تأثير نقص زيت الكرونه

**khaled_sabry** · 18-08-2010 10:32 AM

اخوانى اعضاء المنتدى الاعزاء :: رمضان كريم
امبارح اكتشفت ان عندى الاويل سيل اللى بين الكرونه و عمود الكردان بايظ فروحت للميكانيكي علشان يفكه و اجيب واحد غيره
هو كان مقاسه 55 * 35 ... لفيت عليه كل الاماكن القريبه من بيتي مالقتشى الا 55 * 33 فرق 2 مم ... الميكانيكي قالى مش مهم شغال لأن حتلاقى عندك فيه تأكل (عربيتي بقالها 32 سنه) و الفرق ده حيعوضه ... و بالفعل اتركب الاويل سيل و خلاص
فسؤالى هل الكلام ده مظبوط و لا ممكن بعد شويه الاقى الاويل سيل ضرب تانى ؟؟
المهم طبعا و هو شغال نزل زيت الكرونه و هو قالى ابقى عبى زيت للكرونه
طبعا لما مشيت من عنده كانت الساعه 11 و نص باليل و مالقتشى بتاع الزيت فاتح

المهم الناهرده الصبح عملت حركه و ندمت عليها ... هى انى مشيت بالعربيه ( و هى لسه ناقصه زيت ) علشان اروح بيها الشغل بس كنت ماشى لغايه الغيار التالت .. المهم فى حته كده جبت الرابع
اول لما جبت الرابع و ابتديت ازود لاقيت فيه صوت خشونه طلع من الكرونه فوقفت بالعربيه بعدها
بعد كده بقيت امشى بالعربيه و اسمع صوت ده فى اخر الغيار الثالث
بس لما اهدى الصوت بيروح ..
المهم مشيت شويه بعد الحكايه دى لغايه و بعد كده خوفت و ركنتها فى اول عباس (تقريبا بعد 15 كم من البيت عندى )
طبعا بعد الشغل حروح و حزود زيت عند اى حد
بس سؤالى بقى هل اللى حصل ده (انى مشيت بالعربيه 15 كم و هى ناقصه زيت اوى) ليه تأثير على المدى القريب او البعيد ؟؟؟
على فكره الكرونه ماكنتشى بتطلع اى صوت قبل الموضوع ده .. و ربنا يستر لما ازود زيت الناهرده

**khmonir** · 18-08-2010 02:35 PM

الحقيقة انا مش خبير قوي لكن انا اشتريت عربية وكان برضه الأويل سيل فيها عايز يتغير ، ولما رحت للميكانيكي معرفش يفك الكرونة بسبب تلف في صامولة من صواميل الكرونة ، المهم إني رحت زودت زيت وحطيت 1.5 ك زيت وده معناه إن الكرونة كانت فاضية خالص بس الحمد لله الفترة اللي مشيت بيها وأعتقد إن اللي اشتريت منه كان ماشي بيها مده برضه متسببتش في حاجة فمش عارف بقى كده حصل حاجة عندك والا لأ
أنا حبيت أطمنك بس لحد متزود الزيت

**khaled_sabry** · 18-08-2010 03:29 PM

الحمد لله يا باشا انا خلاص زوت زيت و الصوت اللى كان بيطلع فى السرعه العاليه خلاص اختفى كما كان متوقع و الحمد لله
النكته انى قولت للراجل فضى الزيت اللى جواه ... هو يادوب فك الطبه نزلت بمقدار مايكفى لملئ غطا حاجه ساقعه .. يعنى يا دوب كام نقطه و خلاص
الحمد لله ان الكرونه ماقفشتشى
المهم بقى انا سألت الراجل انتا حتملى الكرونه بزيت ماركته ايه ... قالى بالزيت اللى فى الجراكن دى
لاقيت جراكن برتقالى و مكتوب عليها زيت تروس لزوجه 140 ... بس ماعليهاش ماركه معينه زى شل و لا التعاون حتى و الكيلو ب 10 جنيه

فياريت حد يقولى ايه هو زيت التروس ده و هل هى حاجه من الحجات اللى بتتعمل تحت السلم - و بالتالى يستلزم تغيره علشان احافظ على الكرونه ؟؟
برضه للأمانه اانا حاسس دلوقتى بلزوجه لزيت الجديد انه مكلبش الكرونه كويس

**khaled_sabry** · 19-08-2010 09:16 AM

يارجاله
الناهرده اخت بالى ان فيه صوت ونه بس بيظهر على السرعات اعلى من 80 و اثناء ضغط البنزين فقط
تفتكرو الصوت ده من الكرونه و لا من حاجه تانيه مالهاش علاقه بالموضوع و ماكنتش واخد بالى منها زمان