الموضوع: قائمة سوداء باصحاب الورش والمراكز والمحلات في كافة مجالات السيارات

المشاركة الأصلية كتبت بواسطة anaslbda

تحذير من ميكانيكي نصاب وحرامي
موقعه بالظبط: شارع الفالوجا في العجوزة من عند دخلة كورنيش النيل قاعد عامل مصطبة عند سور مركز التأهيل الطبيعي بتاع القوات المسلحة.
ربط خرطوم بنزين اتفك من مكانه في شغلانه ما كمّلتش 10 دقايق وعايز 100 جنيه
شغل زعيق ولم ناس وتهديد بالبلطجية وهجبلك ناس وكلام من هذا القبيل.
وجب التنبيه.

اكيد الخرطوم اللي في التنك اللي تخت العربيه ...صح........اصلا هما اللي بيفكوه اول ما تركن العربيه ..فتمشي بيك خطوتين وتقف قدامه او ميكونش في المكان غيره ...فتلجاله وبيكون عارف العيب لان اللي فكوه تبعه او هوه نفسه
د

السلام عليكم ....
اوحش توكيل ممكن تدخل فيه فحياتك انا معايا اوبل كورسا 2013 دخلت اغير اكصدام امامي و خلفي و كبوت ...
ركبو الاكصدام غلط و كسرو الكلبسات بتعتو و البويا زباله ....... و كل ده و قعدوني شهرين
حاليا انا رافع شكوة لمنصور شفورليه و مستني ...

ورشه عصام حراز على شارع رمسيس قبل مطلع كبرى احمد سعيد كان معايا سينا 1400 اربى ام مش مظبوط رحتله ظبطه خرجت على الطريق على تانى اكتشفت انه كان حاشر قطعه قماش فى ايدل الهواء عشان يخنق الموتور ويوطى اربى ام

ورشه على المسلمى شارع العروبه من المريوطيه هرم اتعاملت معاه فى العربيه السينا كانت لسه مغيره وش سلندر ورجع فكه تانى عشان الخراطه فضلت العربيه عنده مده كبيره فجئت ان كل العربيات الى بتجيله بيقنع الزبون انه يغير باجزاء من المحرك استيراد وكل الزباين بيستلمو العربيات فيها عيوب زياده وبيبيعوها زى ما انت بعت العربيه بعد ما خرجت من عنده قمه الاهمال كسر معظم فيش الحساسات ودمر ضفيره الموتور

السادة المحترمين اعضاء جروب المملكة تم عمل بلوك لعضو الجروب محمد اورجينال و صاحب مركز محمد اورجينال نظرا لوجود اكثر من شكوي من مركزه المعروف باسم محمد اورجينال للسمكرة و عنوانه القاهرة(عين شمس)
9 امتداد شارع 6 اكتوبر.بعد موقف اتوبيسات 44.بجوار مدرسة طلعت حرب
(الشارع الجديد).زهراء عين شمس الشرقية

حيث قام بعدم استكمال الاعمال المتفق عليها مع كلا من عضو الجروب Mohamed Ayman و عضو الجروب Nader Elgamal حيث قمت انا و بعض أعضاء الجروب للتدخل لحل المشاكل القائمة و للاسف لم نصل معه لحل حيث قام العضو صاحب المشكلة الأولى بالتوجه لورشة اخرى و استكمال الاعمال و تحمل التكلفة بالرغم من سداد التكلفة الاولى بالكامل
لينك بوست المشكلة الأولى
https://m.facebook.com/groups/143090...54483094925655

و فى مشكلة عضو الجروب الثانى استاذ Nader رفض محمد اورجينال الرد عليه و عدم احتواء الموقف و عدم احترام مساعى الصلح و تقريب وجهات النظر لحل المشكلة او بمواجهة العميل او الرد على بوست الشكوى بالجروب و حتى بعد اعطائه مهلة للرد
لينك بوست المشكلة الثانية https://www.facebook.com/groups/1430...5027964871168/

و احتراما لسياسة جروب المملكة ان مصلحة أعضاء الجروب فوق الجميع و لابد من الاحترام المتبادل بين اعضاء الجروب و التجار مع تقديم افضل خدمة و اقل اسعار من السادة التجار للسادة اعضاء الجروب.

