تلميع الكاوتش و علاج الخدوش

**SeaShark** · 18-08-2010 02:57 PM

سلام عليكم و كل سنة و انتم طيبين

انا عندي مشكلة و هي اني بحب دايما يكون الكاوتش اسود و بيلمع و ده بيخليني اشتري الفوم ابو 30 جنيه ده كتير و طبعا كده الموضوع مكلف اوي
مفيش اي حد جرب او عنده اقتراح لاي حاجة ممكن تلمع و تسود الكاوتش غير موضوع الفوم ده انا دورت في المنتدي علي موضوع يكون كده بس مش لاقي ملقتش غير ان في ناس بتقترح صابون غسيل الاطباق

النقطة التانية انا بشوف كتير اوي علي النت في سايتات امازون و اي باي و يو تيوب منتجات كتير جدا بتعالج الخدوش حتي العميقة هو احنا ليه مش عندنا في مصر منتجات زي دي ولو في ممكن نجيبها منين
صدقوني فعلا في منتجات كتير اوي و انا شوفت فيديوهات بتخلي حتي الشروخ العميقة تحتفي تماما يا ريت نجمع كل الاراء و الخبرات و التجارب عشان موضوع الخدوش ده نلاقيله حل

**ahmedyehia515** · 18-08-2010 03:03 PM

بخصوص الكاوتش ، انا كنت بعمل كده و بعدين كان الموضوع مكلف فلقيت حاجة تانية اقل تكلفة و اثرها اطول، فى اسبراى اسمه son of a gun هوا إزازة صفرا و فى منها الصغير و الكبير. هو لتلميع الكاوتش و التلبلوه و أى حاجة بلاستك أو فيبر أو مطاط.

بكل بساطة بعد ما أغسل العربية ، بروش على الكاوتش و أسيبه ينشف فى الهوا ، الكاوتش بيقضل يلمع على الاقل اسبوعين و لو جه عليه تراب مجرد بيتغسل بميه و يرجع يلمع تانى.

الأزازة الكبيرة بتقعد معايا اكتر من شهرين مع العلم انى عندى هوس بموضوع الكاوتش بيلمع ولا لأه

التحدى الحقيقى بيكون فى الجنط السبور بالذات الجنوط اللى قدام عشان تيل الفرامل و كده.

بخصوص الخدوش، متهيألى عشان استيراج المنتجات ده هيخلى سعرها عالى و اغلب الناس مش هيصرف مثلاً 90-100 جنيى على علبه معجون غزالى خدوش غير لو فعلاً العربية عزيزة عليه. انا شخصياً معاك و يا ريت حضرتك تحاول تبعت الفيدوهات ده ممكن تلاقى عضو شاف حاجة زيها فى مصر.

**Abody1985** · 18-08-2010 03:24 PM

استخدم البيبسي في تلميع الكاوتش وادعيلي

**kh_talaat** · 18-08-2010 03:31 PM

هو حضرتك مكرر الموضوع مرتين ليه ؟؟

انا كتبت مشاركة في الموضوع التاني ويا ريت تطلب من الأدارة دمج الموضوعين

http://www.nilemotors.net/Nile/173639-a.html

**SeaShark** · 18-08-2010 03:52 PM

المشاركة الأصلية كتبت بواسطة kh_talaat

هو حضرتك مكرر الموضوع مرتين ليه ؟؟

انا كتبت مشاركة في الموضوع التاني ويا ريت تطلب من الأدارة دمج الموضوعين

http://www.nilemotors.net/nile/173639-a.html

ازاي طيب اطلب كده من إدارة المنتدي ؟

**elewey** · 18-08-2010 05:23 PM

بالنسبه للكوتش فى طريقة عن طريق ورنيش الاحذية و فى موضوع مكتوب فى المنتدى عليه بالنسبه بقى لموضوع الخدوش معظم اللى بتشوفه على النت دة مش صحيح يعنى على سبيل المثال كان فى منتج اسمه fix pro افتكر المفروض انه بيشيل كل الخدوش لو دخلت على اليوتيوب حتلاقى فيديو تانى بيقول انه مبيعملش اى حاجة وانه اشتغاله كبيرة الخدوش العميقة ملهاش غير الرش

**N.a.j.d** · 18-08-2010 06:56 PM

حضرتك استخدم ميه وسكر وبلاش الكولا او الببسي ميه وسكر احسن
وبعدين عايز حل للخدوش نهائيا ادخل على النك دا
http://www.nilemotors.net/Nile/154840-kia.html

**kh_talaat** · 19-08-2010 11:29 AM

المشاركة الأصلية كتبت بواسطة mk682

ازاي طيب اطلب كده من إدارة المنتدي ؟

خلاص الأدارة قفلت الموضوع التاني ومنقلتش مشاركتي اللي كانت فيها

شكرا للمشرف !!!

على العموم ملخصها بالنسبة للكاوتش جرب ورنيش الأحذية الجاف مش السائل وهيعجبك قوي ومش مكلف

وبالنسبة للخدوش للأسف فعلا في مصر مفيش دراية بالموضوع دة والمحلات اللي في محطات البنزين بتجيب المنتجات بالكمية كدة وكل شوية نوع ولو سألت عن اي منتج هتلاقي البائع ميعرفش دة بيعمل اية اصلا !

وانا كنت اشتريت كومباوند لإزاله الخدوش من محطة بنزين في الدقي وكان فعلا رائع وشال خدوش كتيره ولما خلص روحت اسأل عليه تاني ملقتهوش واضطريت اشتري نوع تاني لكن لقيته ولا له اي تأثير

دورت على النوع الأول في التوفيقية وكارفور ومحطات البنزين ولم اعثر عليه

ودي صورته لو حضرتك لقيته اشتريه وهيعجبك قوي ويا ريت تبقى تبلغني جبته منين وكان سعره 17 جنية

**smsm_nabawy** · 20-08-2010 08:54 PM

متابع بأهتماام

أنا سألت واحد سواق تاكسي ساكن معانا في الشارع ،،

قاللي بيجيب أزازة و يحط فيها حبة بنزيين ،، و يكمل باقي الازازة صابون سايل و مية

انا اللي هبلني يووم كنت نازل الكلية و لقيته بيغسل في العربية بتاعته الصبح و عمال يلللمع في الكاوتش و أنا كنت لسة جايب العربية اليوم اللي قبلها من البنزينة مغسولة و بتلمع من كل حتة ،، رحت الكلية و جيت بليل ،، لقيته جي بالتاكسي بتاعه ،، قلت أبص على الكاوتش اللي كان بيلمع فيع ده ،، متوقع انه اكيد اتبهدل،، لقيته نضيييييف جداً و بيلمع فعلاً ،، أكتر من عربيتي اللي غاسلها في البنزينة ،، استعجبت و رحت سألته في ساعتها ،، و قاللي على الطريقة

للأمانة حتى الآن مجربتهاش لأني لسة منزلتش أغسل العربية ،، السيد الوالد راح غسلها في يوم مع نفسه في البنزينة تااني ،، و كسلت انا أعمل كده ،، و قلت أبقى أعملها المرة الجاية لما أغسلها انا ،،