمان اللى فى النص لأنى مغيرتهاش بقالها اكتر من 3 سنين ) لغايه لما لاقيت الصوت ده بقى عالى اوى
رحت لبتاع الشكمان لاقيته بيخبط على عمود الكردان و الفتيس و لاقيتها هى اللى بتعمل صوت عالى

المهم روحت لميكانيكي .. طبعا ماعرفتش اسمعه صوت الشخلله دى لأن الدنيا كانت زحمه و ماقدرتش اجرى بالعربيه
المهم هو نزل تحت العربيه و اكتشف ان قاعده الفتيس كانت مقطوعه خالص و الفتيس كان مرتكز على القنطره ( حسب كلامه ) .. غيرتها و طوت الخبطه اللى كان فى اول الغيار راح تماما
كمان صوت الشخلله ده قل بنسبه 70% ... بس لسه موجود على خفيف اوى و تاخد بالك منه لما تركز

مع العلم الصوت ده مش مرتبط بدوسه بنزين و لا اى حاجه هو احيانا بيحصل لما اكون بمشى بسرعه اكبر من 60 و مش بيبقى صوت متصل

تفتكرو الصوت اللى باقى ده بسبب رايش فى علبه الشكمان اللى فى النص ( زى ماكنت شاكك فى الاول ) و لا هل فيه عيب فى الفتيس تانى ممكن يعمل الصوت ده؟؟؟
هل مثلا اهمالى فى تغيير قاعده الفتيس اللى اتقطعت ممكن يؤدى الى عيب تانى ؟؟
ياريت المساعده لأنى حسافر اسيوط بالعربيه دى قريب و مش عاوز مفاجأت فى الطريق

**khaled_sabry** · 03-08-2010 11:28 AM

ماحدش عنده اقتراحات او اى حاجه

**m_mekkawy** · 03-08-2010 02:49 PM

ممكن بسبب الكرسى اللى اتقطع الجير حمل على عمود الكردان جاب فيه صلايب.

**khaled_sabry** · 03-08-2010 10:03 PM

المشاركة الأصلية كتبت بواسطة m_mekkawy

ممكن بسبب الكرسى اللى اتقطع الجير حمل على عمود الكردان جاب فيه صلايب.

شكرا على الرد
طيب انا دلوقتى ركزت مع الصوت و لا قيته بيطلع لما بجرى بالعربيه او بمشى على ارض مكسره
اللى اعرفه ان الصلايب لما بتبوظ بتعمل صوت ونه مستمر ....

**khaled_sabry** · 04-08-2010 08:20 AM

على فكره انا لاحظت برضه الناهرده ان الصوت بيطلع لما بدوس بنزين فى المطالع الخفيفه
كأنه تسقيف بس على خفيف اوى و بسمعه من النصف الخلفى من العربيه ؟؟؟

ياريت حد يساعدنى لأنى حروح للميكانيكي الناهرده بعد الشغل و مش عاوزة يشتغلنى او يقولى كله تمام و تطلع فيه مشكله

**m_mekkawy** · 04-08-2010 08:26 AM

المشاركة الأصلية كتبت بواسطة khaled_sabry

شكرا على الرد
طيب انا دلوقتى ركزت مع الصوت و لا قيته بيطلع لما بجرى بالعربيه او بمشى على ارض مكسره
اللى اعرفه ان الصلايب لما بتبوظ بتعمل صوت ونه مستمر ....

الصلايب قبل ما تبوظ بكامل بتعمل صوت زى ده وبعدين بتقلب بصوت ونه
وبرضه شيك ع الشكمان والعفشه لان ممكن تكون حاجه فيهم مفكوكه

**khaled_sabry** · 04-08-2010 10:36 AM

المشاركة الأصلية كتبت بواسطة m_mekkawy

الصلايب قبل ما تبوظ بكامل بتعمل صوت زى ده وبعدين بتقلب بصوت ونه
وبرضه شيك ع الشكمان والعفشه لان ممكن تكون حاجه فيهم مفكوكه

ماشى
على العموم الف شكر ياباشا على الاهتمام ( بما انك العضو الوحيد اللى عبرنى )
و ان شاء الله حبقى اقولك الميكانيكي عمل ايه
بس سؤال اخير معلشى ... لو كانت بالفعل الصلايب فى اول بوظنها كده ... هل بالحاله الحاليه ممكن تستحمل سفر 400 كيلو ؟؟ و لا ممكن لاقدر الله تنكسر فى السكه