حسبي الله ونعم الوكيل في الراجل ده محمد اوريچينال،انا حبيت احذر كل واحد اتعامل او بيفكر يتعامل معاه،ممكن يكون فيه ناس مع او ضد اللي هقوله،بس من واجبي زي ما نصحت ناس كتير انها تتعامل معاه اني احكلهم عن اللي حصل معايا من نصب واحتيال،انا كان عندي خبطه في العربيه في الجنب اليمين اضطريت اصلحها اول مره عند صنايعي نص لبه في شرم الشيخ بحكم شغلي علشان مكنش ينفع انزلها القاهره،بس العجله اليمين ماكنتش ظابطه وكانت بتاكل في الكاوتش،عشان كده قولت لازم اظبطها عند مركز صيانه كبير اول ماارجع،وعرفت ان فيه مركز صيانه في عين شمس الشرقيه فيه اجهزه كمبيوتر واستعدال شاسيه،قولت بس هو ده اللي هيظبطلي العربيه ومش هيطلع عيني تاني مع صنايعي نصاب واكيد الموضوع ده مش هيحتاج منه حاجه،ولما روحتله لقيته في منتهي الاحترام والاخلاق وقالي احنا لازم نرفع العربيه علشان نعرف العيب منين واتصل كمان بعفشجي علشان يتأكد انه مش عيب عفشه وبعدين قالي الموضوع بسيط الكارتيره محتاجه زرجينه بس علشان الشغل يبقي علي نضافه هنحل المكنه ونستعدل الشاسيه،قولتله تمام،الموضوع ده هيكلف اد ايه؟؟قالي 2000 جنيه،قولتله ماينزلوش عن كده،قالي لا،انا هعملك فيه شغل من الاخر وهظبطهالك ظبطه تمام،ده غير مصنعيه الميكانيكي اللي هيحل ويركب الماتور،قولتله آمين،وسبتله العربيه ورجعت بعد 4 ايام علشان الاستلام،لقيته بيقولي اتفضل عندي في المكتب لحد ماالعربيه تيجي من المغسله وعزمني علي فنجان قهوه،نزلنا علشان يفرجني علي العربيه،طبعا لقيته مركب شداد للعربيه وغسلها كمان ومعامله مفيش احسن من كده،انا بصراحه قلقت شويه،قولت معقول يكون فيه سيرفيس كده،ربنا يسطر وما يطلبش مني زياده،قولتله اهم حاجه العربيه كده تمام ولا محتاجه حاجه كده ولا كده،قالي لا ده كده عشره علي عشره انت بس ابقي شوف الاسكاتره علشان ممكن تكون محتاجه تظبط،قولتله مفيش مشكله،حسابنا كده كام،قالي احنا كنا متفقين علي 2000 قلتله اه،قال لي واحنا علي اتفقنا والشداد ده من عندي هديه،بصراحه انا كنت فرحان قوي ومش مصدق ان فيه ناس كده،ودفعتله الفلوس،وانا سايق لقيت ان العربيه مش ظابطه زوايا،قولت اكيد محتاجه ظبط هبقي اعملها لما اركب فردتين جداد،وفعلا دورت علي مقاس مناسب وجبت فردتين جداد وركبتهم ورحت اظبط زوايا،طلعت بالعربيه لقيتها برده مش ظابطه،رجعت تاني لبتاع الزواي ثلاث مرات والله،الراجل رفع العربيه وقالي هيا العربيه واخده خبطه في الجنب اليمين؟؟قولتله آه،بس انا ظبطها،قالي لا،تعالي بص بنفسك كده،نزلت لقيت انه العجله مأخره شويه عن العجله اللي قصادها،وهنا كانت الصدمه الكبري،ان المشكله لسه زي ماهي ومفيش حاجه اتظبطت زي ما الحج صاحب المركز كان مفهمني،اول حاجه عملتها كلمته وقولتله،رد عليا بمنتهي الاحترام وقالي تعالي ابصلك عليه،روحت طبعا وانا مطمن ومعنديش شك ان الموضوع هيتحل،ولما وصلت لحد عنده لقيت انسان تاني خالص بيكلمني وبيتهمني كمان بالتقصير وانه كمان كان بيقولي ان العربيه محتاجه ربع كامل وانا اللي ماسمعتش كلامه،انا بصراحه كنت بسمع الكلام اللي بيقوله وانا مصدوم ومش مصدق انه طلع نصاب،طب ليه واحد المفروض ان ربنا كارمه وبيستورد اجهزه شفط واستعدال وماشي بالسبحه وبيقولوا يا حج والله اعلم،ليه يعمل كده وياخد 2000 جنيه بالنصب والاحتيال ده،انا كنت مستبعد تماما بصراحه انه ممكن يعمل كده،والله انا لحد دلوقتي مش مصدق،كل اللي اقدر اقوله اني مش مسامح في الفلوس اللي اخدها بالباطل دي،والحمد لله علي كل شئ،وحسبي الله ونعم الوكيل ويارب اقدر افيد حد بتجربتي دي،وآسف اني اطلت في الشرح،بس ياريت اللي عنده تجربه مع نصاب او صنايعي فاشل يبلغ بيها اللي يقدر عليه.
اقسم بالله العظيم،يمين اتحاسب عليه يوم القيامه ان ده اللي حصل بدون اي مبالغه او تحريف.