من أين أشتري ردياتير استيراد للانسر بومة ؟

**Zekairy** · 23-08-2010 06:08 AM

السلام عليكم
وانا ماشي بالعربية فجأة بطلت
بصيت على الحرارة لقيتها على الآخر
اكتشفت ان الردياتير فاضي
رحت لواحد أي كلام بتاع ردياتير
المهم لقيته مخروم
عاوز أجيب واحد استيراد
العربية لانسر بومة 1600 موديل 2007

أهم حاجة عاوز أعرف الموضوع ده حصل من ايه ...... فلازم ألاقي واحد بيفهم عشان يكشف على التيرموستات والمراوح ودورة التبريد كلها

حد يعرف واحد كويس بتاع ردياتير في الحرفيين ؟ أو في مدينة نصر أو مصر الجديدة ؟؟

والردياتير استيراد في حدود كام ؟

**shooter123** · 23-08-2010 06:21 AM

معلش انا كان نفسي اساعدك بس انا من طنطا
بس حقولك علي حاجة لازم تروح لحد بتاع رداتير كويس يلحم الخرم بدل ما تشتري واحد استيراد كدا حيبقي اوفر وممكن يكون سبب الخرم انك كلت مطب عالي مثلا فلطش في الرداتير من تحت او مروحة التبريد او التكسسف لطشته ودي بقي حصلت معايا قبل كدا ولحمت الرداتير ونضفته وكله تمام الحمد لله

**charming** · 23-08-2010 05:34 PM

هتلاقى الاستيراد عند سوسو بفيصل متخصص و هتلاقى عندو هانجر كبير جدا كلة عربيات مقطعة

**Dr Ahmed** · 23-08-2010 05:40 PM

الرادياتير عايزه بمراوحه وللا من غيرها؟
وبالكتاوت وللا من غيرها؟

نصيحة ليك من أخ يهمه مصلحتك
لو هتجيب رادياتير اوع اوع تجيب استيراد
انا جبت استيراد وكان نضيف وقتها ووالله كان هيطير وش السلندر بعد كام شهر شغل

جيب جديد تايوانى صينى مصرى كله برقبة الاستيراد
القميص بس الجديد بحوالى 450
الاستيراد بألف على الأقل

**Zekairy** · 26-08-2010 06:20 PM

أنا خﻻص اشتريت رادياتير جديد وليس استيراد
واشتريته من عند الراجل اللي بيصلح الرادياتيرات عشان لو حصل في أي حاجة مايقوليش أصل وفصل
المهم انه قالي الرادياتير ده كوري وطبعا أنا متأكد انه صيني
اشتريته منه بستمائة جنيه بالتركيب
تاني يوم لقيته عند واحد تاني بـ 480
!!
جزاكم الله خيرا على ردودكم المفيدة
ويارب الرادياتير ده يفضل سليم
وربنا يعوضني عن الفلوس الزيادة اللي دفعتها

**raedegypt** · 26-08-2010 06:32 PM

من غير عناوين روح الحرفيين ودور بنفسك عند بتوع المقطع واستنظف واحد وشيل واللانسر مليان وبصراحه عربيه بركه وحاجتها كثير ودة ميزتها عن اى عربيه تانيه. وبعدين عن رآى انا اشترى السربنتينا جديدة افضل لك من الكلام دة والحم الحوض القديم ال تحت وال فوق وعيش حياتك من غير ماتدوخ نفسك واتاكد ان طرمبه الميه شغاله حلو علشان تقليب الميه

**amz2011** · 27-10-2014 10:21 PM

السلام عليكم و رحمة الله و بركاته
حضرتك كنت عامل موضوع عن الردياتير بتاعه عربيتك الانسر بومة و ان حضرتك اشتريت ردياتير كورى مع انك متاكد انه صينى
فكنت عايز اعرف من حضرتك ايه اخبار الردياتير داه من 2010 الى الان هل شغال كويس و لا باظ بعدها بفهره لانى بمر بنفس اللى انت مريت به فا ياريت تنصحنى