العربية ما بتدورش و هي باردة

**Zika9909** · 20-08-2010 04:49 PM

أنا عندي مشكلة إن العربية ( نوعها بولونيز ) وهي باردة ما بتدورش إلا بعد 10 محاولات أو 15 محاولة على الأقل، لكن لما تكون سخنة بتدور من أول مرة عادي. عرضتها على ميكانيكي مافهمش و عرضتها على كهربائي قام عملي صيانة للمارش، بس لسه المشكلة موجودة.
ملاحظات:
-أول 6 محاولات أو 7 محاولات العربية ما بتدورش خالص.
-بعد كده تدور لمدة ثانية واحدة بس و تطفي و لازم خلال الثانية دي ألحق أدوس بنزين للآخر عشان تدور و لو مالحقتش تطفي، و هكذا لحد ما تدور.
-مرة العربية دارت و بعدين طفيتها قبل ما تسخن كويس ( مؤشر الحرارة ما وصلش لدرجة حرارة 50 يعني العربة لسه باردة) و شغلتها دارت في ساعتها.
-المشكلة مش من البطارية لأن أنا بقيت أفصلها لما أكون ناوي أركنها عشان لو بتهرب كهربا أو في ماس بسيط ما يأثرش مع طول الركنة.
أرجو الرد

**mmffor** · 20-08-2010 05:09 PM

تبقى تعمل ولعه تحت العربيه و لما العربيه تسخن شويه تبقى تدورها بس لازم نص سوا لأن ممكن تستوي قوي و ميبقالهاش طعم! بهزر طبعا! نظف الكربراتير و بك البنزين و غير البوجيهات

**amrelsaqqa** · 20-08-2010 05:11 PM

قول للميكانيكى يعلي الكهربا شوية
لأن احتمال تكون الكهربا واطية او مأخرة شوية
مع تنضيف الكربراتير و فحص طقم الكهربا كله

**Zika9909** · 20-08-2010 05:24 PM

المشاركة الأصلية كتبت بواسطة mmffor

نظف الكربراتير و بك البنزين و غير البوجيهات

دي أول حاجة عملتها و ده بقى يخليها ما تطفيش بعد ما تدور، لكن قبل ما تدور هي دي المشكلة.
و شكرًا على الرد

**karimfahmy99** · 20-08-2010 05:35 PM

و نظام الشفاط فيها اية ؟ اكيد وير زى ال 128 . خللية يراجع على بوابة الشفاط مع الشد لان فى الصيف او الشتا لازم تشد الشفاط شوية تقلل دخول الهوا و ترفع نسبة البنزين فى الخليط . طبعا الباقى انت عملتة كهربا يعنى و نضفت كاربيراتير .. و ممكن برضة عيب فى الرداخ انة لما تسيب العربية مدة البلف بيرجع البنزين للتنك و لما تيجى تدور فين و فين لما لسة الرداخ يحضر و يطلع للكاربيراتير او لو حاطط فلاتر بنزين راجع عليهم يمكن واحد مسدود .. و ممكن حاجة تانية واردة برضة انة الصبابات بتهرب اما عاوز تظبط تاكيهات او عاوز يتعملها رودية و دا يبان لما تفك القواعد عاملة اية

**cOrn** · 20-08-2010 09:13 PM

كان عندى المشكلة بس العربية كانت بتدور تانى او تالت مرة والنهاردة غيرت طرمبة البنزين و النتيجة ان العربية دارت من اول تكة زى اى عربية موديل 2010

**mmffor** · 20-08-2010 09:18 PM

المشاركة الأصلية كتبت بواسطة matrixco

كان عندى المشكلة بس العربية كانت بتدور تانى او تالت مرة والنهاردة غيرت طرمبة البنزين و النتيجة ان العربية دارت من اول تكة زى اى عربية موديل 2010

فعلا طلمبة البنزين ممكن تكون ضعيفة

**ghaith_peogeut** · 20-08-2010 09:22 PM

اخي العزيز انا عملت في توكيلات مختلفة للسيارت ومرت علي مثل هذه الحالة بكثرة وكان السبب واحد في كل هذه الانواع وهو زيادة كمية البنزين في خليط البنزين والهواء من الكاربوريتر والحل بعمل جيك على الكاربريتر وعمل عمرة كاملة لها ان لزم الامر ...وفي حالة محركات الانجكشن فيكون بسبب توسع فتحات البخاخات وبالتالي زيادة كمية البنزين في الخليط